असार १८ ।


चितवनकै सबैभन्दा ठूलो आयोजनाको रुपमा रहेको नारायणगढ मुग्लिङ सडक सुधार आयोजनाले लक्ष्य अनुरुप प्रगति हासिल गर्न सकेको छैन । विश्व बैंकको लगानीमा एशियाली मापदण्ड अनुरुप निर्माण गर्न लागिएको देशको लाइफ लाइन मानिने सडकको काम लक्ष्य अनुसार प्रगति हुन नसकेको कुरा आयोजनाले गरेको खर्चले समेत प्रष्ट पारेको छ । चालु आर्थिक वर्ष २०७३÷०७४ लागि आयोजनाको नाममा नेपाल सरकारबाट एक अर्ब ५५ करोड ६६ लाख सात हजार रुपैयाँ बजेट विनियोजन भएको थियो । आयोजनाको लागि विनियोजन भएको बजेटको तुलनामा खर्च निकै नै न्यून भएको छ । आयोजनाले असार १७ गतेसम्म जम्मा २७ दशमलब ४१ प्रतिशत बजेट मात्रै खर्च गर्न सफल भएको कोष तथा लेखा नियन्त्रक कार्यालय भरतपुर चितवनले जनाएको छ । नारायणगढ मुग्लिङ सडक सुधार आयोजनाले चालु आर्थिक वर्षको ११ महिनामा जम्मा ४२ करोड ६७ लाख ६७ हजार नौ सय ७६ रुपैयाँ खर्च गरेको कोष तथा लेखा नियन्त्रण कार्यालय चितवनका प्रमुख कोष तथा लेखा नियन्त्रक शिव प्रसाद पन्थीले बताए ।

नारायणगढ मुग्लिङ सडक खण्डको काममा ढिलासुस्ती हुँदा यात्रुहरुले सास्ती खेप्नु परेको छ । दासढुंगादेखि कालीखोलासम्म विभिन्न २९ ठाउँमा पहिरोको जोखिम रहेको सडकमा पहिरो जाँदा लामो समयसम्म यात्रुहरु सडकमा नै बस्न बाध्य भएका छन् । ठेकेदार कम्पनीले लापरबाही तरिकाले पहाड फोर्दा समेत पहाड कमजोर भएर झर्दा उक्त सडक पहिरोको जोखिममा परेको हो । पानी पर्दा हिलाम्य हुने सडक घाम लाग्ने बित्तिकै धुलाम्य भएर सवारी चलाउन समेत नसकिने अवस्थाको सिर्जना गर्दछ ।

असार १७ ।
चितवनमा सूचनाको हक कार्यान्वयन प्रभावकारी नभएको स्थानीय पत्रकारहरुले गुनासो गरेका छन् । नेपाल पत्रकार महासंघ चितवनले शनिवार भरतपुरमा आयोजना गरेको सूचनाको हक कार्यान्वयनको अवस्था विषयक अन्तरक्रिया कार्यक्रममा यस्तो गुनासो गरेका हुन् । संविधानले आम नागरिकका लागि सूचनाको हक सुनिश्चित गरेपनि चितवनमा सूचना पाउन निकै कठिन हुने गरेको पत्रकारहरुको भनाई छ । नेपाल पत्रकार महासंघ चितवनका सल्लाहकार जनक अर्यालले सूचनाको हक कार्यान्वयन फितलो हुँदा निर्धा्रित समयमा सूचना संप्रेक्षण गर्न नसकिएको गुनासो गर्नुभयो । सूचनाको हक अन्तर्गत सबै सरकारी कार्यालयहरुले सूचना अधिकारी अनिवार्य तोक्नुपर्ने संविधानमा उल्लेख भएपनि चितवनका कयौं सरकारी कार्यालयमा अझै सूचना अधिकारी नतोकिदा सूचना पाउन समस्या भएको पत्रकारहरुले बताएका छन् । कार्यक्रममा बोल्दै चितवनका प्रमुख जिल्ला अधिकारी नारायण प्रसाद भट्टले व्यवस्थापन अभावका कारण सूचनाको हक कार्यान्वयन फितलो भएको बताउनुभयो । सूचनाको हक कार्यान्वयन हुन अझै केही समय लाग्ने उहाँको भनाई छ । पूर्वाधार निर्माणदेखि अन्य प्रकृयाको व्यवस्थापनकै चरणमा आफुहरु रहेकाले सूचनाको हक कार्यान्वयन प्रकृया केही फितलो बनेको स्वीकार गर्नुभयो । कतिपय अवस्थामा चितवनका सिडिओले समेत सूचना पाउन नसकेको सुनाउनुभयो । कार्यक्रममा पत्रकार महासंघका सल्लाहकार सूर्यप्रकाश कंडेल, उपाध्यक्ष नारायण अधिकारी, कोषाध्यक्ष प्रकाशमणी ज्ञवाली, राजु थापालगायतले बोल्नुभएको थियो । राष्ट्रिय सूचना आयोगसँगको सहकार्यमा आयोजना गरिएको कार्यक्रममा चितवनका तीनदर्जन पत्रकारहरुको सहभागीता थियो । कार्यक्रम नेपाल पत्रकार महासंघ चितवन शाखाका अध्यक्ष राधेश्याम खतिवडाको अध्यक्षतामा आयोजना गरिएको थियो ।

असार १७ ।
निर्देशन दिएको १ बर्षभित्र पनि पसल दर्ता नगर्ने पुर्वि चितवनको न्यु मोडल केक एण्ड गिफट हाउस बन्द गरिएको छ । विना दर्ता एवं म्याद गुज्रिएको हल्का पेय पदार्थ बेच्दै आएको भण्डाराको न्यु मोडल केक एण्ड गिफट हाउस बन्द गरिएको जिल्ला प्रशासन कार्यालय चितवनका बजार संरक्षण अधिकृत ओम नारायण शर्माले जानकारी दिए । घरेलु तथा साना उद्योगको नेतृत्वमा शनिबार पुर्वि चितवनमा गरिएको बजार अनुगमनमा विना दर्ता सञ्चालित पसलहरुलाइ ७ दिन भित्र घरेलुमा दर्ता गर्न आग्रह गरिएको छ । कार्यालयले अनुगमनका काम लाई प्रभावकारी रुपमा अगाढी बढाउने र दर्ता नगरि सञ्चालmनमा आएका ब्यवसायीलाई दर्ता प्रक्रियामा ल्याउने घरेलु तथा साना उद्योग चितवनका प्रमुख होम प्रसाद घिमिरे ले बताए । त्यस्तै लेबल नभएको चामल विक्री वितरणमा पनि रोक लगाइएको छ । शाहि परिवारको चामलको बोरमा लेबल नभएकाले सो चामल फिर्ता पठाइएको बजार संरक्षण अधिकृत शर्माले जानकारी दिए ।

असार १७ ।


सहभागि बचत तथा ऋण सहकारी संस्था भरतपुरले देवघाटका ज्येष्ठ नागरिकहरुलाइ १ दिनको खाना खुवाएको छ । देवघाट समाज कल्याण केन्द्रमा आश्रित ३३ जना ज्येष्ठ नागरिकहरुलाइ शनिबार बिहान र बेलुकाको खाना खुवाइएको हो । छोरा छोरी नभएका वा भएर पनि अपहेलित भएका बृद्धबृद्धाहरुलाइ संस्थाले खाना खुवाउनुका साथै दैनिक उपभोग्य सामग्री वितरण गरेको संस्थाका अध्यक्ष सुर्य खनालले जानकारी दिए । शनिबार देवघाट समाज कल्याण केन्द्रमा एक कार्यक्रमको आयोजना गरि अत्यावश्यक औषधि तथा बिहान बेलुकाको खाना खुवाएको खनालले वताए । छोरा छोरी वा नाति नातिनीको आभाष दिलाउन एक दिन मात्रै भएपनि खाना खुवाउने कार्यक्रम आयोजना गरेको सल्लाहकार समिति संयोजक अर्पण खनालले वताए । बृद्ध बृद्धा आमा बुबाहरुलाइ खाना खुवाउन पाउंदा खुसि लागेको संस्थाका कार्यसमिति सदस्य युवरा बरालले वताए । ज्येष्ठ नागरिकहरुबाट व्यवहारिक एवं चालचलन लगायतको विषयमा ज्ञान लिन सकिने उनको भनाइ छ ।

असार १७ ।
चितवनको दक्षिण क्षेत्रमा रहेको माडी नगरपालिकामा पर्यटकीय गन्तव्य विस्तारको काम धमाधम भइरहेको छ । चालु आर्थिक वर्षमा मात्रै नयाँ पर्यटन क्षेत्र विकासका लागि २ करोड २० लाख खर्च हुँदैछ । बसाइँ सरेर सदरमुकाम जाने दर नघटेपछि माडीमा पर्यटक चहलपहल बढाएर आत्मनिर्भर बनाउने उद्देश्यले अभियान सुरु गरिएको छ । माडीमा वाल्मीकि आश्रम, गोद्धक क्षेत्र, सोमेश्वरगढी, बैकुण्ठ तालजस्ता पर्यटकीय गन्तव्य छन् । तर, पर्यटकको चहलपहल नभएपछि थप पूर्वाधार विकास गर्दै गन्तव्य विस्तारको काम सुरु गरिएको छ । माडी नगरपालिकाका सूचना अधिकारी सन्तोष सुवेदीले पिकनिक स्पट, पार्क, सिंढी, सत्तललगायतका पूर्वाधारमा बजेट विनियोजन गरेर गन्तव्य विस्तारको काम भइरहेको जानकारी दिए । माडीका साविक गाविसलाई लक्षित गरी पर्यटन पूर्वाधार विकासका काम भइरहेको सुवेदीले बताए । नयाँ बन्ने पूर्वाधारले पर्यटकलाई माडी आउन प्रोत्साहन गर्ने समेत नगरपालिकाको अपेक्षा रहेको छ । उनका अनुसार चालु आर्थिक वर्षमा माडी–३, बघौडामा पिकनिक स्पट तथा पार्क निर्माणका लागि ११ लाख रुपैयाँ, माडी–३ इनारबरुवामा रहेको हरियाली सामुदायिक वनमा ३ लाख ६० हजार लागतमा पार्क, वैकुण्ठ क्षेत्रमा पिकनिक स्पट बनाउन २ लाख ४० हजार, गोद्धक क्षेत्रमा सत्तल निर्माण गर्न १३ लाख रुपैयाँ, बघौडा मगुई खोला नजिकै थारु संग्राहलय निर्माण गर्न ५७ लाख, सोमेश्वरगढी जाने बाटोमा सिंढी निर्माण गर्न १ लाख बजेट कार्यान्वयन गर्न धमाधम काम भइरहेका छन् । यस्तै इनारबरुवामा रहेको दिवाकर वाटिका निर्माण गर्न ७ लाख रुपैयाँ, माडी–४, सितलपुरमा एकतास्तम्भ निर्माण गर्न ५० लाख रुपैयाँ, माडी–२ सितलपुरमा शहीद पार्क निर्माण गर्न ७५ लाख बजेट विनियोजन भएका थिए । तत्कालीन प्रधानमन्त्री पुष्पकमल दाहालद्वारा घोषणा गरिएको चितवन प्याकेजअन्तर्गत एकता स्तम्भ तथा शहीद पार्क निर्माण, पर्यटन मन्त्रालय र नगरपालिकामार्फत संग्रहालय, पार्क तथा पिकनिक स्पटलगायत काम गर्न बजेट छुट्याइएको थियो । सांसद् विकास कोषअन्तर्गतका बजेटबाट पर्यटन पदमार्ग विस्तारका काम भइरहेका छन् ।

असार १७ ।
भरतपुर महानगरपालिकाको गुञ्जानगरमा आयोजना गरिएको पशु स्वास्थ्य शिविरबाट पश्चिम चितवनका एक सय २७ घरधुरी लाभान्वित भएका छन् । पशु सेवा कार्यालय चितवन, पशु सेवा केन्द्र गुञ्जानगर र दुग्ध उत्पादक तथा सहकारी संस्था लिमिटेड गुञ्जानगरको आयोजनामा भएको पशु स्वास्थ्य शिविरमा दुई सय २३ वटा गाई, एक सय ९८ वटा भैंसी र दुई सय १७ वटा बाख्राको परीक्षण गरिएको छ । पशु स्वास्थ्य शिविरबाट पशुको उपचार र निशुल्क रुपमा औषधि वितरण गरिएको पशु विकास अधिकृत रुद्रकुमार श्रेष्ठले जानकारी दिए । कार्यक्रमबाट स्थानीय किसानलाई बहुवर्षीय उन्नत घाँसहरु समेत वितरण गरिएको श्रेष्ठले बताए । स्थानीयलाई लेपियर जानको घाँसको विउ चार हजार सेट र मोलाको जातको बहुवर्षीय घाँस ४५ हजार सेट वितरण गरिएको श्रेष्ठले जानकारी दिए । पशु स्वास्थ्य शिविरको उद्घाटन गर्दै जिल्ला पशु सेवा कार्यालय चितवनका प्रमुख वरिष्ठ पशु चिकित्सक डाक्टर डिल्लीराम सेढाईँले राष्ट्रको दिगो विकासको लागि कृषि नै मुख्य आधार भएको बताएका छन् । पशुपालन व्यवसायलाई सम्मानीत पेसा बनाउनको लागि र दूधमा आत्मनिर्भर बन्नको लागि सरकारले दूधमा अनुदान दिन सुरु गरेको सेढाईँको भनाइ छ । राष्ट्रिय आयमा वृद्धि गर्न पशुहरुलाई आहार पालन पोषण पु¥याउँदै दूध उत्पादनमो वृद्धि गर्नुपर्ने सेढाईँले बताए । चितवनमा दैनिक साढे दुई लाख लिटर दूध उत्पादन हुने गरेको र मुलुकमा सात लाख लिटर दूधको अभाव भइरहेको अवस्थामा चितवनले दूधको पूर्ति गर्नुपर्ने सेढाईँको भनाइ छ ।
आवाज...
दैनिक एक हजार लिटर दूध संकलन गर्ने सहकारीलाई सरकारले प्रतिलिटर दूधमा एक रुपैयाँ अनुदान दिन सुरु गरेको उल्लेख गर्दै यस वर्ष चितवनका ३६ जना किसानले दूधमा अनुदान पाएका सेढाईँले जानकारी दिए । कार्यक्रममा राष्ट्रिय पंक्षी रोग अन्वेषण केन्द्रका प्रमुख डाक्टर दयाराम चापागाईँले मानिसको जीवनलाई दीर्घायू बनाउन पनि पशुहरु स्वस्थ हुनुपर्ने बताए । नियमित रुपमा पशुको उपचार गर्दै आफ्नो पशुलाई स्वास्थ्य बनाउनको लागि चापागाईँले आग्रह गरे । दुग्ध उत्पादक तथा सहकारी संस्था लिमिटेड गुञ्जानगरका अध्यक्ष भरत ढकालको अध्यक्षतामा भएको कार्यक्रममा पशु विकास अधिकृत रुद्र कुमार श्रेष्ठले स्वागत मन्तव्य राखेका थिए । स्वास्थ्य शिविरमा पशु चिकित्सक डाक्टर अर्जुन कुमार थपलियाले पशुको स्वास्थ्य परीक्षण गरेका थिए ।

देवः विकास बैंक लि.को माडी नगरपालिका, वडा नं. ३, वसन्तपुरमा माडी शाखा कार्यालयको शुभारम्भ गरिएको छ । नेपाल राष्ट्र बैंकको डेपुटी गभर्नर चिन्तामणि सिवाकोटीले शाखाको समुद्घाटन गरेका हुन् । बैंकका संचालक समितिका वरिष्ठ संचालक बज्र गुरुङ्गज्यूको सभापतित्वमा सम्पन्न भएको उक्त कार्यक्रममा स्वागत मन्तव्य दिंदै बैंकका प्रमुख कार्यकारी अधिकृत विजय बहादुर श्रेष्ठले माडी उपत्यकाको आर्थिक कारोवार अभिबृद्धि गर्न बैंक सदवै क्रियाशील रहने प्रतिबद्धता व्यक्त गरे । माडी उद्योग वाणिज्य संघका अध्यक्ष रेशम लालले माडी क्षेत्रको आर्थिक उत्पादकत्व बृद्धि गर्नका लागि देवः विकास बैंकको शाखाबाट सहयोग पुग्ने विचार व्यक्त गरे । माडी नगरपालिकाका नगर प्रमुख, ठाकुर प्रसाद ढकालले नगरवासीहरुको आर्थिक आवश्यकता पूरा गर्न र माडी उपत्यकामा आर्थिक गतिविधि बढाउन बैंक क्रियाशील हुनु पर्नेमा जोड दिए । नगरको विकासका लागि बैंकसंग सहकार्य गर्न नगरपालिका तयार रहेको बताए ।
कार्यक्रममा प्रमुख अतिथि, नेपाल राष्ट्र बैंकका डेपुटी गभर्नर, चिन्तामणि सिवाकोटीले देशको आर्थिक गतिविधी माथि प्रकाश पार्नु हँुदै देशको श्रमशक्तिलाई स्वदेशमै उपयोग गर्न रोजगारका अवसरहरु सिर्जना गर्नु पर्ने र उद्यमशीलताको विकासका लागि बैंकले यस क्षेत्रमा शाखा विस्तार गरेको बताए । निर्यातमुखी व्यवसायमा जोड दिदै बैकिङ्ग सेवालाई गाउँ गाउँमा पुर¥याउन सकेमात्र समग्र देशको आर्थिक बृद्धिदर हुने विचार व्यक्त गरे ।
कार्यक्रममा माडी नगरपालिकाका उप नगर प्रमुख, स्थानीय व्यवसायी, गृहणी,पत्रकार, विभिन्न संघ संस्थाका प्रतिनिधिहरु, भद्र भलादमीहरुको उपस्थिति रहेको थियो ।
सो अवसरमा बैंकले हालसम्म रु. १० अर्व निक्षेप संकलन गरी रु. ९ अर्व ३९ करोड कर्जा प्रवाह गरिएको र २०७३ चैत्र मसान्तसम्ममा रु. ३१ करोड ४० लाख संचालन मुनाफा हासिल गर्न बैंक सफल भएको जानकारी गराइएको थियो ।

More Articles ...