पुस २३।

भरतपुर महानगरपालिकाको प्रथम नगरसभा सकिएको छ । । शनिबार बिपी कोइराला मेमोरियल क्यान्सर अस्पतालको सभाहलमा भएको बन्द सत्रले ३ अर्ब ५० लाखको बजेट पारित गर्दै अल्पकालिन, मध्यकालिन तथा दिर्घकालिन योजनाका निति तथा कार्यक्रम पास गरेको मेयर रेणु दाहालले जानकारी दिइन् । कार्यक्रमले ९५ कि मि महानगरीय रिङ्ग रोड तथा पुर्व पश्चिम एवं उत्तर दक्षिण लिकं रोड निमार्ण प्रस्तावलाइ पास गरेको छ ।

नीति तथा कार्यक्रममा प्रमुख प्राथमिकतामा रहेको दिर्घकालिन योजनाको रुपमा अन्य नगर संग जोडन नारायणी नदिमा ३ वटा पक्की पुल निर्माणको प्रस्ताब पनि पास भएको मेयर दाहालले जानकारी दिइन् । महानगरको पहिलो नगर सभाले जेष्ठ नागरिक तथा महिलालाई भरतपुर हस्पिटलमा निस्शुल्क ओपिडी सेवा , महानगरीय छात्रबृत्ती , पर्यटकिय क्षेत्रको बिस्तार र बिकास , जनता आवास तथा जनता तटबन्ध कार्यक्रम , शिक्षा र स्वास्थ्यको हब, लगायत महत्वपूर्ण निर्णयहरु गरेको मेयर दाहाले बताइन् ।

पूर्वाधार विकास क्षेत्र तर्फ १ अर्व ३४ करोड ४ लाख ६८ हजार,बतावरण तथा विपद व्यवस्थापन तर्फ १३ करोड ८७ लाख ५० हजार, सामाजिक विकास तर्फ ६० करोड २७ लाख २५ हजार,आर्थिक विकास तर्फ ५ करोड ८१ लाख १६ हजार,प्रशासनिक क्षेत्र तर्फ ४१ करोड ४९ लाख ४१ हजार र सामाजिक सुरक्षा भत्ता तर्फ ४५ करोड रकम पारित भएको छ ।

एक शहर एक पहिचान, एकीकृत शहरी विकास योजना समेत नीति तथा कार्यक्रमको प्राथमिकतामा रहेको छ । यो सँगै वातावरण तथा सरसफाइ र सामाजिक क्रियाकलापमा समेत महानगरले ध्यान केन्द्रित गरेको छ । महानगरले इको – टुरिजम , खरका घर मुक्त महानगर , महानगर छात्रा वृति कार्यक्रम , हाम्रा बालबालिका हाम्रो भबिस्य अभियान , अति बिपन्न तथा गरिब वर्ग र एचआइभी संक्रमितलाई गुणस्तरीय आधारभूत स्वास्थ्य सेवा निशुल्क गर्ने , जेस्ठ नागरिक दिवा सेवा केन्द्र संचालन , मेयर कप खेलकुदका कार्यक्रम संचालन गर्ने लगाएतका बिसय बस्तु पास भएको छ । त्यस्तै क्लिन भरतपुर, ग्रिन भरतपुर, एक वडा एक उद्यान ,एक वडा एक पोखरी, एक मार्ग एक रङ्ग नारालाई पनि विशेष प्रथामिकतामा राखिएको छ ।

पुष २२ ।

थारु समुदायहरुको महान् चाड माघी (खिचरा)को अवसरमा चितवनमा खिचरा महोत्सव हुने भएको छ । राष्ट्रिय एकता र विविधता हाम्रो शान बहुजाति, भाषा, सँस्कृति नेपालको पहिचान भन्ने नारासहित पाँचौ खिचरा महोत्सव यही पुस २८ देखि माघ ८ गतेसम्म हुन लागेको आज खैरहनीमा आयोजित पत्रकार सम्मेलनमा जानकारी दिइएको हो । थारु कल्याणकारीणी सभा क्षेत्र नम्बर ७ ले खैरहनी नगरपालिका ५ स्थित जनकौली गौचरनमा महोत्सव आयोजना गर्न लागेको छ । ‘पाँचौं खिचरा महोत्सव २०७४’ को तयारी अन्तिम चरणमा पुगेको आयोजकले जनाएको छ । थारु सँस्कृतिको संरक्षण र सम्वद्र्धन गर्ने उद्देश्यले प्रतियोगितात्मक थारु साँस्कृतिक घरेलु हस्तकला प्रदर्शनी राखिएको र यसपाली महोत्सवको आकर्षणको रुपमा थारु जतिको मूख्य खानाको परिकार मध्येको ‘घोङघी’ र ‘चिचर’को ५ फिटको विशाल मूर्ती प्रदर्शनमा राखिएको महोत्सव मुल समारोह समितिका संयोजक नारायणप्रसाद महतोले बताए ।
यस्तै महोत्सवमा आउने दर्शकहरुको टिकटमा ३५ हजार रुपैयाँ बराबरको बम्पर उपहार स्वरुप पलङ राखिएको छ । त्यस्तै प्रत्येक ५० रुपैयाँको टिकटमा २५ रुपैयाँ बराबरको एउटा पल्पी जुस उपहारको व्यवस्था गरिएको छ । महोत्सवमा करिव २ सय वटा व्यवासीयक स्टलहरु रहने र महोत्सवमा २ लाख दर्शकले अवलोकन गर्ने आयोजकले अपेक्षा लिएको छ । ११ दिनसम्म चल्ने महोत्सवको भूमी सुधार मन्त्री गोपाल दहितले समुद्घाटन गर्ने कार्यक्रम रहेको अतिथि सत्कार समितिकी संयोजक चन्द्रकुमारी चौधरीले जानकारी दिनुभयो । महोत्सवमा ११ दिन नै राष्ट्रिय तथा स्थानीय कलाकारहरुको बेजोड साँस्कृतिक प्रस्तुती रहने आयोजकले जनाएको छ

पुष २२ ।


असन्तुलित खानपानका कारण नेपालमा नसर्ने रोगको महामारी बढ्दै गएको सरोकारवालाहरुले वताएका छन् । जलवायु परिवर्तन, तिव्र शहरीकरण एवं प्रविधि प्रयोग लगायतका कारणले पनि मानिसहरु सर्ने भन्दा नसर्ने रोगहरुको शिकार बनिरहेको स्वास्थ्यकर्मीहरुले वताएका छन् । प्राथमिक स्वास्थ्य सेवा पुर्नजागरण महाशाखाले शनिबार कृष्णपुरमा आयोजना गरेको नसर्ने रोगको कार्यक्रम पेन सम्बन्धि जिल्लास्तरिय सरोकारवाला र स्वास्थ्यकर्मीहरुको लागि अभिमुखिकरण कार्यक्रममा बोल्दै महाशाखाका निर्देशक भोगेन्द्रराज डोटेलले नेपालमा ६० प्रतिशत मानिस नसर्ने रोगबाट मर्ने गरेको वताएका छन् । नसर्ने रोगहरु मध्ये उच्च रक्तचाप, मधुमेह, दिर्घ श्वासप्रश्वास र क्यान्सर रोगका विरामीहरु बढि शिकार बनेको उनको भनाइ छ । सरकारले सुर्तिजन्य पदार्थको नियमन गर्ने निती लिएको भएपनि त्यसको प्रभावकारी कार्यान्वयन नहुंदा नसर्ने रोगको विगविगी नियन्त्रणमा लिन नसकिएको उनले वताए । जिल्ला जनस्वास्थ्य कार्यालय चितवनका वरिष्ठ जनस्वास्थ्य प्रशासक विजय कुमार झाले नसर्ने ८ प्रकारका रोगको उपचारका लागि एक जना विरामीलाइ १ लाख रुपैंया सम्मको निशुल्क सेवा दिने व्यवस्था गरेको जानकारी दिए । चितवनमा नसर्ने रोगको कार्यक्रम पेन पनि यसै बर्षदेखि सञ्चालन भएको छ । हाल चितवन लगायत ३० जिल्लामा पेन कार्यक्रम भइरहेको छ । कार्यक्रममा कार्यपत्र प्रस्तुत गर्दै प्राथमिक स्वास्थ्य सेवा पुर्नजागरण महाशाखाका जनस्वास्थ्य अधिकृत सुदिप आलेमगरले नेपालमा ४८ प्रतिशत पुरुष र १४ प्रतिशत महिलाले सुर्तिजन्य पदार्थ प्रयोग गर्ने गरेको वताए । खानपानको जिवनशैली परिवर्तन नगर्दा सम्म नसर्ने रोेग नियन्त्रणमा आउन नसक्ने उनले वताए । सरकारले आगामी सन् २०२५ सम्म नसर्ने रोगबाट हुने मृत्यलाइ २५ प्रतिशत कम गर्ने रणनिति लिएको छ । सन् २०२५ सम्ममा सुर्तिजन्य पदार्थको प्रयोगमा ३० प्रतिशत कम ल्याउने सरकारको तयारी रहेको उनले जानकारी दिए । कार्यक्रममा जिल्ला समन्वय समिति चितवनका प्रमुख कृष्ण डल्लाकोटि, सहायक प्रमुख जिल्ला अधिकारी नेत्र प्रसाद शर्मा, स्थानिय विकास अधिकारी कृष्ण प्रसाद सुवेदी लगायत विभिन्न स्वास्थ्य संस्थाका स्वास्थ्यकर्मीहरुको सहभागिता रहेको थियो ।

पुष २२ ।


पतञ्जली योग समिति चितवनको अध्यक्षमा राम प्रसाद वस्ती सर्वसम्मतिले चयन भएका छन् । समितिको बृहत योग शिक्षक भेला एवं वनभोज कार्यक्रमले वस्तीको अध्यक्षतामा १५ सदस्यिय नयां कार्यसमिति चयन गरेको हो । यो समिति २ बर्षे कार्यकालको रहने अध्यक्ष वस्तीले जानकारी दिए । त्यस्तै महिला पतञ्जली योग समिति चितवनका अध्यक्षमा अस्मिता पाण्डे चयन भएकी छन् । बृहत योग शिक्षक भेला एवं वनभोज कार्यक्रममा करिब २ सय जना योग शिक्षकहरुको सहभागिता रहेको थियो । कार्यक्रममा नेपाल प्रहरीका पुर्व डिआइजी ज्ञानेन्द्र विक्रम महत, पतञ्जली योग समिति नेपालका केन्द्रिय प्रभारी लवदेव मिश्र, महिला पतञ्जली योग समितिकी केन्द्रिय सह प्रभारी अर्चना घिमिरे लगायतको उपस्थिति रहेको थियो ।

पुष २२ ।

आसन्न उद्योग वाणिज्य संघ चितवनको निर्वाचनमा अध्यक्ष पदका लागि उम्मेद्वारी घोषणा गरेका ज्ञानेन्द्रमान शाक्यले सहनलाल प्रधानलाई समर्थन गर्ने घोषणा गरेका छन् । शनिबार नारायणगढमा पत्रकार सम्मेलनको आयोजना गरि शाक्यले उद्योग वाणिज्य संघको गरिमालाई कायम राख्न अध्यक्षका उम्मेद्वार सहन प्रधानलाई समर्थन गरेको घोषणा गरे । उनले अग्रजहरुको सल्लाह र व्यवसायीहरुको सुझावको आधारमा आफू निर्वाचनबाट पछि हटेको बताए । उनले २÷३ वर्ष यता उद्योग वाणिज्य संघ चितवनको गरिमामा आँच आउने खालका गतिविधि भएको र यसले व्यवसायीहरुलाई नै विभाजित गरेकाले सबैलाई एक ढिक्का बनाउने खालको नेतृत्वको आश्यकता रहेको बताए । उनले संघका वर्तमान अध्यक्ष राजन गौतमको कार्यकाल असफल रहेको भन्दै व्यवसायीहरुमा झुठको खेती गरिरहेको आरोप लगाए । प्रधानले सफल नेतृत्व दिन सक्ने भएका कारण पूर्व अध्यक्षहरुदेखि लिएर सम्पूर्ण व्यवसायीहरु उनको पक्षमा लागेको बताए । उनले समयले माग गरे फेरी आफू संघको नेतृत्वका लागि अघि बढ्ने उद्घोष गर्दै अहिले सहन प्रधानकै नेतृत्व खाँचो रहेको औल्याए । शाक्यको समर्थन पछि बोल्दै अध्यक्षका उम्मेद्वार सहनलाल प्रधानले आफ्नो जित सुनिश्चित भईसकेको दावी गरे । उनले विगतदेखिको आफ्नो गृहकार्य र एक दशकदेखिको संघमा रहेर हासिल गरेको अनुभव नै जितको आधार भएको बताए । उम्मेद्वार प्रधानले अग्रजहरुदेखि भर्खर संघमा आवद्ध व्यवसायीहरु आफ्नो पक्षमा रहेकोले आफ्नो जित औपचारिकतामा मात्रै बाँकी रहेको बताए

पुष २२ ।


नेपालका विभिन्न जल क्षेत्रमा शनिबार देखि जलपक्षी (पानीचरा)को गणना शुरु भएको छ ।सिमसार क्षेत्रमा पाइने चराको अवस्था पत्ता लगाई यसको संरक्षणका लागि नयाँ रणनीति बनाउन चरा गणना गर्न लागिएको हो । गणनापछि तयार पारिएको प्रतिवेदन नीति निर्माणतहमा समेत पेश हुने चराविज्ञ तथा पक्षीविद् संघ नेपालका प्रमुख डा हेमसागर बरालले जानकारी दिनुभयो ।उहाँका अनुसार आजदेखि शुरु हुने चरा गणना कार्य माघ ७ गतेसम्म चल्ने छ । गणनामा ३०० स्वयंसेवक तथा चराविज्ञको सहभागिता रहने डा बरालले बताए । शनिबार पहिलो दिन शुक्लाफाँट र कोशीटप्पुबाट गणना शुरु हुने भन्दै डा बरालले अन्य क्षेत्रमा शनिबार देखि माघ ७ गतेभित्रमा आआफ्नो अनुकूलतामा देशैभरिको सिमसार क्षेत्रमा गणना हुने जानकारी दिनुभयो ।चितवनमा भने केही दिनमा गणना थालिने चराविज्ञ तथा वर्ड एजुकेशन सोसाइटी चितवनका पूर्वअध्यक्ष वासु बिडारीले बताउनुभयो । अघिल्लो गणनामा चितवनमा ५४ प्रजातिका जलपक्षी भेटिएको थियो । तर चराको संख्या भने घट्दो क्रममा रहेको चराविज्ञले बताएका छन् । डा बरालले चराको संख्या घट्दो क्रममा रहेको भन्दै यसतर्फ गम्भीर हुनुपर्नेमा जोड दिनुभयो ।यसपटक सिमसार सूचीमा सूचीकृत नेपालको पाँच वटा तालमा समेत चराको गणना हुनेछ । मुख्य गरी चितवनको विसहजारी ताल, कपिलवस्तुको जगदिशपुरताल, पोखराको फेवाताललगायत क्षेत्रमा पनि चराको गणना हुनेछ ।अघिल्लो अनुगमनमा चितवनमा सिमसार क्षेत्रभरि गरेर कुल १० हजार ३२ चरा गणना गरिएको वर्ड एजुकेशन सोसाइटी चितवनले जनाएको छ । त्यसको अघिल्लो वर्ष सिमसार क्षेत्रमा ११ हजार २६० वटा चरा भेटिएको थियो । जिल्लामा चराको संख्या ६३४ प्रजातिको अभिलेख छ । नेपालमा ८८७ प्रजातिका चरा छन् । अहिले विभिन्न देशबाट चरा नेपाल बसाइँ सरेर जाडो छल्न नेपाल आएका छन् ।

पुष २२ ।


चितवनको न्यूनतम तापक्रम शनिवार यस वर्षकै कम मापन गरिएको छ ।शनिवार विहान भरतपुरको न्यूनतम तापक्रम ७ दशमलव २ डिग्री सेल्सियसमा झरेको भरतपुर नागरिक उडड्यन कार्यालयले जानकारी दिएको छ । कार्यालयका सिनियर अफिसर क्षीतिज ज्ञवालीका अनुसार आज विहान मापन गरिएको तापक्रम यस वर्षकै सवैभन्दा कम हो । शुक्रवार न्यूनतम तापक्रम ८ डिग्री सेल्सियसमा झरेको थियो । यसअघि जाडोयाम सुरु भएसँगै न्यूनतम ८ र अधिकतम २० डिग्री तापक्रम मापन गरिएको थियो । चितवनमा केहीदिन यता वढेको चिसोका कारण जनजिवन प्रभावित वनेको छ । नारायणगढ, टाँडी, पर्सा लगाएतका वजारमा सर्वसाधारणको आवागमन पातलिएको छ । जाडो बढेसंगै भरतपुर लगायत विभिन्न स्थानका चोक तथा सार्वजनिक स्थलहरुमा दाउरा बालेर आगो ताप्ने क्रम बढेको छ । शनिबार भरतपुर तथा नारायणगढ बजारमा यातायात तथा पैदयात्रुको आवागमन समेत पातलिएको छ । बजार क्षेत्रका व्यवसायी एवं भित्री क्षेत्रमा परिवारका सदस्यहरु समेत एक ठाउंमा झुम्म भएर दिनभर आगो तापेर दिन विताएका छन् । यसैविच एक साता यता चलेको शीतलहरसँगैको चिसो हावाका कारण सिरहा र सप्तरीमा गरी ९ जनाको मृत्यु भएको छ । सप्तरीमा ६ र सिरहामा तीन जनाको मृत्यु भएको हो । चिसोका कारण सिरहामा तीन जनाको मृत्यु भएको छ । गोलबजार नगरपालिका २ का ७० वर्षीय रामप्रसाद महतो र वडा नम्बर ४ का ६ वर्षीय लवकुमार साहको शनिबार मृत्यु भएको हो । त्यसैगरी धनगढीमाई नगरपालिका–७ का ५५ वर्षीय रामरतन महतोको पनि चिसोका कारण गएराति मृत्यु भएको प्रहरीले जनाएको छ । यस्तै सप्तरीमा चिसोका कारण ६ जनाको मृत्यु भएको छ । महदेवा गाउँपालिका–२ अकवरपुरका ५८ वर्षीय सुकदेव यादवको हिजो चिसोले मृत्यु भएपछि सप्तरीमा मृतकको संख्या ६ पुगेको हो । स्थानीय तहहरुले चिसो र शितलहरबाट राहतका लागि ठाउँठाउँमा आगो ताप्ने व्यवस्था गर्न दाउराको व्यवस्था गरेको छ । कतिपय स्थानीय तहले दलित वस्तीमा न्यानो कपडा समेत वितरण गरेका छन् । त्यस्तै भरतपुरबाट हुने शनिबारका सबै हवाई उडान रद्द भएको छ । बाक्लो हुस्सुका कारण कुनैपनि उडान हुन नसकेको नागरिक उडड्यान प्राधिकरण भरतपुरले जानकारी दिएको छ । चितवनबाट शनिबार काठमाडौं र पोखरा लागी १४ ओटा उडान तालिका तय गरिएको थियो । जसमध्ये बुद्ध एयरको ९, यति एयरको ४ र सिम्रिक एयरको १ उडानको तालिका रहेको थियो ।

More Articles ...