कात्तिक १८ ।


भरतपुर महानगरपालिका वडा नम्बर ८ मा रहेको गौरीगञ्ज दुग्ध उत्पादक सहकारी संस्था लिमिटेडको २५ औँ वार्षिक साधारण सभा तथा नवौँ अधिवेशनले ईन्द्रप्रसाद घिमिरेको अध्यक्षतामा ११ सदस्यीय नयाँ कार्यसमिति चयन गरेको छ । संस्थाको उपाध्यक्षमा शोभाकर सापकोटा रहेका छन् भने बाँकी नौ जना कार्यसमिति सदस्यहरु रहेका छन् । त्यस्तै अधिवेशनबाट ध्रुब प्रसाद खनालको संयोजकत्वमा तीन सदस्यीय लेखा समिति समेत निर्माण गरिएको छ । वार्षिक साधारणसभाका क्रममा आर्थिक वर्ष ७३÷७४ को आन्तरिक लेखा परीक्षण प्रतिवेदन लेखा संयोजक दिव्यबाबु नेपालले प्रस्तुत गरेका थिए । ३६ लाख ८७ हजार पाँच सय रुपैयाँ चुक्ता शेयर पूँजी रहेको सहकारीले ६ करोड ८९ लाख ७८ हजार छ सय १४ रुपैयाँ आम्दानी गरि ६ करोड ७६ लाख १५ हजार खर्च गर्दै १३ लाख ६३ हजार छ सय १४ रुपैयाँ नाफ भएको नेपालले जानकारी दिए । भरतपुर महानगरपालिकाका उपप्रमुख पार्वती शाह प्रमुख अतिथि रहेको कार्यक्रममा वडा नम्बर ७ का अध्यक्ष राजेनद्रमणि काफ्ले, वडा नम्बर ८ का अध्यक्ष दामोदर न्यौपाने, संस्थाका सल्लाहकार होमनाथ बाँस्तोला, जिल्ला सहकारीका संघका प्रतिनिधि बालकृष्ण उप्रेती लगायतले मन्तव्य राखेका थिए । सहकारीका अध्यक्ष जगन्नाथ कंडेलको अध्यक्षतमा भएको साधारणसभाका क्रममा उपाध्यक्ष तोयनाथ पन्तले स्वागत मन्तव्य राखेका थिए । कार्यक्रममा मन्तव्य राख्ने क्रममा किसानहरुले दुधको मूल्य बढाउनुपर्ने, सरकारद्वारा अनुदान रकम बढाउनुपर्नेजस्ता मागहरु राखेका थिए ।

कात्तिक १८ ।


भरतपुर महानगरपालिकाको वडा नम्बर १० भरतपुर उकालोमा द फुड कोर्ट सञ्चालनमा आएको छ । भाटभटेनीको माथिल्लो तल्लामा स्थापना भएको फुड कोर्टमा विभिन्न १० वटा किचनबाट फरक फरक खानाका परिकारहरु उपलब्ध गराइने सञ्चालक सुशान्त सिंह ठकुरीले जानकारी दिए । अक्सिजन फुड प्रालिले कन्स्ट्रक्सनको पाटो तथा फुड कोर्टले व्यवस्थापनको जिम्मा हेर्ने गरि सञ्चालनमा आएको रेष्टुरेन्टमा चाइनिज, थाई, नेवारी, इटालियन, भेज, तन्दुरी, मुगलाई, बर्गर, बार र कफीको परिकार फरक फरक स्थानबाट उपलब्ध गराउने ठकुरीले बताए । फुड कोर्टमा शाकाहारी तथा मांशाहारी सबै प्रकारका खाजा र खानाका साथमा लाइभ सांगीतिक प्रस्तुती समेत प्रदर्शन हुने बताइएको छ । बिहान ९ बजेदेखि बेलुका ९ बजेसम्म सञ्चालनमा आउने फुड कोर्टले उद्घाटनको अवसर पारेर आगामी कात्तिक २० गतेसम्म भारी छुट सहितको मेनु उपलब्ध गराएको र पारिवारिक वातावरणमा खानाको परिकार उपलब्ध गराइने बताइएको छ । उद्घाटनका तीन दिनसम्म विभिन्न लाइभ सांगीतिक प्रस्तुती हुने उल्लेख गर्दै ठकुरीले शनिबार दिपक बज्राचार्य र रिदम व्याण्डको प्रस्तुती रहने तथा आइतबार र सोमबार नेपाल आईडलका छ प्रतिस्पर्धीहरुको प्रस्तुती रहने बताए । आइतबार र सोमबारको लाइभ सांगीतिक प्रस्तुतीमा साँझ पाँच बजेदेखि बेलुकी आठ बजेसम्म नेपाल आइडलका टप टेन भित्रका मेनुका पौडेल, सुरज थापा, अप्सर अली ब्रदर्श, सुजाता पाण्डे, उल्सन श्रेष्ठलगायतको प्रस्तुती रहनेछ

कात्तिक १८ ।


नेपाल खेलाडी तथा प्रशिक्षक संघ नवलपुरले शनिबार गैंडाकोटमा परिचयात्मक तथा शुभकामना आदानप्रदान कार्यक्रम सम्पन्न गरेको छ । उक्त कार्यक्रममा नवलपुर क्षेत्रका खेलाडी, प्रशिक्षक, खेलकुद समितिका प्रतिनिधि, जनप्रतिनिधिलगायतको सहभागिता रहेको थियो । कार्यक्रममा गैंडाकोट नगरपालिका वडा नम्बर १३ मा निर्माण भएको कबर्ड हलका लागि गैंडाकोट नगरपालिकाले ६४ थान म्याट प्रदान गरेको छ । त्यस्तै नेपाल खेलाडी तथा प्रशिक्षक संघ नवलपुरका नयाँ कार्यसमितिलाई नगरपालिकाले पोशाक समेत वितरण गरेको संघका उपाध्यक्ष तिलक खण्डलुक मगरले जानकारी दिए । उक्त कार्यक्रममा गैंडाकोट नगरपालिकाका नगर प्रमुख छत्रराज पौडेलले नगरपालिकाले खेलकुद क्षेत्रको विकासको लागि सक्दो सहयोग गर्ने बताए । खेलकुद क्षेत्रले नेपालको नाम विश्वभरी फैलाउन सक्ने र नवलपुर खेलकुदको लागि उर्बर भूमि भएकोले समेत नगरपालिकाले खेलकुदको लागि पर्याप्त बजेट विनियोजन गरेको समेत पौडेलको भनाइ छ । नगरकार्यपालिकाद्वारा स्वीकृत गरेर नै खेलकुदको विकासको लागि रंगशाला निर्माण, खेलाडी प्रशिक्षण जस्ता विषयमा बजेट लगानी भइरहेको पौडेलले बताए । उक्त कार्यक्रममा गैंडाकोट नगरपालिकाकी उपप्रमुख विष्णुकुमारी कंडेल, गैंडाकोट वडा नम्बर १३ का वडा अध्यक्ष पदमलाल पौडेल, जिल्ला खेलकुद विकास समिति नवलपरासीका कोषाध्यक्ष विकास केसीलगायतले मन्तव्य राखेका थिए । नेपाल खेलाडी तथा प्रशिक्षक संघ नवलपुरका अध्यक्ष विष्णुलाल श्रेष्ठको अध्यक्षतामा भएको कार्यक्रममा उपाध्यक्ष भूमिश्वर भुषालले स्वागत मन्तव्य रोखेका थिए ।

कात्तिक १७ ।


जुटपानी गरिबी निवारण सानाकिसान कृषि सहकारी संस्था लि. कालिका ६, खोलेसिमलको १०औं वार्षिक साधारण सभामा उत्कृष्ट कृषि समूह र सदस्यलाई सम्मानगरिएको छ । संस्थाबाट ऋणलिई व्यवसायिक गोलभेडा खेती गर्ने कालिका वडा नंं १ मा रहेको महिलाएकता समूहलाई कार्यक्रममा सम्मान गरिएको छ । समूहको अध्यक्ष लक्ष्मी श्रेष्ठलाई सो कार्यक्रममा सम्मान गरिएको हो । त्यस्तै संस्थामा उत्कृष्ट कारोवार गर्ने शेयर सदस्य कविता खनाललाई पनि सम्मान गरिएको छ । कालिका नगरपालिकाका मेयर खुमनारायण श्रेष्ठले कृषिमा आत्मनिर्भर नभएसम्म नगरमा आर्थिक समृद्धि नहुने भन्दै किसानहरुले कृषिको आधुनिकीकरणमा ध्यान दिनुपर्ने बताए । कार्यक्रमका प्रमुख अतिथि समेत रहेका नगर प्रमुख श्रेष्ठले कृषिमा आधुनिक मेशिन, उन्नत बीउको प्रयोग गरी व्यवसायिक खेतीगर्न किसानहरुलाई आग्रह समेत गरेका थिए । कृषिमा आधुनिकीकरण आजको आवश्यकता रहेको भन्दै श्रेष्ठले नगरपालिकाले कृषि क्षेत्रको विकासको लागि बजेट विनियोजन गरेकोले कृषि सहकारीहरु मार्फत् कृषि क्षेत्रको विकासमा नगरपालिका सधै हातेमालो गरेर अगाडि बढ्ने समेत बताए । संस्थाका अध्यक्ष दिपक लामिछानेको अध्यक्षतामा भएको वार्षिक साधारण सभामा कालिका वडा नं. ६ का वडाध्यक्ष बिनोद रेग्मी, कालिका वडा नं. १ का वडाध्यक्ष लिलाबहादुर गुरुङ्ग, कृषि सेवा केन्द्र रत्ननगरका प्रमुख शिवराज पौडेल, खोलेसिमल बजार व्यवस्थापन समितिका अध्यक्ष हरि प्रसाद भण्डारी, नेपाल रेडक्रस सोसाइटी उपशाखा जुटपानीका कार्यवाहक अध्यक्ष गणेश शर्मा पौडेल, उदयपुर सामुदायिक वनका अध्यक्ष केशवलामा, संस्थापक अध्यक्ष लक्ष्मीनारायण चौलागाई, पूर्व अध्यक्ष भिम प्रसाद लामिछाने, सुरक्षित बचत तथा ऋण सहकारी संस्थाका अध्यक्ष शितलकाजी श्रेष्ठलगायतले कार्यक्रममा मन्तव्य व्यक्त गरेका थिए । संस्थाका उपाध्यक्ष सुदर्शन अधिकारीले स्वागत मन्तव्य व्यक्त गरेको कार्यक्रममा कोषाध्यक्ष द्रोणाचार्य रेग्मीले आर्थिक प्रतिवेदन, अध्यक्ष दिपक लामिछानेले संस्थाको भावी नीति तथा कार्यक्रम र लेखा संयोजक टिकाराम रेग्मीले लेखा प्रतिवेदन प्रस्तुत गरेका थिए ।

कात्तिक १८ ।


लायन्स क्लब अफ बागीश्वरी र लायन्स क्लब अफ चितवन माउन्ट एभरेष्टको संयुक्त आयोजनामा नारायणगढ बजारमा ट्राफिक सचेतना कार्यक्रम सञ्चालन गरिएको छ । ट्राफिक नियमको पालना नगर्दा दुर्घटनाको दर बढ्दै गएकोले चालकलाई सचेत बनाउने उद्देश्यले कार्यक्रमको आयोजना गरिएको लायन्स क्लबमा आवद्ध व्यक्तिहरु बताउँछन् । लायन्स क्लब ईन्टरनेशनल ३२५ बी टुका निवर्तमान गभर्नर घनश्याम भट्टराईले लायन्सहरुको सामाजिक उत्तरदायित्व बहन गर्ने सन्दर्भमा कार्यक्रम आयोजना गरिएको बताए । भरतपुर महानगरपालिकाको नारायणगढ बजारदेखि केन्द्रीय बसपार्क हुँदै आँपटारी, नारायणगढ बसपार्कसम्मको चक्रपथ क्षेत्रमा हर्न निषेध गरिएकोले समेत सवारी चालकलाई त्यस विषयमा जानकारी दिन विभिन्न चेतनामूलक स्टीकरहरु टाँसिएको थियो । त्यस्तै लायन्स क्लबका सदस्यहरुले चेतनामूलक प्लेकार्ड समेत प्रदर्शन गरेका थिए ।

कात्तिक १७ ।


सामुदायिक मेलमिलापकर्ता समाज नेपाल चितवनले आफ्नो सातौँ साधारणसभा सम्पन्न गरेको छ । कार्यक्रममा संस्थाका सचिव यज्ञराज सुवेदीले वार्षिक प्रतिवेदन प्रस्तुत गर्दै चितवनमा चार सय १४ जना सामुदायिक मेलमिलपकर्ता रहेको उल्लेख गरे । जिल्लामा भएका तीन सय १४ जना मात्रै समाजमा आवद्ध भएकाले आगामी दिनमा सबैलाई समेट्दै अगाडि बढ्दै प्रयास गरिने सुवेदीको भनाइ छ । यस वर्ष चितवनमा सामुदायिक मेलमिलापकर्ताले चितवन भरीमा एक सय १९ वटा बिवाद समाधान गरेका सुवेदीले जानकारी दिए । सामुदायमा मेलमिलापकर्ताको संख्या घट्दै जानु, मेलमिलापकर्ता निस्कृय रहनु, मेलमिलापकर्ताहरुको प्रभावकारी अनुगमन तथा मूल्यांकन नहुनु, सामुदायिक मेलमिलाप सम्बन्धी निर्देशिका तयार नहुन वा नबन्नु जस्ता चुनौतीहरु मेलमिलापकर्ताहरुबीच रहेको कार्यक्रममा चर्चा गरिएको थियो । कार्यक्रममा संस्थाका कोषाध्यक्ष मानबहादुर खड्काले आर्थिक प्रतिवेदन प्रस्तुत गरेका थिए । कार्यक्रममा सामुदायिक मेलमिलापकर्ताको तर्फबाट स्थानीय तहमा विजय भएका जिल्ला समन्वय समिति चितवनका सदस्य सीता पुन, रत्ननगर नगरपालिकाका उपप्रमुख विमला दुवाडी, चितवनमा सबैभन्दा बढी बिवाद समाधान गर्ने पार्वती न्यौपाने लगायतलाई सम्मान गरिएको थियो । सामुदायिक मेलमिलापकर्ता समाज नेपाल चितवनका अध्यक्ष सूर्यप्रसाद अधिकारीको अध्यक्षतामा भएको कार्यक्रममा सामुदायिक मेलमिलापकर्ता समाज नेपालका केन्द्रीय उपाध्यक्ष विश्वप्रसाद पाठक प्रमुख अतिथि रहेका थिए । कार्यक्रममा रत्ननगर नगरपालिकाकी उपप्रमुख विमला दुवाडी, चितवन जिल्ला अदालतका स्रेस्तेदार गेहेन्द्रराज पन्तलगायतले शुभकामना मन्तव्य राखेका कार्यक्रममा समाजका उपाध्यक्ष अशोककुमार अधिकारीले स्वागत मन्तव्य राखेका थिए ।

 

कात्तिक १७ ।


चितवन राष्ट्रिय निकुञ्जको पुर्वी सेक्टरबाट शुक्रबारदेखि बृहत सरसफाई तथा फोहर व्यवस्थापन अभियान शुरु गरिएको छ । गएको साउनको अन्तिम साता आएको बाढीका प्रभावित बनेको निकुञ्जको नदी किनार र घासे मैदान क्षेत्रमा थुप्रिएका फोहरहरु उठाउने कार्य सुरु गरिएको हो । वन तथा वन्यजन्तुहरुमा बाढीका कारण वगाएर आएका फोहरका निकुञ्जमा असर देखिएको थियो । सोही असरलाई केहि मात्रामा भए पनि न्यूनिकरण गर्न क्षेत्रिय होटल संघ चितवनको संयोजन तथा यहाँका एकदर्जन बढी संघसंस्थाको आयोजनामा आदेखि १० दिनसम्म लगातार रुपमा फोहर संकलन गरि व्यवस्थापन गर्न लागिएको हो । निकुञ्ज भएर बग्ने राप्ती नदीमा मकवानपुर देखि वन्यजन्तुलाई फोहरहरु थुप्रएर असर गरेपछि आफहरुले विभिन्न संघ संस्थाहरुको संयुक्त पहलमा सरसफाई सुरु गरेको फोहर संकलन तथा व्यवस्थापन संयोजक जितु तामाङ्गले जानकारी दिए । बाढी ति क्षेत्रमा सिसा तथा प्लाष्टिकसगैँ विभिन्न भत्कीएका घरहरुमा रहेका नकुहिने फोहर अत्याधिक मात्र भेटिएको थियो । संघको पहलमा विभिन्न चितवन निकुञ्जसँगै राष्ट्रिय प्रकृति संरक्षण कोष, रेवान सौराहा,नेचर गाईड एसोसिएसन,बाघमारा वन, युनाईटेड हात्ती सहकारी,बाघ संरक्षण समिति, ग्रिन सोसाईटी,साना पर्यटन व्यवसायी, सपना भिलेज, वर्ड एजुकेशन सोसाईटी लगायत संघसंस्थाबाट आर्थिक संकलन गरि १० दिन सम्म फोहर संकलन तथा व्यवस्थापन गर्न ५० जना बढी कामदारहरु खटिएका छन् । सो अवसरमा सरसफाई कार्यक्रमको उद्धघाटन गर्दै चितवन राष्ट्रिय निकुञ्जका प्रमुख संरक्षण अधिकृत रामचन्द्र कँडेलले विगतका बाढीहरुमा भन्दा यस पटक फरक प्रकृतिका फोहरहरु बढी देखिएकाले यो अनुसन्धान गर्नुपर्ने बताए । साथै उनले निकुञ्ज बाढीसगैँ अन्य अतिक्रमण सहितका विभिन्न कारणले एक सिगे गैडाको वासस्थानमा असर गरेको बताए । संघका सदस्य जीतु तामाङ्गले स्वागत मन्तव्य व्यक्त गरेको कार्यक्रममा संघका महासचिव रामणि खानाल, रेवान सचिव विनोद लोप्चन, बाघमारा मध्यवर्ती सामुदायिक वनका अध्यक्ष विसप चौधरी, संरक्षणकर्मी डोमा पौडेल लगायतले बोलेका थिए ।

More Articles ...