माघ ०५ ।


आगामी माघ १३ गतेदेखि नारायणगढ मुग्लिङ सडक खण्ड दिउँसोमा बन्द हुने भएको छ । सडक सुधारको कामलाई तीव्रता दिने भन्दै रातिमा छ घण्टा बन्द गर्दा समेत अपेक्षित प्रगति हुन नसकेपछि दिउँसोमा बन्द गर्ने निर्णय गरिएको हो । मुलुकको लाइफलाइनको रुपमा रहेको नारायणगढ मुग्लिङ सडक खण्डमा पटक पटक सवारी साधन रोकेर काम थाल्दा समेत ७० प्रतिशत भन्दा बढी काम हुन सकेको छैन । गत पुस १८ गतेदेखि राति १० बजेदेखि बिहान चार बजेसम्म सडक बन्द गरेर काम गर्दा समेत प्रगति नदेखिएपछि माघ १३ गतेबाट बिहान १० बजेदेखि दिउँसो चार बजेसम्म सडक बन्द गर्ने गरेर काम गर्ने प्रमुख जिल्ला अधिकारी नारायणप्रसाद भट्टले बताए ।

रातिमा सडक रोकेर काम गर्दा पहिलोको भन्दा चार गुणा थोरै काम भएको, सवारी बिग्रिदा काम गर्न समस्या परेको, सामान्य कुरामा ध्यान नदिँदा ट्राफिक जाम बढेको निर्माण पक्षले जनाउँदै जनाएको छ । उक्त सडकमा रातिमा सवारी रोक्ने भनिएपनि सबै सवारी साधन पास गराउँदा समय लाग्नाले काम गर्न नपाएको उडहिल लामा जेभीका ईन्जिनियर प्रविन कुजूले बताए ।

नारायणगढ मुग्लिङ सडकको मुग्लिङ तर्फ रहेको एक सय २३ मिटर सडकमा क्यान्टिलिभर राख्ने भनिएको भएपनि त्यसको फाइल मन्त्रालयमा रोकिएको सडक आयोजनाले जनाएको छ । सडक विस्तारसँगै सडक पिच गर्ने काम समेत भइरहेकोले दिउँसो रोकिएको सवारी साधन समेत पास गर्न समस्या परेपछि रातिको साटो दिउँसो छ घण्टा यातायात बन्द गर्ने सहमति भएको जिल्ला ट्राफिक प्रहरी कार्यालय चितवनका प्रमुख प्रहरी निरीक्षक सन्तोष पन्तले बताए ।

रातिको समयमा काम गर्दा अप्रिय घटना हुने भन्दै निर्माण पक्षले आयोजनालाई दबाब दिएपछि दिउँसो छ घण्टा यातायात बन्द गरेर नारायणगढ मुग्लिङ सुधारको काम थाल्ने सहमति भएको हो । ३३ महिनामा ७० प्रतिशत मात्रै काम भएको सडकको आगामी चैत मसान्तसम्म ३० प्रतिशत काम सक्नु भनेको फलामको चिउरा चपाउनु सरह हो ।

माघ ०५ ।


व्यवसायिकरुपमा पालेका गाई, भैसी र बाख्रामा हुने रोगको संक्रमणका कारण चितवनमा वार्षिक ५० लाखको क्षति हुने गरेको जिल्ला पशु सेवा कार्यालयले जनाएको छ । रत्ननगर महोत्सवअन्तर्गत रत्ननगरमा बुधबार आयोजना गरिएको पशु स्वास्थ्य तथा दुग्ध व्यवसायको वर्तमान अवस्थासम्बन्धी अन्तक्र्रियामा जिल्ला पशु सेवा कार्यालय भरतपुरका प्रमुख डिल्लीराम सेढाईले पशुहरुमा लाग्ने भ्यागुते र चरचरे रोगका कारण जिल्लाका पशुपालक किसानहरुले वार्षिक ५० लाख क्षति व्यहोर्दै आएको जानकारी दिए । उनका अनुसार आर्थिक वर्ष २०७३÷७४ मा मात्र रोग लागेर गाई, भैसी र बाख्रा मरेका कारण जिल्लाका किसानहरुले ठूलो क्षति व्यहोर्नु परेको हो । मरेका पशुहरुको तथ्याङ्क ठ्याक्कै भन्ने सक्ने अवस्था नरहेको भए पनि सबै भन्दा बढी भ्यागुते रोगका कारण व्यवसायिकरुपमा पालेका बाख्राहरु मरेको उनले जानकारी दिए । ५० लाख प्रत्यक्ष क्षति भएको भए पनि त्यो भन्दा बढी अप्रत्यक्षरुपमा क्षति हुने गरेको उनले बताए । भ्यागुते र चरचरे रोग लागेका पशुहरुमा बाझोपन, थुनाइलो, तुहिने जस्ता समस्याका कारण अझ बढी क्षति हुने गरेको उनको भनाइ छ । रोगको निधानको लागि जिल्ला पशु सेवा कार्यालय भरतपुरले पशुहरुलाई भ्याक्सिन लगाउने काम अभियानकै रुपमा अगाडि बढाएको उनले जानकारी दिए । आर्थिक वर्ष २०७३÷०७४ मा भ्यागुते रोगका विरुद्धमा दिइने ४५ हजार पशुलाई भ्याक्सिन दिइएको उनले बताए । चालु आर्थिक वर्षमा पनि २० हजार भ्याक्सिन किसानहरुको गोठमा पु¥याउन जिल्लाका सेवा केन्द्रहरुमा पठाइएको उनले बताए । पशुहरुलाई बढी जाडो भयो भने, बढी गर्मी भयो भने, तनाव र खाना कम भयो भने भ्यागुते रोगले आक्रमण गर्ने गर्दछ । पशुहरुको छाला सुनिने, सास फेर्न गाह्रो हुने, पखाला लाग्ने, जिब्रो सुनिने, घाँटी घ्यारघ्यार गर्ने भ्यागुते रोगको लक्षण रहेको जिल्ला पशु सेवा कार्यालयका प्रमुख सेढाईले बताए । रत्ननगर उद्योग वाणिज्य संघको आयोजना तथा व्यवसायिक पशुपालक कृषक समाज रत्ननगर र नगरस्तरीय दुग्ध उत्पादक सहकारी संस्थाको सहयोगमा सो अन्तक्र्रिया कार्यक्रम आयोजना गरिएको हो । कार्यक्रमका प्रमुख अतिथि पशुपंछी विकास मन्त्रालयका सचिव डा विश्वनाथ ओलीले पशुपालनमा सरकारी अनुदानको अपेक्षा गर्दा परर्निभरता बढ्ने बताए । पशुपालनमा राज्यले गरेको लगानीले किसानहरुलाई परर्निभरतातर्फ उन्मुख बनाएको भन्दै पशुपालनलाई आत्मर्निभर बनाउन किसानहरुले जागरुक हुनुपर्ने बताए । उनले पशु आहार र पशु स्वास्थ्यको विषय नेपालमा जटिल बन्दै गइरहेको बताए । कार्यक्रममा रत्ननगर नगरपालिकाका मेयर नारायण वनले पशुको स्वास्थ्य सुधारको लागि रत्ननगरमा दुई जना विशेषज्ञ पशु चिकित्सक पठाइ दिन पशुपंछी विभागलाई आग्रह गरे । उनले अनुत्पादक पशुहरुलाई जथाभावी सडकमा नछाड्न किसानहरुलाई आग्रह गरे । कार्यक्रममा व्यवसायिक पशुपालक कृषक समाज रत्ननगरका अध्यक्ष किशोर बगालेले पशुपालन व्यवसायमा पशुको स्वास्थ्य संरक्षणको विषय चुनौतिपूर्ण बन्दै गइरहेको भन्दै रत्ननगरमा विशेषज्ञसहितको चिकित्सकको टोली आवश्यक रहेको बताए

माघ ०५ ।


चितवनको भरतपुरमा आयोजना गरिएको मेयर कप अन्डर ट्वान्टी लेडिज मिनी म्याराथुनको उपाधि प्रेमबस्ती माविकी रिनु सुनारले प्राप्त गर्नुभएको छ । भरतपुरको केशरबाग ब्वाइज क्लबको आयोजनामा भएको प्रथम मेयर कप अन्डर ट्वान्टी लेडिज मिनी म्याराथुनमा सुनारले १४ मिनेट २६ सेकेण्डमा तीन किलो मिटर दुरी पार गर्दै उपाधि जित्नुभएको हो । ट्रफीसँगै सुनारले १५ हजार रुपैयाँ नगदको साथमा मेडल र प्रमाणपत्र प्राप्त गनुभएको छ । सोही दूरी १५ मिनेट ०६ सेकेण्डमा दौड पुरा गर्दै दोस्रो हुनुभएकी जनाकी माविकी सञ्जु कुमालले ट्रफीका साथै १० हजार रुपैयाँ नगद तथा मेडल र प्रमाणपत्र पाउनुभएकोक छ । त्यस्तै, १५ मिनेट १९ सेकेण्डमा दुरी पार गरेकी साजापुर माविकी सुस्मिता भट्टराई तेस्रो हुँदै ट्रफीको साथमा पाँच हजार रुपैयाँ, मेडल र प्रमाणपत्र पाउनुभएको छ । प्रतियोगितामा सान्त्वना भएका सारदानगर माविकी विमला राना र प्रेमबस्ती माविकी समीक्षा पोखरेलले दुई हजार पाँच सय रुपैयाँका साथमा मेडल र प्रमाणपत्र प्राप्त गनुभएको छ । दौडमा ४७ जना युवतीहरु सहभागी भएका थिए । केशरबाग ब्वाइज क्लबले पहिलो पटक आयोजना गरेको प्रतियोगितालाई आगामी वर्षमा समेत निरन्तरता दिने अध्यक्ष आदित्य न्यौपानेले बताउनुभयो ।

 

चितवन, माघ ५–

चितवन र नवलपुरका उद्योगीहरुको छाता संगठन चितवन उद्योग संघको नीति तथा कार्ययोजना तर्जुमा गोष्ठी शुक्रबारदेखि चितवनको कसरामा सुरु भएको छ । गोष्ठीको पहिलो दिन विभिन्न २० वटा बुँदामा छलफल गरिएको छ । नवनिर्वाचित चितवन उद्योग संघका पदाधिकारी तथा सदस्यहरुले संघलाई द्रुत गतिमा अघि बढाउन दिर्घकालिन योजनाका साथै व्यावसायिक हकहितका कुरा बढि प्राथमिकतामा राख्नुपर्ने औल्याएका छन् । गोष्ठीमा औद्योगिक व्यवसायसंग आर्कषित औद्योगिक नीति, पोलिसी रिसर्च टिम बनाउनेदेखि चितवन प्रदर्शनी केन्द्रलाई पूर्णता दिँदै शक्तिखोर औद्योगिक क्षेत्र निर्माणलाई प्राथमिकता दिईएको छ । महत्वपूर्ण गोष्ठीले २०७४÷७६ को कार्ययोजना पारित गर्ने संघका अध्यक्ष भेषराज दुवाडीले जानकारी दिए । गोष्ठीमा प्रस्तावित कार्ययोजनामा सबैले आ–आफ्नो राय सुझाव दिएका छन् । यसैबीच ६ जना उपाध्यक्षहरुको कार्य विभाजन समेत गरिने छ । सचिवालय सरकारी एवंम गैरसरकारी समन्वय विभाग, आर्थिक तथा योजना विभाग, प्रदर्शनी केन्द्र तथा औद्योगिक शिक्षालय निर्माण विभाग, प्रदर्शनी केन्द्र संचालन एवंम अन्तराष्ट्रिय सम्बन्ध विभाग र संगठन विस्तार, नीति निर्माण, औद्योगिक क्षेत्र र सामाजिक उत्तरदायित्व विभाग गठन गरि ६ जना उपाध्यक्षहरुको कार्यविभाजन गरिने संघका अध्यक्ष दुवाडीले जानकारी दिए । गोष्ठीमा गर्भनिङ काउन्सील, पूर्व अध्यक्षहरुको समेत सहभागिता रहेको छ ।


माघ ०५ ।


उद्योग वाणिज्य संघ–चितवनको नवनिर्वाचित कार्यसमितिको बिहीबार सम्पन्न पहिलो बैठकले पद विभाजन गरेको छ । संघका नवनिर्वाचित अध्यक्ष सहनलाल प्रधानको अध्यक्षतामा सम्पन्न बैठकमा निर्वाचित ३ उपाध्यक्षको वरीयता तय गरेको छ । जसअनुसार अध्यक्ष सहनलाल प्रधानको अध्यक्षतामा बसको बैठकले प्रथम उपाध्यक्षमा सुमनकुमार श्रेष्ठ, द्वितीय उपाध्यक्षमा चिरञ्जीवी सुवेदी र तृतीय उपाध्यक्षमा ई. भोजराज कौडाललाई पद विभाजन गरेको छ । संघको कार्य विभाजनअनुसार संघको प्रथम उपाध्यक्ष श्रेष्ठले आर्थिक कोष व्यवस्थापन, द्वितीय उपाध्यक्ष सुवेदीले सचिवालय व्यवस्थापन र तृतीय उपाध्यक्ष कौडालले वस्तुगत तथा क्षेत्रीय उद्योग वाणिज्य संघप्रति जिम्मेवार रहने संघले जनाएको छ । कार्यक्रममा संघका निवर्तमान अध्यक्ष राजन गौतमले विजेतासबै पदाधिकारी एवम् कार्यसमिति सदस्यहरुलाई स्वागत गर्दै सबैले चुनावी तितामिठा अनुभव बिर्सिएर संघको हितका लागि अघि बढ्न अनुरोध गरेका थिए ।

विभिन्न अस्पतालका स्वास्थ्यकर्मी र रेडक्रसका स्वयँसेवकहरुले गत सोमबारदेखि चितवनको सौरहामा सञ्चालित आपत्कालीन क्लिनिक सञ्चालन सम्बन्धी ५ दिने तालिम पूरा गरेका छन् । आजै देखि त्यसको फिल्ड अभ्यास पनि सौरहामा सुरु भएको छ । ३ दिन सम्म सञ्चालन हुने फिल्ड अभ्यासको क्रममा मोडल अस्पताल, पाटन अस्पताल र बीर अस्पताल, न्याम्सका चिकित्सक, नर्स तथा स्वास्थ्यकर्मीहरु, नेरेसकोका कर्मचारी तथा स्वयँसेवकहरुले विभिन्न चरणको तालिमको क्रममा सिकेका विषयहरुलाई कृतिम घटना अभ्यास प्रदर्शन गर्दैछन् ।

अभ्यासको पहिलो दिन आज क्लिनिक सञ्चालनको लागि विरामी परिक्षण गर्ने स्थान, शौचालय सहितको आपत्कालीन अस्पताल कक्ष बेड, जेनेरेटर, पानी लगायत वन्दोबस्तीको तत्काल व्यवस्था गरी घाइतेको उपचार सुरु गरिएको थियो । आज विभिन्न किसिमका विरामीहरुको परिक्षण अभ्यासको गरिएको छ ।
अव कुनै पनि विपद् अवस्थामा आवश्यकता परे आपत्कालीन क्लिनिक सञ्चालन गर्न दक्ष जनशक्ति र आवश्यक सामग्रीको तयारी पूरा भएको नेरेसो स्वास्थ्य सेवा विभागका निर्देशक मोना अर्यालले जानकारी दिनुभयो ।

अभ्यासमा रेडक्रसको अन्तर्राष्ट्रिय महासँघ तथा क्यानेडियन रेडक्रसको आर्थिक तथा प्राविधिक सहयोग रहेको छ । कार्यक्रममा विदेशी तथा स्वदेशी प्रशिक्षकहरुले फिल्ड अभ्यास सहजीकरण गरिरहनुभएको छ ।

माघ ०४ ।


विद्यार्थीलाई वैदेशिक अध्ययनको लागि अष्ट्रेलिया पठाउँदै आएको शैक्षिक संस्था एईसीसी ग्लोबलले अष्ट्रेलियन एजुकेश फेयर एण्ड इभेन्ट गरेको छ । एईसीसीले बिहीबार भरतपुरमा अष्ट्रेलियन एड्मिसन डेको आयोजना गरेर वदेशिक अध्ययनमा जान चाहने विद्यार्थीहरुको लागि विशेष शैक्षिक परामर्श प्रदान गरेको हो । एईसीसीले वर्षमा कम्तिमा दुई पटक आयोजना गर्दै आएको एजुकेशन फेयर यस वर्ष जनवरीको १६, १८ र १९ तारिकका दिन काठमाडौँ, पोखरा र भरतपुरमा गरिरहेको छ । काठमाडौँमा आयोजना हुने अष्ट्रेलिया एड्मिशन डेमा ३४ प्रकारको कोर्ष प्रदायकको सहभागिता रहने भएपनि चितवनमा भने १४ प्रकारको कोर्ष प्रदायकहरुको मात्रै सहभागिता रहेको थियो । विद्यार्थी तथा उनीहरुको अभिभावकलाई प्रत्यक्ष अष्ट्रेलियन कोर्ष प्रदायकलाई भेटेर भर्ना छात्रवृत्ति तथा भिसा डक्युमेन्टेशनसँग सम्बन्धित जिज्ञासा मेटाउनको लागि कार्यक्रम गरेको एईसीसी ग्लोबलका डेष्टिनेशन प्रमुख शैलेश कुमार झाले बताए । विद्यार्थीहरु सोझै विश्वविद्यालय पुगेर परामर्श लिन सक्ने अवस्था नरहेको कारण विश्वविद्यालयका प्रतिनिधिलाई विद्यार्थीसँग भेट गराउनको लागि यस्ता कार्यक्रम आयोजना गरिने झाको भनाइ थियो । विद्यार्थीहरुलाई वैदेशिक अध्ययनमा जाँदा पूरा गर्नुपर्ने प्रकृयाको बारेमा जानकारी सँगै शैक्षिक ऋण तथा अन्य विषयमा जानकारी समेत दिइएको थियो । शैक्षिक ऋणको लागि अपनाउनुपर्ने प्रकृयाको बारेमा बैंकबाट नै प्रतिनिधिहरु बोलाएर विद्यार्थी तथा उनीहरुको अभिभावकलाई परामर्श प्रदान गरिएको थियो ।

More Articles ...

Sign up via our free email subscription service to receive notifications when new information is available.