समाचार

मंसीर २२, चितवन ।

लायन्स क्लब अफ चितवन कालिका लेडिजको आयोजना, स्काप किड्स कसमस मन्टेश्वरीको संयोजन र बिपी कोइराला मेमोरियल क्यान्सर अस्पताल भरतपुरको प्राविधिक सहयोगमा एक दिने निशुल्क स्वास्थ्य शिविर तथा क्यान्सर सचेतना एवं महिलाहरुको स्तन तथा पाठेघरको मुखको क्यान्सर परिक्षण कार्यक्रम सम्पन्न भएको छ । शिविरमा १ सय जना महिलाहरुको स्तन र पाठेघरको मुखको क्यान्सर परिक्षण गरिएको थियो । जस मध्ये ७० जनाको पाठेघरको मुखको क्यान्सर परिक्षण गरिएको थियो । परिक्षण गरिएका मध्य २० जनालाई थप उपचारको लागि भरतपुरका विभिन्न अस्पतालहरुमा रिफर गरिएको छ । लायन्स क्लब अफ चितवन कालिका लेडिजकी अध्यक्ष शोभा लामिछानेको अध्यक्षतामा भएको कार्यक्रममा कालिका नगरपालिकाकी उप प्रमुख बिमला तामाङ प्रमुख अतिथि रहनु भएको थियो । गाउं घरका महिलालाई लक्षित गरी आयोजना गरिएको स्वास्थ्य सचेतना कार्यक्रमले महिलाहरुलाई आफ्नो स्वास्थ्यमा ध्यान सचेत गराएको क्लब कि अध्यक्ष शोभा लामिछानेले बताउनु भयो ।

आफु क्लबको अध्यक्ष भए देखि अति विपन्न परिवारलाई खाद्यन्न, लत्ताकपडा सहयोग, उपचार खर्च अभाव भएका विरामीलाई उपचार खर्च सहयोग र समुदाय लक्षित कार्यक्रमहरु क्लबले गर्दै आएको अध्यक्ष लामिछानेलले बताउनु भयो । कार्यक्रममा विशिष्ट अतिथि टिकाराम रेग्मी, लायन दिपेन्द्र खतिवडा, लायन योगेन्द्र नाथ अधिकारी, लायन, निरज श्रेष्ठ अतिथिहरु लायन मधुर नेपाल, लायन भिम बहादुर नेपाल, लायन्स क्लब अफ कालिकाका पुर्व अध्यक्ष सिपी अधिकारी लगायतले मन्तव्य राख्नुभएको थियो । कार्यक्रममा प्रमुख अतिथि तामाङलाई लायन्सको पिन लगाएर मानार्थ सदस्यको रुपमा सम्मानित गरिएको थियो । विरुवामा जल राखी उद्धघाटन गरिएको कार्यक्रम लायन रिता भट्ट पाठकले सञ्चालन गर्नु भएको थियो । कार्यक्रम क्लबकी अध्यक्ष एवं स्काप किडस कसमस मन्टश्वरीकी फाउण्डर प्रिन्सीपल शोभा लामिछानेको अध्यक्षतामा सम्पन्न भएको थियो । कार्यक्रम स्काप किड्स कसमस मन्टेश्वरी कालिका ६ जमुनापुरमा आयोजना गरिएको थियो ।

मंसीर २२, चितवन ।
पर्यटकीय नगरी चितवनको सौराहामा यस वर्ष हात्ती महोत्सव हुने भएको छ । ४ वर्षदेखि रोकिएको हात्ती महोत्सव यो वर्षबाट फेरि सुरु गर्न लागिएको हो। पुस १० गतेदेखि १४ गतेसम्म क्षेत्रीय होटल संघ नेपाल सौराहाले १७ औं हात्ती तथा पर्यटन महोत्सवका रूपमा मनाउन तयारी गरेको छ। कोभिडको संक्रमणका कारण सन् १०१८ पछि हात्ती महोत्सव हुन सकेको थिएन। सौराहामा अंग्रेजी नयाँ वर्षमा पर्यटक भित्र्याउनका लागि हात्ती तथा पर्यटन महोत्सव आयोजना गर्न लागिएको हात्ती तथा पर्यटन महोत्सवका संयोजक ओमप्रकाश पाण्डेले बताए । लामो समयदेखि रोकिएको हात्ती महोत्सव पर्यटक भित्र्याउने उद्देश्यले यस वर्ष देखि नयाँ ढंगले गर्न लागेको पाण्डेले बताए । विगतको भन्दा यस पटक संस्करणमा हात्ती महोत्सवलाई केही परिमार्जन गरिएको छ। हात्तीमैत्री गतिविधि मात्रै सञ्चालन गरिने आयोजकले जनाएको छ। यसपटक हात्तीलाई दुःख नहुने खालका गतिविधि गरिँदैछ। पहिला गरिँदै आएको छावाको फुटबल, पोलो, हात्ती दौड यसपटक हुँदैन। यसपटक हात्तीको वनभोज, हात्ती सुन्दरी प्रतियोगिता मात्रै गरिने भएको छ।

साथै डुंगा दौड, पर्यटकीय गोष्ठी र सेमिनार पनि हुने क्षेत्रीय होटल संघ सौराहाका महासचिव गुणराज थपलियाले बताए । ‘पशुअधिकारकर्मीले भनेका सुझावलाई मनन् गरेर हात्तीलाई दुःख नदिने खालका गतिविधि हुने थपलियाले बताए । हात्ती मात्रै होइन पर्यटन महोत्सवको स्वरूपमा परिमार्जन गरिएको पनि थपलियाले बताए । महोत्सव अवधिमा गोष्ठी र सेमिनारसहितको कार्यक्रम आयोजना गरिने थपलियको भनाइ छ ।

हात्ती महोत्सवको मुख्य आकर्षण भनेको हात्ती सुन्दरी प्रतियोगिता हो। हात्तीको सरसफाइ, स्वास्थ्य र सजावटको मूल्याङन हात्तीको सुन्दरीको उपाधि दिइन्छ। त्यस्तै हात्तीको वनभोज अर्को आकर्षण हुनेछ। हात्तीलाई बिदा दिएर एक दिन उसलाई मनपर्ने परिकार खुवाइन्छ। पशु चिकित्सक र प्राविधिकसहित सामूहिक वनभोज गराइन्छ। यसपटक ३० वटा निजीसहित ४० हात्ती सहभागी गराइँदैछ। युनाइटेड हात्ती सञ्चालन सहकारी संस्थाका अध्यक्ष दीपेन्द्र खतिवडाले बताए। कोभिड महामारीको कारण सन् २०१८ देखि हात्ती महोत्सव रोकिएको थियो। यसपटक हात्ती महोत्सवको स्थान पनि परिवर्तन गरिएको छ। यसअघि बाघमारा मध्यवर्ती सामुदायिक वनमा गरिँदै आएको हात्ती महोत्सव यसपटक चित्रसारीको चौरमा गर्न लागिएको हो। महोत्सवले बाह्यसँगै आन्तरिक पर्यटक आउने क्षेत्रीय होटल संघ सौराहा कोषाध्यक्ष माधव दुवाडीले बताए। महोत्सव सफल बनाउन यस पटक प्रचार–प्रसारका लागि ट्राभल एजेन्सीसहित विदेशी मिडियालाई पनि लक्षित गरिएको दुवाडीले बताए ।

मंसीर २२, चितवन । भरतपुर महानगरपालिकाले ‘भरतपुर मेट्रो प्लाजा’को ठेक्का सम्झौता तोडेको छ । ठेक्का लागेको दुई बर्ष नाघ्दा समेत काम सुरु नभएपछि भरतपुर महानगरपालिकाले आर्या विल्डर्स इन्जिनियरिङ प्रालिसंगको ठेक्का सम्झौता तोडेको हो । २०७८ साल भाद्र महिनामा हालका प्रधानमन्त्री पुष्पकमल दाहाल प्रचण्डले प्लाजाको शिलान्यास गरेका थिए । सार्वजनिक नीजि साझेदारी (पिपिपि) मोडल अन्तरगत तीन बर्षमा निर्माण गर्ने भनिएपनि ठेक्का पाएको कम्पनीले काम सुरु नगरेपछि बिहिबार बसेको कार्यपालिकाको बैठकले सम्झौता तोडेको प्रशासयिक अधिकृत नरेन्द्रकुमार रानाले जानकारी दिए । ‘पटक पटक पत्राचार गर्दा समेत निर्माण कम्पनीले काम सुरु नगरेपछि ठेक्का सम्झौता गरेको कम्पनी संग कार्यपालिको बैठकले ठेक्का तोड्ने निर्णय गरेको प्रशासकीय अधिकृत रानाले बताए ।

काम सुरु नगरेपछि महानगरपालिकाले निर्माण कम्पनीलाई एक महिना अघि फाइनासियल क्लोजर, वातावरण मुल्यांकन, वर्क सेडुल, पेश गर्न मंसिर २० गतेसम्मको म्याद दिइएको थियो । कम्पनीले समयमा पेश नगरेपछि ठेक्का रद्द गरिएको हो । ठेक्का रद्दसंगै निर्माण कम्पनीलाई महानगरपालिकाले कारबाही समेत गरेको छ । ‘एक करोड २० लाख धरौती रकम जफत हुने र कम्पनीले महानगरलाई ३५ लाख रुपैयाँ दिन बाँकी रकम पनि अशुल गरिने आर्थिक महाशाखा प्रमुख जगन्नाथ अर्यालले बताए ।

ठेक्का रद्द भएपछि नयाँ प्रकृयाबाट निर्माण गर्न सक्ने उनले बताए । ‘सार्वजनिक निजि साझेदारी कार्यक्रममा यही नै हुन्छ भन्ने छैन । पहिले ठेक्का खुलाउँदाको दोस्रो विलिङको कम्पनीलाई निर्माण गर्न दिन पनि सकिन्छ । नयाँ ठेक्का खुलाउन पनि सकिन्छ’, उनले भने, ‘अहिले के गर्ने भन्ने केही निर्णय भएको छैन ।’ दोस्रोमा भारतीय इनोभेटिभ कम्पनी थियो । रद्द गरेको निर्माण कम्पनी भने सम्पर्कमा आउन चाहेको छैन ।

आर्या विल्डर्स इन्जिनियरिङ प्रा।ली बिच महानगर र आर्यबीच २०७८ साउन २४ गते तीन बर्षमा सक्ने गरी सम्झौता भएको थियो । महानगरको भरतपुर–३ स्थित नारायणगढ लायन्सचोकमा रहेको साढे ११ कठ्ठा जग्गामा निजी क्षेत्रले करिब तीन अर्ब लगानी निर्माण हुन लागेको थियो ।
तीन वटा बेसमेण्ट पार्किङ सहितको १२ तले सुविधासम्पन्न भवन बनाउने सम्झौता छ । यहाँ चिल्ड्रेन पार्क, कन्फ्रेन्स हल, पाँचतारे होटल, सिनेमा हल, फुड कोर्ट लगायतका संरचनाहरु बन्ने बताइएको थियो ।

कम्पनीलाई तीन बर्षमा निर्माण सम्पन्न गर्ने र २७ बर्ष व्यवसाय सञ्चालन गर्न दिने गरी ३० बर्षका लागि दिइएको थियो । त्यसपछि सो सम्पती महानगरपालिकाको स्वामित्वमा आउने गरी सम्झौता गरिएको अर्यालले जानकारी दिए । ३० वर्षमा निर्माण कम्पनीले करिब ८५ करोड राजश्व दिने सम्झौता भएको उनले सुनाए ।

मेट्रो प्लाजाले रोजगारी तथा महानगरको आम्दानीसमेत बढाउन सघाउने लक्ष्य राखिएको थियो । पहिलो वर्ष ३० लाख, दोस्रो वर्ष ३५ लाख, तेस्रो वर्ष ४० लाख जग्गा भाडा लिने भनिएको थियो । चौथो वर्षदेखि महानगरले जग्गा भाडा र राजश्व सहित एक करोड ५३ लाख ७५ हजार रुपैयाँ लिने सम्झौतामा उल्लेख थियो ।