समाचार

जेठ २८, चितवन । मेघौली घटगाई नेचर गाइड संघको आयोजनामा चितवन राष्ट्रिय निकुञ्ज क्षेत्रमा एकदिने चरा अवलोकन कार्यक्रम सम्पन्न भएको छ । उक्त भ्रमणमा १२१ प्रजातिका ७५२ वटा चरा तथा नौ प्रजातिका ६८ वटा स्तनधारी जनावरहरुको अवलोकन गरिएको छ । कार्यक्रममा १० जना चराप्रेमी गाइडहरु र मेघौली चेकपोस्टका एक जना गेम स्काउटसमेत सहभागी थिए ।

कार्यक्रम मङ्गलबार बिहान ७ः१० बजे मेघौलीको सेराई लजनजिकैको राप्ती नदीकिनारबाट सुरू भएको थियो । समयको बचत गर्न पहिले जिप सफारीको सहारा लिइएको थियो । जिपले टाइगर टप्स जंगल लजनजिकै यात्रुहरुलाई झारेपछि गाइडहरुले पैदलयात्रा गर्दै सुरूङ खोला, ढाक्रे खोला, कान्छी खोला हुँदै प्राकृतिक नुन ९नुनिलो माटो० क्षेत्रको अवलोकन गरेका थिए । अवलोकनपछि जिपले सबैलाई दिउँसो ४ः३० बजे पुनः राप्ती नदीकिनारमा ल्याई छाडेको थियो ।

कार्यक्रमको नेतृत्व मेघौली घटगाई नेचर गाइडका अध्यक्ष मनीषकुमार लिम्बु र नेपाल पक्षी विद् संघका अध्यक्ष हठन चौधरीले गरेका थिए । चितवन राष्ट्रिय निकुञ्ज विभिन्न प्रकारका जनावर, चराचुरूङ्गीहरुको बासस्थान पनि हो । चितवन राष्ट्रिय निकुञ्ज दुर्लभ वन्यजन्तु एकसिङ्गे गैँडा, बाघ, भालु, घडियाल गोही, चरालगायतका लागि प्रख्यात छ ।

जेठ २७, चितवन । रत्ननगर उद्योग वाणिज्य संघमा श्रव्यदृश्य तथा फोटोग्राफी तालिम सुरू भएको छ । रत्ननगर नगरपालिकाको आर्थिक सहयोगमा संघले आयोजना गरेको उक्त कार्यक्रममा रत्ननगरका ३५ जना युवाहरुको सहभागिता रहेको छ । उद्घाटन कार्यक्रममा संघका अध्यक्ष शंकर गिरीले युवाहरुलाई सीप विकासमार्फत स्वरोजगार बनाउने र महिलाहरुलाई आत्मनिर्भर बनाउने उद्देश्यले चरणबद्धरुपमा तालिम सञ्चालन गरिएको बताए ।

संघले व्यावसायिक सुरक्षासँगै सामाजिक उत्तरदायित्व तथा सीप विकासका कार्यक्रमसमेत सञ्चालन गरिरहेको उनको भनाइ छ । नेपाल उद्योग वाणिज्य महासंघका केन्द्रीय सदस्य अनिलकृष्ण श्रेष्ठले श्रव्यदृश्य तथा फोटोग्राफीमा युवाहरुको आकर्षण बढ्दै गएको बताए । रत्ननगर उवासंघका पूर्वअध्यक्षद्वय ज्ञानबहादुर विसुराल र केशवनारायण श्रेष्ठले सूचना प्रविधिको युगमा श्रव्यदृश्य तथा फोटोग्राफी तालिम फलदायी हुने विश्वास व्यक्त गरे । संघका वरिष्ठ उपाध्यक्ष निराजन खनालले धन्यवाद मन्तव्य राखेको उक्त कार्यक्रम महासचिव उपेन्द्र शर्मा आचार्यले सञ्चालन गरेका थिए ।

६ दिनसम्म चल्ने उक्त तालिममा आभास टेलिभिजनका सञ्चालक कोमलचन्द्र भगत, फोटोग्राफर अंकित भगत र भिडियो ग्राफर सन्तोस सुनारले तालिम दिनेछन् ।

जेठ २२, चितवन । भरतपुर । आज बिहीबार विश्व वातावरण दिवस, चितवन जिल्लाभर वातावरण दिवसको अवसरमा विभिन्न कार्यक्रम आयोजना भएका छन् । चितवनका सातै पालिकाले सरसफाइ तथा वृक्षरोपणका कार्यक्रम आयोजना गरेका छन् । भरतपुर महानगरपालिकाको वातावरण तथा विपद् महाशाखाले वृक्षरोपण तथा सरसफाइ आयोजना गर्न गरेको छ । महानगरका विभिन्न वडाहरुले समेत सरसफाइ तथा वृक्षरोपण एवम् तालिमका आयोजनाहरु गरेका छन् । नेपाललगायत संसारभरि जुन ५ तारिखमा विश्व वातावरण दिवस मनाउन थालिएको हो । सन् १९७४ देखि विश्वमा वातावरण दिवस मनाउन थालिएको थियो । नेपालले भने सन् १९८० को दशकदेखि विश्व वातावरण दिवस मनाउन थालेको हो । मानवकै अज्ञानको कारणबाट नै वनविनाश, भूक्षय आदि हुने गरेको छ । गोन्द्राङ प्रहरी बिटदेखि जिल्ला प्रशासन कार्यालयसम्म भरतपुर महानगरले वृक्षरोपण तथा सरसफाइ गरेको छ ।

भरतपुर महानगर प्रमुख रेनु दाहालका अनुसार विश्व वातावरण दिवसमा बर्सेनि वातावरण संरक्षण तथा सरसफाइ कार्यक्रम हुँदै आएको छ । यसवर्ष पनि भरतपुर महानगर, वे गु्रप, सशस्त्र प्रहरी, नेपाल प्रहरी, नगर प्रहरी, टोल विकास संस्था, विद्यालय, आमा समूह, महिला समूह, वातावरण संरक्षणकर्मी लगायत सम्पूर्णको उपस्थितिमा भरतपुर–१२ को गोन्द्राङ प्रहरी बिटदेखि जिल्ला प्रशासन कार्यालयसम्म बृहत् सरसफाइ तथा वृक्षरोपण कार्यक्रम आयोजना गरिएको हो । वातावरण दिवसकै अवसर पारेर रत्ननगर नगरपालिका, माडी नगरपालिका, कालिका नगरपालिका, इच्छाकामना गाउँपालिका, खैरहनी नगरपालिका र राप्ती नगरपालिकाका वडाहरुले सरसफाइ तथा वृक्षरोपणका कार्यक्रम भएका छन् । भरतपुर महानगरपालिकाले विश्व वातावरण दिवसकै अवसर पारेर आफ्ना कार्यालयहरुमा सरसफाइ र वृक्षरोपण गर्न, विद्यालय, क्याम्पस तथा शैक्षिक परिसरमा सरसफाइ र वृक्षरोपण गर्न निर्देशन गरेको छ ।
नेपालले पनि वातावरण दिवस धेरै पहिलेदेखि मनाउने कार्य गर्दै आएको छ । दिवसका कार्यक्रमले जनतामा चेतनामूलक सन्देश फैलाउने गरेको पाइन्छ । दिवसलाई वन तथा वातावरण मन्त्रालयले विभिन्न कार्यक्रमहरु तय गरी मनाउने परिपाटी रहेको छ । यी कारणहरुले गर्दा वायु प्रदूषणमा कमी आई वातावरणमा भने सुधार आएको कुरा सम्बन्धित क्षेत्रका विज्ञहरुले औँल्याएका छन् । नेपालको संविधानले हामी सबै नेपालीका लागि स्वच्छ वातावरणमा बाँच्न पाउने मौलिक हक सुनिश्चित गरेको छ । नेपाल सरकारले सन्तुलित, दिगो र तीव्र आर्थिक सामाजिक विकासका लागि वातावरणमैत्री नीति तथा प्रविधिको उपयोग र प्रवद्र्धन गर्ने नीति लिएको छ ।