समाचार

भदौ २७, रत्ननगर ।
रत्ननगर । पूर्वी चितवनको रत्ननगरमा बिहीवार आयोजना गरिएको रक्तदान कार्यक्रममा ११५ युनिट रगत संकलन भएको छ । पेवा बचत तथा ऋण सहकारी संस्था लि।को १२औं वार्षिकोत्सवको अवसरमा भएको रक्तदान कार्यक्रममा ३५ जना महिला सहित ११५ जनाले रक्तदान गरेको संस्थाका अध्यक्ष नवराज तिमिल्सिनाले जानकारी दिए । अध्यक्ष तिमिल्सिनाले सहकारीले सामाजिक उत्तरदायित्व बहन गर्दै बार्षिकोत्सवको अबसर पारेर रक्तदान कार्यक्रम आयोजना गरिएको बताए । किराना तथा खाद्य व्यवसायी संघ रत्ननगरको सह आयोजनामा भएको रक्तदान कार्यक्रम वडा नं २ का वडाध्यक्ष राजेन्द्र प्रसाद घिमिरे उद्घाटन गरेका थिए । सो अबसरम उनले विरामीलाई रगत उपलब्धताको विषयमा गुनासोहरु आउने गरेको भन्दै यसमा रक्तसञ्चार केन्द्र सचेत हुनुपर्ने बताए । नागरिकले दिएको रगत विरामीले पाउन मुश्किलन हुने गरेको भन्दै उनले रगतका लागि भनसुन गर्नुपर्ने अबस्थाको अन्त्य हुनुपर्ने बताए ।नागरिकलाई सहजताका लागि नगरपालिकाले रक्तसञ्चार केन्द्र रत्ननगर रक्तसंकलन युनिट सञ्चालनमा ल्याएको उनले बताए । सहकारीका अध्यक्ष तिमिल्सिनाको अध्यक्षतामा भएको कार्यक्रममा जिल्ला समन्वय समिति चितवनका सदस्य सञ्जिव पौडेल, रत्ननगर वडा नं। १३ का वडा अध्यक्ष पोट वहादुर घिमिरे ९सुवास०, रत्ननगर उवा संघका अध्यक्ष शंकर गिरी लगायतले मन्तव्य राखेका थिए । सहकारीका सचिव बालकृष्ण दाहालले सञ्चालन गरेको कार्यक्रममा किराना तथा खाद्य व्यवसायी संघ रत्ननगरका अध्यक्ष शिवराज मैनालीले स्वागत मन्तव्य राखेका थिए । कार्यक्रमका संयोजक ठाकुर प्रसाद पन्तले कार्यक्रमको उद्देश्यको बारेमा प्रकास पारेका थिए । सो सहकारीले वार्षिकोत्सवको अवसरमा सेवा केन्द्र केन्द्रीत वित्तीय साक्षरता, शेयर सदस्य राहत तथा हेरचाह अन्तर्गत १ लाख बराबर दुर्घटना, जटिल रोगको उपचारको लागि १ लाख प्रदान गर्ने घोषणा, एसइई तथा प्लस २ मा उत्कृष्ट अंक ल्याउने शेयर सदस्यका छोराछोरीलाई पुरस्कृत कार्यक्रम आयोजना गरिएको सहकारीका व्यवस्थापक किशोर भट्टराईले जानकारी दिए । २०६९ साल भदौं २९ गते स्थापना भएको सो सहकारीमा ३ हजार ७४४ जना शेयर सदस्य र ५०४ जना बालबचत कर्ता रहेका छन् । कुल सम्पती ४६ करोड, ४८ लाख, ४४ हजार र शेयर पूजिँ ५ करोड ६८ लाख,४४ हजार रहेको सो सहकारीले ३४ करोड ४ लाख ऋण लगानी गरेको छ । ३३ करोड ८९ लाख बचत संकलन गरेको सो सहकारीको जगेडा कोषमा २ करोड ५२ लाख र संस्थागत पूँजी ३ करोड ५० लाख रहेको अध्यक्ष तिमिल्सिनाले जानकारी दिए । सो सहकारीले असल ऋणि तथा असल बचतकर्तालाई सम्मान तथा सुत्केरी राहत, नवजात शिशु स्याहार र ज्येष्ठ नागरिक सम्मान कार्यक्रमलाई प्राथमिकतामा राखेको छ ।

भदौ २७, रत्ननगर । रत्ननगर उद्योग बाणिज्य संघले बाग्लुङ उद्योग बाणिज्य संघको टोलीलाई स्वागत गर्दै व्यवसायिक विकासका बारेमा अन्तर्किया कार्यक्रम गरेको छ । भ्रमणमा निस्किएको बाग्लुङ उवासंघको टोलीलाई स्वागत गर्दै व्यवसाय प्रर्बद्धन र आर्थिक विकासको लागि सहकार्यको प्रस्ताब गरिएको छ ।

रत्ननगर उबासंघका अध्यक्ष शंकर गिरीले आर्थिक मन्दीका कारण कमजोर बन्दै गएको व्यवसायको विकास र स्थानीय स्तरका आर्थिक विकासको लागि दुई संघ बीचको सहकार्यको प्रस्ताब गरिएको बताए । उनले आर्थिक विकाससंगै व्यवसायिक हक हितका लागि साझा एजेण्डा सहित सहकार्य गर्नुपर्ने, व्यवसायिक संघ संगठनहरुले मात्र मेला महोत्सव गर्न र पर्यटन प्रवद्र्धन गर्नका लागि पर्यटन व्यवसायी बीच समन्वय गरी आकर्षक प्याकेज सहित छुटको व्यवस्था गरि व्यवसाय प्रवद्र्धन गर्नुपर्नेमा जोड दिए । बाग्लुङ उद्योग वाणिज्य संघका अध्यक्ष नरेश कँडेलले उद्योगी व्यवसायीहरुको राजश्व नीति, कर प्रणाली र पर्यटन प्रवद्र्धनलगायतका विषयमा व्यवसायिक एकता हुनुपर्नेमा जोड दिए ।

राज्यको कर प्रणाली र आर्थिक मन्दीको अबसरले व्यवसायी पलायन हुँदै गएको भन्दै यसमा राज्य गम्भिर हुनुपर्ने बेला आएको उनले बताए । नेपाल उद्योग वाणिज्य महासंघका केन्द्रिय सदस्य युवराज राजभण्डारी र नेपाल उद्योग बाणिज्य महासंघ गण्डकी प्रदेश सदस्य दयाराम पौडेलले आर्थिक अवस्था नाजुक भएको अवस्थामा व्यवसायीहरु बीच समन्वय आवश्यक रहेको भन्दै बैक व्याजदर, निजी क्षेत्रहरुको समस्याका लागि संस्थागत रुपमा सामधान खोज्नुपर्नेमा जोड दिएका थिए ।

रत्ननगर उद्योग वाणिज्य संघ र बाग्लुङ उद्योग वाणिज्य संघका व्यवसायीहरु विच एक आपसमा परिचयात्मक कार्यक्रम सहित स्वागत गरिएको थियो । उक्त कार्यक्रममा रत्ननगर उद्योग वाणिज्य संघका पदाधिकारी, पूर्व अध्यक्ष, कार्यसमिति सदस्य, बाग्लुङ उद्योग वाणिज्य संघका पदाधिकारी, कार्यसमिति सदस्यहरुको उपस्थितिमा अन्तर्किया कार्यक्रम आयोजना गरिएको थियो । रत्ननगर उद्योग वाणिज्य संघका बरिष्ठ उपाध्यक्ष निराजन खनालले धन्यवाद मन्तव्य राखेका थिए भने महासचिव उपेन्द्र शर्मा आचार्यले कार्यक्रम संचालन गरेका थिए ।

२६ भदौ, चितवन। यस वर्षको दशैंका लागि आगामी असोज १३ देखि सुकिला नोट साट्न पाइने भएको छ । नेपाल राष्ट्र बैंकको केन्द्रीय कार्यलय, प्रदेशस्थित कार्यालयका साथै अन्य बैंकहरूबाट समेत १३ असोजदेखि नोट साट्न सकिने राष्ट्र बैंकले जनाएको छ । यसपटक दशैंमा नयाँ नोटको साटो सुकिला नोट्न साट्ने व्यवस्था गर्न लागिएको राष्ट्र बैंकका सहायक प्रवक्ता डिल्लिराम पोखेरलले बताए । १३ असोजबाट राष्ट्र बैंकका साथै बैंकहरू मार्फत समेत सुकिला नोट साट्न सकिने व्यवस्था गर्न लागिएको हो । सुकिला नोट साट्न चाहानेले १८ हजार ५०० रुपैयाँसम्म पाउनेछन् । ५, १०, २०, ५० र १०० दरको एक सेटका दरले १८ हजार ५०० रुपैयाँ साट्न पाउनेछन् । नेपाल राष्ट्र बैंकले हरेक वर्ष चाडपर्व लक्षित गर्दै नयाँ नोट सटही गर्दै आएको थियो । यसवर्ष भने एकपटक प्रयोगमा आइसकेका नोट साट्न पाइने भएको हो । एकपटक प्रयोगमा आएका भएपनि सफा र नयाँ नोट जस्तै हुने राष्ट्र बैंकका सहायक प्रवक्ता पोखेरलले बताए । हरेक वर्ष नयाँ नोट बजारमा पठाउने र त्यसको प्रयोग नहुँदै पुनः नयाँ नोट बजारमा पठाउँदा साना दरको नयाँ नोट व्यवस्थापनमा समेत समस्या आएको भन्दै केन्द्रीय बैंकले यसपटक नयाँ नोट उपलब्ध नगराउने भएको हो ।