समाचार

असोज १३, दाङ । बुटवलको कालिका मानवज्ञान माध्यमिक विद्यालय कक्षा १० मा अध्ययनरत दिपेश भट्टराई र दीपिका भट्टराई जुम्ल्याहा दाजु बहिनीको निधन भएको छ । नेपाल एस्ट्रोनोमिकल सोसाइटीको आयोजनमा भएको नेसनल एस्ट्रोनोमी ओलम्पियार २०२४ मा भाग लिएका दाजु बहिनीपहिलो चरणमा छनोट भएर दोस्रो चरणको लागि बंगलादेश पुग्नुपर्ने थियो । बंगलादेशमा आयोजना हुने उक्त कन्फ्रेन्समा ३२ राष्ट्रका विद्यार्थीहरू सहभागी हुँदै थिए । कार्यक्रममा सहभागी हुन शुक्रबार काठमाडौं जान बुटवलबाट काठमाडौंका लागि छुटेको लु १ ज ४५७८ नम्बरको माइक्रो को टिकट काटेर हिंडेका उनीहरुको यो गाडी काठमाडौं पुगेन । धादिङको झ्याप्ले खोलाको पहिरोमा पुरिन पुग्यो । गाडी पुरिँदा जुम्ल्याहा दाजु बहिनी दिपेश–दीपिका आमा सीता भट्टराईसँगै अस्ताए । उनीहरू लगायत गाडी चालक सहित १४ जनाले सोही पहिरोमा ज्यान गुमाए ।

 गुल्मीका ६ जनाको मृत्यु
झ्याप्लेखोलमा माईक्रोबस पहिरोले पुरिदा मृत्यु भएका १४ जना मध्ये ६ जना गुल्मीका परेका छन् । मदाने गाउँपालिकाका ६ पुर्कोटदहका ३ जना र गुल्मीदरबार गाउँपालिका( ७ लामडाँडाका एकै परिबारका ३ जना सहित ६ जनाको मृत्यु भएको जिल्ला प्रहरी कार्यालय गुल्मीले जनाएको छ ।

जिल्ला प्रहरी कार्यालय गुल्मीका प्रबक्ता डिएसपी शंंकर पोखरेलका अनुसार पुर्कोटदका ३४ वर्षीय प्रकाश कुँवर, उनकी श्रीमती अनु कुँवर र बहिनी सिर्जना कुँवरको मृत्यु भएको छ । कोरियाको रोजगारबाट फर्किएका उनको एक महिना अघि मात्र विवाह भएको थियो । गुल्मीदरबार ७ लामडाँडाका पनि एकै परिबारका तिन जनाको मृत्यु भएको वडाका वडाध्यक्ष शालिकराम टण्डनले जानकारी दिए । उनका अनुसार त्यस गाउँका ६३ वर्षीय जुद्धबहादर रायमाझी, उनकी बुहारी ३१ वर्षीय प्रमिता भुसाल रायमाझी र उनका ३ वर्षीय छोरा पिसव रायामाझीको मृत्यु भएको छ ।

१३ असोज, चितवन। नेपाली सेनाको हेलिकप्टरले काभ्रे जिल्लाको बीपी राजमार्गमा फसेकाहरूको उद्धार सुरु गरेको छ । जिल्ला प्रहरी कार्यालय काभ्रेका अनुसार अहिलेसम्म रोशी गाउँपालिकाको मंगलटार क्षेत्रबाट ८१ जनाको उद्धार गरेर धुलिखेल ल्याएको छ । बीपी राजमार्गको नेपालथोक–धुलिखेल खण्डमा १ हजारभन्दा बढी नागरिक बसेको र उद्धार गर्नुपर्ने अवस्था रहेकोजिल्ला प्रहरी कार्यालय काभ्रेका प्रहरी नायब उपरीक्षक दिनेशबहादुर कुँवरले बताउनुभयो । सुरुमा नेपाली सेनाको हेलिकप्टर मार्फत मंगलटारमा खाद्यान्न पुर्‍याएर राजमार्गमा फसेकाहरूको उद्धार सुरु भएको कुंवरको भनाइ छ । उद्धार गरिएकामध्ये १३ जना बिरामी समेत छन् । जिल्लामा ठूलो मानवयि र भौतिक संरचना क्षति भए पनि यकिन विवरण संकलन हुँदै गरेको कुवंरले बताउनु बताउनु भयो । विभिन्न स्थानीय तहसँग समन्वय गर्ने प्रयास भए पनि विद्युत् र दूरसञ्चार सेवा समेत अवरोध हुँदा समस्या भएको छ । जिल्लाका प्रमुख दुई राजमार्ग बीपी र अरनिको सहित अधिकांश स्थानीय तह जोड्न सडक समेत अवरुद्ध छ ।

असोज १३, चितवन । शुक्रबार रातीबाट त्रसित बनाउँदै लगेको सप्तकोशी नदीमा पानीको बहाव कम हुँदै गएको छ । तथापि, अहिलेपनि नदीमा पानी बहाव अत्याधिक उच्च खतरामा रहेको कोशी ब्यारेजले जनाएको छ । चतरास्थित जलमापन केन्द्रका अनुसार कोशीमा दिउँसो गरिएको मापन अनुसार पानीको बहाव ५ लाख ८२ हजार क्यूसेकमा आएको छ । यसअघि बिहान पानीको बहाव ६ बजे ६ लाख ५५ हजार ५ क्यूसेक रहेकोमा पछिल्लो केही घण्टायता बहावमा कमी आउँदै गएको केन्द्रले जनाएको छ ।

नदीमा पानीको बहाव कम हुँदै गएपनि अझै खतराबाट मुक्त भइसकेको अवस्था नरहेको केन्द्रले जनाएको छ । यद्यपि, अझैपनि कोशी ब्यारेजबाट यातायात सूचारु गर्न केही समय लाग्ने सुनसरी प्रशासनले जनाएको छ ।