भदौ १७, भरतपुर ।भरतपुर महानगरपालिका वडा नं. १ पोखरा बसपार्कमा आज सोमबार एक बालिका फेला परेकी छन् । दिउंसो १२ः ०० बजेको समयमा नामथर वतन बताउन नसक्ने अन्दाजी वर्ष २ की बालिका फेला परेको जिल्ला प्रहरी कार्यालय चितवनले जानकारी दिएको छ । बालिका वेवारिसे अवस्थामा फेला पारेको हुँदा चिन्नु हुने जो कोही ले नजिकैको प्रहरी कार्यालय तथा यस कार्यालयको सम्पर्क नं. ९८५५०९०१३३ र ९८५५०९०४२२ सम्पर्क गरी जानकारी गराउन चितवन प्रहरी कार्यालयले अनुरोध गरेको छ ।
भदौ १६, चितवन । चितवनको माडी १, सिखारीपुर गाउँमा चट्याङ लागेर एक महिलाको ज्यान गएको छ । आइतबार बिहान करीब ९ बजे परेको चट्याङ लागी दयाराम महतोको श्रीमती, बर्ष ५० की सरस्वती महतोको मृत्यु भएको हो । बिहानपख भारी बर्षा भइरहेको समयमा गोठमा रहेको भैंसी सार्न घरबाहिर निक्लिँदा उहाँमाथि चट्याङ परेको थियो ।
चट्याङका कारण महतोको कपाल, ढाड, खुट्टा र शरीरका अन्य भागहरु जलेको प्रहरीले जानकारी दिएको छ ।
भरतपुर,भदौ १५ ।
भरतपुर महानगरपालिका–१२ का वडाध्यक्ष लेखराज पन्तले जन्मदिनका अवसरमा रु १५ लाख बढी रकम समाजसेवामा खर्च गर्नुभएको छ । उहाँले वडाध्यक्ष भएबापत पाउने सबै सेवासुविधाको रकम सामाजिक काममा खर्च गर्नुभएको हो । जनप्रतिनिधि अनियमिततामा मुछिएका घटना बेलाबेलामा सुन्ने गरिएकामा पन्तले भने आफ्नो तलबभत्ता समेत समाजसेवामा खर्च गर्नुभएको छ । आज आफ्नो ६४औँ जन्मदिनका अवसरमा एक कार्यक्रम आयोजना गरी वडाध्यक्ष पन्तले रु १५ लाख बढीको सहयोग गर्नुभयो । “एक वर्षमा करिब रु पाँच लाख रकम आउँछ”, पन्तले भन्नुभयो, “त्यो सबै सामाजिक काममा खर्चिएको छु ।” उहाँले वडाका विपन्न, बालबालिका र वृद्धवृद्धालाई सहयोग गर्दै आएको बताउनुभयो । रकम हस्तान्तरण कार्यक्रममा भरतपुर महानगरपालिकाका प्रमुख रेनु दाहालले अध्यक्ष पन्त असल जनप्रतिनिधिको रुपमा परिचित रहेको बताउनुभयो । “उहाँ उदाहरणीय जनप्रतिनिधि बन्नुभएको छ”, उहाँले भन्नुभयो, “पन्त सधैं सेवा भाव र सकरात्मक सोचका धनी हुनुहुन्छ ।” नगरप्रमख दाहालले पन्तले स्वच्छ जनप्रतिनिधिको रुपमा काम गर्नुभएको भन्दै यसलाई निरन्तरता दिन अनुरोध गर्नुभयो । प्रमुख दाहालले जन्मदिन तथा चाडपर्व खर्चिलो र भड्किलो भन्दापनि संस्कृतिको जगेर्ना गर्ने उद्देश्यले सेवा भावका साथ मनाउन सबैलाई आह्वान गर्नुभयो । कार्यक्रममा पूर्वमन्त्री विजय सुवेदीले धन मात्र भएर नहुने भन्दै पन्तसँग धन र मन दुवै भएकाले सामाजिक काममा सक्रिय भएर लागिरअनुभएको उल्लेख गर्नुभयो । उहाँले सबै जनप्रतिनिधिले आफ्नो क्षमता अनुसार सामाजिक सेवाका क्षेत्रमा काम गर्नुपर्नेमा जोड दिनुभयो ।
पन्तले सहयोग रकम र सामग्री विभिन्न सामाजिक सङ्घसंस्था र व्यक्तिलाई हस्तान्तरण गर्नुभयो । पन्तले भरतपुर–११ को नयाँ किरण कमल कुसुम माध्यमिक विद्यालयलाई रु एक लाख ११ हजार, शिव पञ्चायम मन्दिर भरतपुर–१२ लाई रु एक लाख ११ हजार, देवघाट रोटरी करुणालयलाई रु तीन लाख ११ हजार, धनेश्वर शिवालय मन्दिर धनगढालाई रु एक लाख १३ हजार, प्रकाश कार्कीको इन्सुरेन्सलाई रु एक लाख पाँच हजार, राधाकृष्ण मन्दिर भरतपुर–१२ लाई रु एक लाख ११ हजार र पुण्यश्वर शिवालय मन्दिर भरतपुर–१२ लाई रु ५१ हजार एक सय ११ सहयोग गर्नुभएको छ । साथै उहाँले वडाका विभिन्न आमा समूहलाई पनि सहयोग गर्नुभएको छ ।
बागलुङ जिल्लाको मूलपानी जन्मनुभएका पन्त चितवनका एकदर्जन बढी सामाजिक सङ्घसंस्थामा आवद्ध हुनुहुन्छ । उहाँले वडा कार्यालयमा पनि दानपेटीका राखेर सङ्कलन भएको रकमबाट नियमित रुपमा विपन्नलाई सहयोग गर्दै आउनुभएको छ । कार्यक्रममा भरतपुर–१० का वडाध्यक्ष परमेश्वर खनाल, कालिका टोल विकास संस्थाका अध्यक्ष मुक्ति अधिकारी, पोखरेली टोल आमा समूहका अध्यक्ष शोभा पण्डित, महिला अधिकारकर्मी मीना खरेललगायतको सहभागिता थियो । रासस
