समाचार

पौष २३, भरतपुर– शहीदचोकमा प्रधान कार्यालय रहेको हंस बहुउद्देश्यीय सहकारी संस्था लिमिटेडले नयाँ सेयर सदस्यहरुका लागि एक दिने सहकारी शिक्षा अभिमुखिकरण कार्यक्रम भरतपुर १६, विजयनगरमा सोमबार सम्पन्न गरेको छ ।
कार्यक्रममा प्रमुख अतिथिको रुपमा बोल्दै संस्थाकी सचिव शरद शर्मा पौडेलले सदस्यहरुको आर्थिक, सामजिक, शैक्षिक समस्या समाधान गर्न सहकारी स्थापना भएको बताईन । सहकारी संस्था सञ्चालक समितिको मात्र नभई सदस्यहरुले पनि आफू मालिक हो भन्ने कुरा विर्सन नहुनेमा उनले जोड दिईन। संस्थाले सदस्यहरुको हितसँगै सामाजिक उत्तरदायित्व बहन गर्दै विभिन्न सामजिक क्रियाकलाप पनि गर्दै आएको बताइन।  सहकारी शिक्षाको कमी हुँदा सहकारी अघि बढ्न नसक्ने भएकोले आफ्ना सदस्यलाई सहकारी सम्बन्धी प्रर्याप्त ज्ञान हुन आवश्यक रहेको र पछिल्लो पटक केही सहकारीमा वेथिति हुँदा सहकारीको बदनाम भईरहेको उल्लेख गर्दै उनले सहकारीका सञ्चालकहरुको बारेमा बुझेर मात्र सहकारीमा आवद्ध हुन आग्रह गरिन।
सहकारीका आधारभूत ज्ञान, सहकारीले प्रदान गर्ने सेवा, बचत र ऋण कारोबार, सहकारी नीति, नियम, कानून लगायतका विषयमा जानकारी दिने उद्धेश्यले सहकारी शिक्षा कार्यक्रम गरिएको संस्थाका शिक्षा उपसमिति संयोजक देशबन्धु अधिकारीले जानकारी दिए । संस्थाको स्थापना र उद्देश्यबारे जानकारी गराउँदै संयोजक अधिकारीले सहकारीले सदस्यहरुको हितमा समान ढंगले सेवा प्रदान गरिरहेको स्पष्ट परेका थिए।
उक्त कार्यक्रमको सहजीकरण हंस बहुउद्देश्यीय सहकारी संस्था लिमिटेडका प्रबन्धक नारायण प्रसाद सापकोटाले  गरेका थिए। संस्थाको विजयनगर सेवाकेन्द्र अन्तर्गतका नयाँ सदस्यहरुलाई लक्षित गरी आयोजना गरिएको कार्यक्रममा संस्थाका संचालक सदस्य एवं सेवाकेन्द्र उपसमिति संयोजक ध्रुबकुमार ओझा, सदस्यहरु शंकर अधिकारी, इश्वरी देवी घिमिरे, रमा ढुंगाना, सेवाकेन्द्र प्रमुख श्रीकृष्ण श्रेष्ठ लगायतको उपस्थिति रहेको थियो। 

पौष २३, रत्ननगर । रत्ननगर नगरपालिका–१३ को पञ्चकन्या माध्यमिक विद्यालयमा अध्ययनरत बिपन्न र जेहन्दार विद्यार्थीलाई जाडोको पोशाक सहयोग भएको छ । पञ्चकन्या मावि भूतपूर्व विद्यार्थी समाजले झण्डै एक लाख रुपैयाँ बराबरको जाडोको पोशाक सहयोग गरेको हो । पोशाक बितरण कार्यक्रमको अवसरमा विद्यालयमा तीनवटा अक्षयकोष स्थापना पनि भएको छ । जसमा विद्यालयका संस्थापक अध्यक्ष स्वर्गीय ठाकुरप्रसाद तिवारीको सम्झनामा उनकी धर्मपत्नी नारायणी तिवारीले ५५ हजार ५५५ रुपैयाँ, पूर्वविद्यार्थी यशोधा देवकोटाले आफ्नी छोरीको जन्मदिनमा ५० हजार रुपैयाँ र पूर्वप्रधानाध्यापक मेघनाथ दूवाडीको नाममा ५० हजार १५१ रुपैयाँको अक्षयकोष स्थापना भएका छन् । पूर्वविद्यार्थी समाजकी अध्यक्ष सम्झना भट्टले विद्यालयमा विद्यार्थीहरुको शैक्षिक उन्ननयनका लागि सहयोगलाई निरन्तरता दिइरहने प्रतिबद्धता व्यक्त गरेकी छन् । अहिले जाडो मौसमको लागि विद्यार्थीहरुलाई ट्रयाक सुट सहयोग गरेको उनले बताइन्। आगामी दिनमा पनि समाजको सहयोग निरन्तर रहने उनको भनाइ छ ।’

पौष २३, भरतपुर । भरतपुरको मिलन चोक नजिकै पुलमुनि बोरामा पोको पारेर फालेको अवस्थामा भेटिएका पुरूष र महिलालाई महिलाका पतिले मारेको खुलेको छ। नेपाल प्रहरीको केन्द्रीय अनुसन्धान ब्युरोको अनुसार भारतका विहार सुगांव डीह, सुगौली, पूर्वी चम्पारणका ३३ वर्षीय अखिलेश भगतले ती पुरूष र महिलाको हत्या गरेको खुलेको हो। मृतक र हत्यामा संलग्न सबै भारतीय नागरिक हुन्। उनीहरू भारतको विहार राज्यका हुन्।

ब्युरोका प्रवक्ता एसपी नवराज अधिकारीका अनुसार मृतकहरू भारतको मोतिहारी, फूलबारीया, सुगौलीका १९ वर्षीय ऋषभकुमार कुशवाहा र विहार सुगांव डीह, सुगौली, पूर्वी चम्पारणकी ३० वर्षीया अस्मिता भन्ने सन्जु देवी हुन्। मंसिर २ गते उनीहरूको हत्या गरेको अनुसन्धानबाट खुलेको हो। प्रहरीले मंसिर ६ गते राति पौने १ बजेतिर मिलनचोकस्थित पुल मुनि केरुङ्गा घोलमा शंकास्पद रूपमा रहेका २ वटा शव फेला पारेको थियो । मुखमा टेप लगाइएको, घाँटीमा सलजस्तो रातो कपडाले कसेको, दुबै शवको दुबै हात, खुट्टा क्रस गरी डोरीले बाँधी सोही डोरीले घाँटीमा समेत बाँधी डल्लो बनाई जुटको बोराभित्र कोचिएको थियो। प्रवक्ता अधिकारीले मंसिर २ गते ऋषभ र सन्जुलाई भगतले उनीहरू बस्ने गरेको भाडाको कोठामा नै कर्तव्य गरी एउटा शवलाई ३ गते बिहान पौने १ बजे तिर र अर्कोलाई सवा १ बजेतिर साइकलमा लगेर लुकाएको प्रमाण फेला परेको बताए । भगतले शव लगेको दृष्य प्रहरीले सिसिटिभी फुटेजमा फेला पारेको उनले बताए। मृतकहरू नेपालमा तरकारी तथा फलफूल व्यापारका लागि पटक–पटक आउने गरेका थिए। उनीहरू अन्तिम पटक गत दसैंपछि नेपाल आएर चितवनको मिलनचोक स्थित मृतक पुरूषको काका नाता पर्नेको कोठा नजिकै कोठा लिएर बसेका थिए। अधिकारीले आफ्नी श्रीमतीसँग ऋषभको सम्बन्ध रहेको थाहा पाएपछि अखिलेश र ऋषभको बेला बेलामा झगडा हुने गरेको भेटिएको बताए । त्यही कारण अखिलेशले उनीहरूको हत्या गरेको हुनसक्ने अधिकारी बताउँछन्। दुई जनाको हत्या गरी फरार भएका अखिलेश अहिले भारतको सुगौलीस्थित प्रहरी हिरासतमा छन्। भारतीय प्रहरीसँग समन्वय गरी खोजतलास गर्दा उनीमाथि भारतको प्रहरी थाना सुगौलीमा अपहरण तथा व्यक्ति बेपत्ता सम्बन्धी एफआइआर दर्ता भई पुस १६ गते प्रहरीले पक्राउ गरेको थियो । उनलाई हाल भारतको केन्द्रीय कारागार मोतिहारीमा राखिएको छ। नेपाल प्रहरीले भारतीय प्रहरीको समन्वयमा उनलाई अनुसन्धान तथा सोधपुछ गर्दा उनले चितवनमा ऋषभकुमार कुशवाह र आफ्नी श्रीमतीको हत्या गरेर भागेको स्वीकार गरेको सिआइबीका प्रवक्ता अधिकारीले बताए।
नेपाल प्रहरीको केन्द्रीय अनुसन्धान ब्युरो, बागमती प्रदेश प्रहरी कार्यालय हेटौंडा र जिल्ला प्रहरी कार्यालय चितवनको संयुक्त टोलीले घटनास्थलको सूक्ष्म अध्ययन, प्राविधिक विश्लेषण, संकलित सूचना समेतको विश्लेषण गरी अनुसन्धानलाई निष्कर्षमा पुर्‍याएको उनले बताए।