समाचार

पौष २१, चितवन ।

भरतपुर महानगरपालिका प्रमुख रेनु दाहालले विकासको पहिलो आधार सडक भएकाले सडकलाई प्राथामिकता दिएको बताउनुभएको छ । शनिबार नेपाल रेडक्रस सोसाईटी गीतानगर उपशाखाको नवनिर्मित भवनको उद्घाटन गर्दै प्रमुख दाहालले सडक पूर्वाधार निर्माण भएपछि मात्रै जनताको जीवनस्तर सुधार गर्न सडक पूर्वाधारको महत्वपूर्ण भूमिका हुने उल्लेख गर्नुभयो । प्रमुख दाहालले भरतपुरको विकास यतिकै नभएको बताउदै उहाँले जनप्रतिनिधिको सक्रिय पहल र आमजनताको इच्छा चाहानाले मात्र भरतपुरको विकास सम्भव भएको प्रष्ट पार्नुभयो । बजेट सजिलै आउँदैन,उहाँले भन्नुभयो,‘एक पटक गएर हुदैन। पटक पटकको पहल, सक्रियाताले बजेट आउँछ । हिजोको दिनमा १० लाखको बजेट ल्याउन गाँउबाट डेलिगेशन जानुपर्ने अवस्था थियो।’ प्रमुख दाहालले नेपाल रेडक्रस सोसाईटी गीतानगर उपशाखाले मानविय, शिक्षा तथा स्वास्थ्य क्षेत्रमा पुराएको अतुल्नीय योगदानको उच्च कदर गर्नुभयो । उहाँले गीतानगर उपशाखाको भवन निर्माणका लागि जग्गादाता जयलाल पौडेलले पुराउनु भएको योगदान र भवन निर्माण गर्ने स्थानीय दानवीरलाई धन्यवाद व्यक्त गर्नुभयो ।

भरतपुर महानगरपालिका, स्थानीय चन्दाताको सहयोगमा रु १४ लाख ८३ हजार भवन निर्माण भएको हो ।

प्रमुख दाहालले भरतपुरको भगिनी सम्बन्ध स्थापना भएको जापनको यकोसुका सहरबाट ५÷६ वटा एम्बुलेन्स सहयोग आउन लागेको र एक थान गीतानगर उपशाखालाई प्रदान गरिने बताउनुभयो । रेडक्रसको जिल्ला भवन निर्माण गर्न महानगरबाट सहयोग भएको र गैर अवासीय नेपाली सघ एनआरएनएबाट सहयोग भएको रक्त सञ्चार एम्बुलेन्स पनि हस्तान्तरण गरिएको बताउनुभयो ।

कार्यक्रममा रेडक्रसको भवन निर्माण गर्न सहयोग पुराउने व्यक्तित्वहरुलाई सम्मान गरिएको थियो । कार्यक्रममा उपप्रमुख चित्रसेन अधिकारी, वडा अध्यक्ष हरिकृष्ण श्रेष्ठ, राजेन्द्र साखाीलगायतको उपस्थिति रहेको थियो।

––––

पौष २०, चितवन । पूर्वी चितवनको रत्ननगर नगरपालिका स्थित टिकौलीचौरमा यही पौष २६ गतेबाट सुरु हुने रत्ननगर महोत्सव २०८० को तयारी अन्तिम चरणमा पुगेको छ । रत्ननगर उद्योग बाणिज्य संघले आयोजना गरेको सो महोत्सवको स्टल निर्माण, प्रचारप्रसार र आन्तरिक व्यवस्थापनको काम अन्तिम चरणमा पुगेको संघका अध्यक्ष तथा मुल व्यवस्थापन समितिका संयोजक शंकर गिरीले जानकारी दिए । महोत्सवको समग्र व्यवस्थापनको काम करिब ९० प्रतिशत सकिएको उनले जानकारी दिए । महोत्सवको प्रधानमन्त्री पुषपकमल दाहाल प्रचण्डले उद्घाटन गर्ने छन् ।

यस बर्ष कृषि उत्पादन र पर्यटन विकासलाई प्राथमिकता दिइएको छ । रत्ननगर नगरपालिका संरक्षक रहेको सो महोत्सवको १२औं संस्करण पौष २६ गते उद्घाटन भएर माघ ८ गते सम्म चल्ने छ । विगत दुई दशकदेखि प्रत्येक दुई दुई वर्षमा आयोजना हुने यस महोत्सवले समग्र जिल्ला तथा विशेष गरी पूर्वी चितवन र रत्ननगरको कृषि, पर्यटन, शिक्षा, स्वास्थ्य, विज्ञान, प्रविधि, कला, संस्कृति, व्यापार, व्यवसाय र अन्य आर्थिक महत्वका क्षेत्रहरुको आधुनिकीकरण र वैज्ञानिक उत्पादनलाई जोड दिइएको संघका अध्यक्ष तथा महोत्सव मुल व्यवस्थापन समितिका संयोजक शंकर गिरीले जानकारी दिए । महोत्सवमा उद्योग, व्यापार, कृषि, पर्यटन, स्थानीय कला र संस्कृति सहित राष्ट्रिय, अन्तराष्ट्रिय तथा बहुराष्ट्रिय गरि करिब ४५० स्टलहरु रहने छन् । यस पटकको महोत्सवमा तीन लाख भन्दा बढी दर्शकहरुले अवलोकन गर्ने र करीब २५ करोडभन्दा बढिको कारोबार हुने अपेक्षा र अनुमान गरिएको छ ।

चितवनवासीहरुले गौरव र पर्वको रुपमा मान्दै आएको रत्ननगर महोत्सव व्यापार र व्यवसायको जगतमा उत्कृष्ट र अनुपम नमुनाको रुपमा रहेको छ । चितवन कृषि उत्पादनको हिसाबले अब्बल जिल्लाको रुपमा सावित हुँदै आएको छ । महोत्सवमा कृषि उत्पादनलाई जोड दिइएको संघका उपाध्यक्ष हरि अधिकारीले जानकारी दिए । महोत्सव परिसरमा बृहत व्यवसायिक कृषि प्रर्दशनी तथा मकैवाली विशेषमा मकैका नयां प्रविधि, मकैका परिकार, ताजा तरकारी, थोपा सिंचाई प्रविधि, केरा, माछा, च्याउ, दुग्धजन्य पदार्थ, पोल्ट्री, महसंगै चितवनमा प्रबल सम्भावना भएका कृषि तथा पशुजन्य व्यवसायलाई विशेष जोड दिएको संघका बरिष्ट उपाध्यक्ष निराजन खनालले जानकारी दिए ।

महोत्सव अवधिभर कृषिसंग सम्बन्धित, पूर्वी चितवनमा बढ्दो सवारी दुर्घटनालाई न्यूनिकरण गर्न सरोकारवालसंग जिल्ला ट्राफिक र प्रदेश ट्राफिक संग समन्वय गरी दुर्घटना न्यूनिकरण सम्वन्धी अन्तरक्रिया कार्यक्रम, चितवनको आर्थिक विकास र उन्नयनका लागि विशेष आर्थिक क्षेत्रको स्थापना र चुनौती विषयक गोष्ठी सञ्चालन गरिने संघका महासचिव उपेन्द्रशर्मा आचार्यले जानकारी दिए । महोत्सवमा आर्थिक मन्दीका कारण धरासायी बन्दै गएका व्यवसायीहरुको सुुरक्षाका लागि छलफल र बहस गरी सरकारलाई नीतिगत सुधारका लागि सुझाब पेश गरिने छ । रत्ननगर नगरपालिका, सौराहाका पर्यटन व्यवसायी तथा संघको त्रिपक्षीय सहकार्यमा नगर भित्रका धार्मिक तथा अन्य पर्यटकीय स्थलहरुको अबलोकनको व्यवस्था मिलाईएको छ ।

विगतमा जस्तै महोत्सव अन्तर्गत पौष २९ देखि ४ गते सम्म ५ दिन रत्ननगरको सौराहाचोक वसपार्कमा विभिन्न जनजातीहरुको विशेष खाना, उपभोक्ताहरुलाई गुणस्तरीय उत्पादन उपभोगका लागि विशेष परिकार सहित पाँचौं रत्ननगर सांस्कृतिक खाना महोत्सव आयोजना गरिएको संघका पूर्व अध्यक्ष तथा खाना महोत्सवका संयोजक ज्ञानबहादुर विसुरालले जानकारी दिए । रत्ननगर महोत्सवमा प्रवेशका लागि अबलोकनकर्ताले खरिद गरेको टिकटबाट मौलाकालिका केबुलकारमा ५० प्रतिशत छुट दिने व्यवस्था मिलाइएको छ । महोत्सवको टिकट लिएर जानेलाई माघ १५ गते सम्म सो सुविधा प्राप्त गर्न सक्ने संघले जनाएको छ ।

पौष २०, चितवन ।
उद्योग वाणिज्य संघ चितवनको अध्यक्ष पदका उम्मेदवार सुमनकुमार श्रेष्ठले चितवनका सबै व्यवसायीको साझा समस्या र चुनौतीलाई संस्थागतरूपमा समाधान गर्ने बताएका छन्। बुबाले ५२ वर्षअघि थालेको व्यवसायलाई पछ्याउँदै यहाँसम्म आइपुगेको बताउँदै उनले भने, ‘व्यवसायीको साझा समस्या र चुनौतीलाई संस्थागत समाधान गर्ने उद्देश्यका साथ म योग्य उमेदवारको रूपमा उभिएको छु।’

उद्योग वाणिज्य संघमा विगत १८ वर्षदेखि विभिन्न पद तथा मर्यादामा बसेर काम गरेको पर्याप्त अनुभवका आधारमा हरेक व्यवसायीको समस्यामा जुनसुकै अवस्थामा पनि उभिएको उनले बताए। ‘व्यावसायिक जीवनमा इमान्दार गुमाएको छैन। १८ वर्षसम्म निरन्तर संघको विभिन्न पदमा रहेर कुशलतापूर्वक काम गरेको छु,’ उनले भने।

संघमार्फत व्यवसायिक हित र प्रवद्र्धनको लागि स्थानीय सरकारसँग पैदलयात्रीका लागि फुटपाथ खाली राख्नुपर्ने, फुटपाथ व्यवसायीलाई विकल्प दिएर व्यवस्थापन गर्ने, व्यवसाय कर घटाउन स्थानीय तहसँग पहल गर्नेलगायतका काम गर्ने उनको भनाइ छ। त्यसबाहेक विज्ञापन करलाई पूर्णरूपमा खारेज गर्न सम्बन्धित निकायसँग आवश्यक पहल गर्ने उनको भनाइ छ।

जिल्लाभित्र चल्ने सार्वजनिक सवारीसाधनलाई बजारसम्म आउन दिने व्यवस्था मिलाउन स्थानीय प्रशासनसँग समन्वय गर्ने उनले प्रतिवद्धता जनाएका छन्। बजार क्षेत्रको विकास निर्माणमा उद्योग वाणिज्य संघसँग समन्वय गरेर काम गर्न सम्बन्धित क्षेत्रसँग आवश्यक पहल गरिने उनले बताए।

राजस्व कार्यालयसँग आवश्यक छलफल गरी व्यवसायीमैत्री करको लागि वातावरण सिर्जना गर्ने, समयमै कर बुझाउने करदातालाई सम्मान गर्ने वतावरण मिलाउने विषयमा पनि आफू सधैँ सकारात्मक रहेको उनले बताए। उनले राजस्व कार्यालय र संघका सदस्यहरुबीच बेलाबेलामा छलफल चलाउने योजना समेत अघि सारेका छन्।

‘संघको संस्थागत सुदृढीकरण पनि आजको आवश्यकता हो,’ उनले भने, ‘त्यसैले संघलाई अझ व्यवसायीमैत्री बनाउनको लागि सचिवालयलाई थप बलियो बनाउने मेरो लक्ष्य छ।’ सातवटा पालिका रहेको चितवन जिल्लामा कालिका नगरपालिकामा हालसम्म संघको इकाइ गठन हुन नसकेको भन्दै यथाशीघ्र कालिका उद्योग वाणिज्य संघको इकाइ गठन गर्ने तयारी रहेको उनको भनाइ छ।