समाचार

पौष १४, भरतपुर । पवित्रा ढकाल ।
बिहानी टोल विकास संस्था भरतपुर ९ को १५ साधारण सभा शनिबार सम्पन्न भएको छ । बिहानी टोल विकास संस्थाका अध्यक्ष चिनी बहादुर बोहोराको अध्यक्षतामा सम्पन्न कार्यक्रममा भरतपुर महानगरपालिका वडा नं. ९ का वडा अध्यक्ष यमलाल कंडेल प्रमुख अतिथी रहनु भएको थियो । कार्यक्रममा बोल्दै प्रमुुख अतिथी कंडेलले वडा नं. को भौतिक, आर्थिक, सामाजिक विकासमा प्रतिबद्ध रहेको बताउनु भएको छ । वडा भित्र रहेको १८ वटा टोल विकास संस्था बिगत ४ वर्ष देखि निरन्तर एउटै समयमा सम्पुर्ण टोलबासी मिली गरेको सरसफाईको प्रशंसा गर्नुभयो । वडा नं. ९ भित्र बन्दै गरेका भौतिक संरचना निर्माण, ढल निर्माण, भित्री सडकहरुमा मोज्याक टायल्स् लगाउने लगायतका कार्य भैरहेको बताउनुभयो ।

टोल विकास संस्थाकी उपाध्यक्ष बिमला बुढाथोकीले स्वागत मन्तव्य दिनुभएको कार्यक्रम भरतपुर महानगरपालिका वडा नं. ९ का वडा सदस्य पुर्ण बहादुर श्रेष्ठ, सुर्य प्रसाद खनाल, वनदेवी वरण्डाभार सामुदायिक वन उपभोक्ता समुहका अध्यक्ष ज्ञान कुमार श्रेष्ठ, विकास टोल विकास संस्थाका अध्यक्ष भरत रानाभाट, कांडाघारी टोल विकास संस्थाका अध्यक्ष फडिन्द्र भट्टराई बसन्त चोक क टोल विकास संस्थाका अध्यक्ष विजयराज पौडेल, बिहानी आमा समुहका निवर्तमान अध्यक्ष शारदा खनाल, बिहानी टोल विकास संस्थाका निवर्तमान अध्यक्ष हिरा तिमिल्सीना, जेष्ठनागरीक संघ शाखा कार्यालय गोन्द्राङका अध्यक्ष घननाथ उपाध्याय, लगायतले मन्तव्य राख्नुभएको थियो । कार्यक्रम टोल विकास भित्र रहि सुचना तथा सञ्चारको क्षेत्रमा टोलबासीलाई सहयोग गरेको भन्दै आभास टेलिभिजनलाई सम्मान पत्र र मायाको चिनो दिइ सम्मान गरिएको थियो । त्यस्तै कार्यक्रममा ३ जना जेष्ठ नागरीक र टोल भित्र रहि सामाजिक काममा उल्लेखनीय योगदाना गरेको ३ जना सम्मान पत्र र दोसल्ला ओढाएर सम्मान गरिएको थियो । यसैगरी टोलभित्रका एसइइ परिक्षामा उत्कृष्ट अंक ल्याइ पास हुन सफल दुइजना विद्यार्थीलाई सम्मान पत्र डायरी र कलमले सम्मान गरिएको थियो । कार्यक्रममा टोल विकासका अध्यक्ष चिनी बहादुर बोहराले अध्यक्षको प्रतिवेदन र कोषाध्यक्ष लिलाभक्त अधिकारीले कोषाध्यक्षको प्रतिवेदन प्रस्तुत गर्नुभएको थियो । कार्यक्रम बिहानी टोल विकास संस्थाका सचिब आशाराम दहितले सञ्चालन गर्नुभएको थियो ।

पौष १३, गैंडाकोट । गैँडाकोट । धार्मिक सेवा समिति मौलाकालिकाको ४४ औँ वार्षिक साधारण सभा सम्पन्न भएको छ । धार्मिक सेवा समिति मौलाकालिका मन्दिरका अध्यक्ष शालिकराम सापकोटाले भक्तजनको सेवा र सुविधाका लागि खानेपानीको व्यवस्थापन, गौशाला व्यवस्थापन, आवास व्यवस्थापन, गुरुकुल निर्माणका लागि मन्दिरले गुरु योजना अनुरुप अघि बढीरहेको बताउनुभयो । आगामी ५० वर्षमा हामी कसरी अघि बढ्ने भन्ने सन्दर्भमा थप गुरु योजना निर्माण गरेर अघि बढ्ने मन्दिरका अध्यक्ष शालिकराम सापकोटाले बताउनुभयो । धार्मिक सेवा समिति मौलाकालिका मन्दिरका सचिव श्यामसुन्दर पराजुलीले मन्दिरले धार्मिक जागरणका लागि संस्कृत गुरुकुल निर्माण गरि अघि बढीरहेको बताउनुभयो । अहिले सञ्चालन भइरहेको केवलकारलाई देवघाट जोड्ने र धार्मिक पर्यटकीय क्षेत्र निर्माणका लागि मन्दिरले सकरात्मक भूमिका खेल्ने सचिव पराजुलीले बताउनुभयो । धार्मिक सेवा समिति मौलाकालिका मन्दिरका कोषाध्यक्ष सुवनप्रसाद ढकालले धार्मिक सेवा समितिले आर्थिक वर्ष २०७९÷८० मा मन्दिरको कुल आम्दानी २ करोड ६० लाख ३० हजार ७ सय ५१ रुपैंया र कुल खर्च २ करोड ५० लाख ३६ हजार २ सय ७ रुपैँया रहेको जानकारी दिनुभयो । मन्दिरले अहिलेसम्म गुरुकुल र मन्दिर दुबै तर्फ गरि ३ करोड १४ लाख २५ हजार रुपैँयाको अक्षयकोष बनाएको छ । मन्दिरद्वारा सञ्चालनमा रहेको मौलाकालिका संस्कृत विद्यापीठ (गुरुकुलम) का अध्यक्ष हरिप्रसाद सापकोटाले अहिले कक्षा ६, ७, ८ सञ्चालनमा रहेको गुरुकुलमा अब कक्षा ९ थप्ने गरि योजना बनिरहेको अध्यक्ष सापकोटाले बताउनुभयो । आन्तरिक लेखा समितिका संयोजक शोभाकान्त काफ्ले संयोजकत्वको लेखा समितिले गणेश मन्दिर, कृष्ण मन्दिर, सिद्धेश्वर महादेव मन्दिर समेतलाई धार्मिक पर्यटकीय विकासमा समेटेर अगाडी बढ्न गणेश मन्दिरदेखि केबलकार प्रस्थान स्थलसम्म भक्तजनहरु तीनपाङ्ग्रे सवारी साधनमा ओहोरदोहोर गर्न मिल्ने गरी बाटो निर्माण गर्नुपर्ने सुझाब दिएको छ ।
काशिनाथ कंडेल नेतृत्वको अनुगमन तथा मूल्याङ्कन उपसमितिको प्रतिवेदनले मौलाकालिका केवलकार र धार्मिक सेवा समिति मौलाकालिका मन्दिरका बीचमा हुनुपर्ने विविध सहमतिका बारेमा स्पष्ट नीति बनाइ मन्दिरको साख बढाउन सुझाब दिएको छ । गैँडाकोट क्षेत्रभित्रका विभिन्न संघसंस्थाका अध्यक्ष एवं प्रतिनिधि, धार्मिक सेवा समिति मौलाकालिका मन्दिरका सल्लाहकार, पूर्व अध्यक्षहरु, जनप्रतिनिधिहरु, आजिवन तथा साधारण सदस्यहरुको उपस्थिति रहेको कार्यक्रममा कार्यक्रमका प्रमुख अतिथि श्री १००८ स्वामी ज्ञानानन्द सरस्वती महाराजले सबैलाई आशिर्वचन प्रदान गर्नुभएको थियो । वैदिक सनात धर्म संस्कार संस्कृतिको जग नै नेपाल र नेपालीको पहिचान भएकाले धर्मसंस्कार र संस्कृतिको संरक्षणका लागि सबै एकजुट हुन आग्रह गर्नुभएको थियो । कार्यक्रममा उपस्थित सम्पूर्ण अतिथिहरुलाई मन्दिरका उपाध्यक्ष खगेन्द्रदास कंडेलले स्वागत गर्नुभएको थियो ।

पौष १३, सौराहा । तस्विर कोमल चन्द्र भगत ।  चितवनको पर्यटकीय नगरी सौराहामा जारी ‘चितवन हात्ती तथा पर्यटन महोत्सवको चौथो दिन शुक्रबार एक कार्यक्रमका बीच हात्तीलाई वनभोज खुवाइएको छ । सौराहा क्षेत्रमा पालिएका सरकारी तथा व्यक्तिगत हात्तीहरूलाई विभिन्न फलफूलसहित खिर, केक र मनपर्ने घाँस दिएर वनभोज खुवाइएको हो । क्षेत्रीय होटल संघ चितवनको अयोजनामा पौष १० गतेदेखि आयोजना गरिएको ‘चितवन हात्ती तथा पर्यटन महोत्सवमा हात्तीलाई चामल र भेलीको खिर, केकसहित उखु, सख्खर, चना, फर्सी, ड्रागनफ्रुट, स्याउ, केरा, खरबुजा, मेवा लगायतका फलफूल दिइएको संघका अध्यक्ष गंगा गिरीले जानकारी दिए । नेपाल सरकारका अर्थमन्त्री डा. रामशरण महतले पुस १० गते उद्घाटन गरेको महोत्सवमा यसअघि हात्ती सुन्दरी प्रतियोगिता र डुंगादौड प्रतियोगिता सम्पन्न भैसकेको छ ।

जसअनुसार हात्ती सुन्दरी प्रतियोगिताको उपाधि सेल्फीकलीले जितेकी थिइ भने डुंगा दौडमा कालिका नगरपालिका प्रथम भएको थियो । महोत्सवमा मैत्रीपूर्ण खेलकुद प्रतियोगितासँगै चितवनमा पर्यटनको सम्भावना र चुनौती’सम्बन्धी अन्तरक्रिया कार्यक्रमसमेत राखिएको छ । खस्किएको चितवनको पर्यटनलाई माथि उठाउन स्थानीय सरकार, व्यवसायी र पर्यटन बोर्डले खेल्नुपर्ने भूमिकाको बारेमा छलफल गरी दायित्व बोध गराउन अन्तरक्रिया कार्यक्रम आयोजना गरिएको संघका उपाध्यक्ष तथा महोत्सव मूल समारोह समितिका संयोजक ओमप्रकार पाण्डेले जानकारी दिए । महोत्सवमा हात्तीको दिनचर्याबारे जानकारी, स्वदेशी तथा विदेशी ट्राभल एजेन्सीहरुसँग विटुवी कार्यक्रम, स्थानीय वेशभूषा तथा कला संस्कृतिको संरक्षण, कलाकारहरूको सांस्कृतिक कार्यक्रम, स्थानीय कृषि उत्पादनको प्रर्वधनात्मक कार्यक्रमलगायतका कार्यक्रम समावेश छन् । महोत्सव सुरु भएपछि गन्तव्य अवलोकन गर्न आउने स्वदेशी तथा विदेशी पर्यटकको आगमनमा वृद्धि भएको छ । अंग्रेजी नयाँ वर्षमा यहाँ आएका पर्यटकहरू स्वदेश फर्किने सम्भावनालाई मध्यनजर गरी पर्यटन व्यवसायीहरूले सौराहामा हरेक वर्ष महोत्सव आयोजना गर्दै आएका छन् । कोरोनाका कारण तीन वर्ष रोकिएको चितवन हात्ती महोत्सवका गतिविधिलाई केही परिमार्जन गरी फेरि सुरु गरिएको संघका महासचिव गुणराज थपलियाले जानकारी दिए ।

चालु आर्थिक वर्ष सुरु भएपछि सौराहामा दैनिक एक हजार २०० बढी पर्यटक भित्रिको तथ्याङ्क छ । कोरोना महामारीपछि सबैभन्दा धेरै विदेशी पर्यटक अहिले आएको संघका अध्यक्ष गिरीले बताए । अहिले सौराहाका होटलहरू भरिभराउ छन् । महोत्सवका कारण विदेशी पर्यटकहरूले बसाई लम्ब्याएका छन् भने स्वदेशी पर्यटकहरू दुई रात चार दिन बस्ने गरी सौराहा आएको अध्यक्ष गिरीले जानकारी दिए । युनाइटेड हात्ती सञ्चालन सहकारी संस्था र रेवान सौराहा सह–आयोजक रहेको यो महोत्सवमा नेपाल पर्यटन बोर्ड र संस्कृति, पर्यटन तथा सहकारी मन्त्रालय प्रवद्र्धक तथा रत्ननगर नगरपालिका संरक्षक रहेका छन् । महोत्सव शनिबार (भोलि) समापन हुनेछ ।