समाचार

पौष १, रत्ननगर ।रत्ननगर । मध्यवर्ती क्षेत्रमा बसोबास गर्ने नदी तथा वनमा आश्रित विपन्न समुदायका युवाहरुको लागि सौराहामा आइतबार देखि सीपमुलक तालिम सुरु गरिएको छ । मृगकुञ्ज मध्यवर्ती उपभोक्ता समिति र सपना भिलेज सोसियल इम्प्याक्टको सयुक्त आयोजनामा कफि बारिस्ता, हस्पिटालिटी तथा कफि मेसिन मर्मत बनाउने तालिम सुरु गरिएको छ । दुई संस्थाको ५० / ५० प्रतिशत गरी १३ लाखको लगानीमा ४९ जना युवाहरुको लागि तालिम सुरु गरिएको हो । सौराहामा आइतबार आयोजित एक औपचारिक कार्यक्रमका बीच प्रतिनिधि सभा सांसद हरि ढकालले सो तालिमको उद्घाटन गरेका छन् । पछिल्लो समय कफीको बजार बढ्दै गएको कारण यसबाट रोजगारी र्सिजना हुने सम्भावना देखिएपछि तालिम सुरु गरिएको सपना भिलेजका अध्यक्ष ध्रुब गिरिले जानकारी दिए । आर्थिक अबस्था कमजोर भएका युवाहरुलाई सीप मुलक तालिम दिएर रोजगारीको अबसर सृजना गर्ने र उनीहरुलाई विदेश जानबाट रोक्ने उद्देश्यले तालिम दिइएको उनको भनाई छ । तालिम लिएका युवाहरुलाई व्यवसाय सञ्चालनको लागि सहयोग गर्ने भन्दै सौराहामै यसको सम्भावना रहेको गिरीले बताए । हामीले सम्भावनाको खोजी गरेरै तालिम आयोजना गरेका हौं उनले भने तालिम लिएका युवाहरुले सौराहामै व्यवसाय सञ्चालन गर्न सक्ने अबस्था रहेको छ ।

४५ दिने सो तालिममा आधुनीक कफि बनाउन सिकाउने, होटलमा पाहुनालाई गर्ने स्वागत र सत्कार तथा कफी मेसिन मर्मत गर्न सिकाइने छ । सपना कफी रिसर्च एण्ड ट्रेनिङ सेन्टरका सुदिप भट्टराई र लोकनाथ रिजालले तालिममा सहभागीहरुलाई प्रशिक्षण दिनेछन् । उद्घाटन कार्यक्रमका प्रमुख अतिथि सांसद ढकालले राजनीतिक बेतिथिका कारण युवा शक्ति विदेशिने क्रम बढिरहेका बेला सौराहामा आयोजना गरिएको तालिमले रोजगारी र्सिजना गर्ने बताए । उनले कफि बारिस्ता बनाउने तालिम लिएका ४९ जना युवाहरुलाई व्यवसाय सञ्चालनको लागि सहयोग गर्ने बताए । कार्यक्रममा संस्थापक मेयर नारायण वनले मध्यवर्तीका युवाहरुको लागि आयोजना गरिएको तालिम फलदायी हुने विश्वास व्यक्त गरे । मध्यवर्ती क्षेत्र व्यवस्थापन समितिका अध्यक्ष प्रकास ढुंगानाले समाज आयआर्जन मार्फत युवाहरुलाई संरक्षणमा जोड्नु पर्नेमा जोड दिए । मृगकुञ्ज मध्यवर्ती उपभोक्ता समितिका अध्यक्ष दुर्गा प्रसाद घिमिरेले सीप मुलक तालिम मार्फत दीगो आयआर्जनको आधार तयार गरिने बताए । सपना भिलेजसंगको सहकार्यमा मृगकुञ्जले यस अघि २० जना महिलाहरुलाई नेचर गाइड र ४४ जना मुसहर महिलाहरुलाई दिएको तरकारी खेती तालिमले प्रतिफल प्राप्त गरेको भन्दै कफि बारिस्ता तालिम पनि फलदायी हुने बताए  कार्यक्रममा वडा नं ६ का वडाध्यक्ष किरण महतो, चितवन निकुञ्ज सौराहा सेक्टर प्रमुख शान्ताबहादुर रानामगर, बाघमारा मध्यवर्ती सामुदायिक वनका अध्यक्ष जीतु तामाङ लगायतले मन्तव्य राखेका थिए । मृगकुञ्जका अध्यक्ष घिमिरेको अध्यक्षतामा भएको कार्यक्रम कार्यसमिति सदस्य सरस्वती लामाले सञ्चालन गरेकी थिइन् । कार्यक्रममा मृगकुञ्जका कार्यसमिति सदस्य बद्धिमान विकले स्वागत मन्तव्य राखेका थिए ।

पौष १, रत्ननगर । प्याराडाइन युवा क्लव सिसुवार रत्ननगरको टिकौली चौरमा जारी दोस्रो रत्नप्रिय कप फुटबल प्रतियोगिताको फाइनलमा प्रवेश गरेको छ । आइतबार भएको पहिलो सेमिफाइनल खेलमा हेटौडा फुटबल एकाडेमीलाई ४–० गोल अन्तरले पराजित गरी प्याराडाइज युवा क्लव फाइनलमा प्रवेश गरेको हो । प्याराडाइजलाई जिताउन देव दुरा, सन्तबहादुर गुरुङ, विवेक गुरुङ र विकी राईले एक एक गोल गरेका थिए । प्रतियोगितामा उत्कृष्ट खेल प्रर्दशन गर्ने प्याराडाइजका सन्तबहादुर गुरुङ म्यान अफ दी म्याच घोषित भएका छन् । उनलाई स्वर्णलक्ष्मी साकोसका प्रमुख कार्यकारी अधिकृत तुलसीराम थापा, ऋण अधिकृत राजेश बहादुर तामाङ, रत्नप्रिय क्लवका अध्यक्ष बसन्त रानाले पुुरस्कार हस्तान्तरण गरेका थिए । प्रत्यक दिनको म्यान अफ दी म्याच सफा उर्जा उत्पादन प्रा।लि।ले प्रायोजन गर्दै आएको छ । चितवन सहित मकवानपुर, नवरपरासी गरी १० वटा टिम रहेको प्रतियोगितामा पहिलो हुने टिमलाइ १ लाख ५५ हजार ५ सय ५५ र दोस्रो हुने टिमलाई ७७ हजार ७ सय ७७ रूयैया पुरस्कार प्रदान गरिने खेल संयोजक बिबेक अम्गाईले जानकारी दिए । भोली ९सोमबार० खेलकुल विकास समिति रत्ननगर १२ र पेन्गुईन एजुकेशन भरतपुर २४ बीच दोस्रो सेमिफाइन खेल हुने क्लवका सचिव विजय लामाले जानकारी दिए ।

चितवन, मंसिर ३० ।

चितवनको भरतपुर महानगरपालिकाले यहाँको पर्यटन प्रवद्र्धनका लागि सन् २०२४ लाई भ्रमण वर्षका रुपमा मनाउँदै छ । झन्डै एक वर्ष अघिदेखि थालिएको तयारी अन्तिम चरणमा पुगेको छ । सन् २०२४ जनवरी १ तारिखमा नारायणगढस्थित नारायणी नदी किनारमा ठूलो सङ्ख्यामा स्थानीय र अतिथिको उपस्थितिमा भ्रमण वर्ष घोषणा गरिँदै छ । महानगरपालिकाका पर्यटनविज्ञ सल्लाहकार डा. विश्व सुवेदीका अनुसार प्रधानमन्त्री पुष्पकमल दाहाल ‘प्रचण्डले भ्रमण वर्षको शुभारम्भ गर्ने कार्यक्रम छ । उक्त कार्यक्रममा सङ्घ, प्रदेश र स्थानीयस्तरका पर्यटनसँग सम्बन्धित विभिन्न व्यक्तित्वको उपस्थिति रहने छ । पर्यटनविज्ञ सुवेदीका अनुसार घोषणा कार्यक्रममा ५० हजार हाराहारी स्थानीयलाई उपस्थिति गराउने तयारी गरिएको छ । महानगरपालिकाका २९ वडाबाट नागरिकलाई कार्यक्रममा सहभागी गराइँदै छ । यसको नेतृत्व वडाका अध्यक्षले गर्ने गरी तयारी भइरहेको छ । भ्रमण वर्षको वडास्तरमा प्रचारका लागि वडाअध्यक्ष संयोजक रहेको प्रवद्र्धन समिति बनाइएको छ । कार्यक्रमको घोषणापूर्व नदी किनारमा स्थानीय कलाकारले सांस्कृतिक कार्यक्रम प्रस्तुत गर्नेछन् भने औपचारिक कार्यक्रम सकिएपछि राष्ट्रिय कलाकारले साँझसम्म आफ्नो प्रस्तुति प्रस्तुत गर्नेछन् । भरतपुर महानगरभित्र सात मुख्य गन्तव्य तोकिएका छन् । यसका अतिरिक्त २१ गन्तव्यको समेत प्रचारप्रसार गरिएको छ । मुख्य गन्तव्यलाई ब्लक बनाएर अन्य गन्तव्यको प्रचार गरिएको हो । भ्रमण वर्ष सफल पार्न महानगर प्रमुख रेनु दाहालको संयोजकत्वमा दुई हजार २४ सदस्यीय मूल समारोह समिति, प्रमुख दाहालकै संयोजकत्वमा सात सदस्यीय निर्देशन समिति, उपप्रमुख चित्रसेन अधिकारीको संयोजकत्वमा १९ सदस्यीय कार्यसम्पादन समिति, एक सय एक सदस्यीय सल्लाहकार समिति र २९ उपसमिति गठन गरिएका छन् । उपसमितिमा सात सय सदस्य रहेका छन् । भ्रमण वर्षमा गरिने विभिन्न कार्यक्रम स्थानीय, प्रदेश र सङ्घीय सरकारको सहकार्यमा गरिँदै छ । महानगरका उपप्रमुख चित्रसेन अधिकारीका अनुसार रु ६ करोडभन्दा बढी सरकारी तवरबाट भ्रमण वर्षमा खर्च हुँदैछ । यसका लागि महानगरपालिकाले रु तीन करोड विनियोजन गरेको छ । बागमती प्रदेश सरकारले रु दुई करोड उपलब्ध गराउने प्रतिवद्धता जनाएको छ । यसैगरी पर्यटन बोर्डबाट रु ७० लाख निकासा भइसकेको उपप्रमुख अधिकारीले जानकारी दिनुभयो । यससँगै भ्रमण वर्ष तयारीका क्रममा भौतिक निर्माणमा समेत महानगरले खर्च गरेको छ । पर्यटकीय पूर्वाधार निर्माण महानगरको योजनाबद्ध खर्च भएको उहाँले बताउनुभयो । भ्रमण वर्षसँगै सुस्ताएको यहाँको पर्यटन क्षेत्र चलायमान हुने अधिकारीको अपेक्षा छ । महानगर प्रमुख दाहालले भ्रमण वर्षमा दुई लाख बाह्य र पाँच लाख आन्तरिक पर्यटक भित्र्याउने लक्ष्य रहेको बताउनुभयो । भ्रमण वर्षका अवसरमा महानगरभित्र रहेका होटल, रिसोर्ट र रेष्टुरेन्टलाई विशेष छुटमा प्याकेज दिन आग्रह गरिएको छ । पन्ध्रदेखि ४० प्रतिशतसम्म छुटको प्याकेज दिने गरी महानगरपालिकामा होटल रेष्टुरेन्टले प्रस्ताव पेस गरेका छन् । प्रमुख दाहालका अनुसार महानगरभित्र २० शय्याभन्दा माथिका ६५ पर्यटकीय होटल छन् । मध्यमस्तरका सहित सात हजार जना अट्ने क्षमता महानगरभित्रका होटलमा रहेको उहाँले जानकारी दिनुभयो । गैँडाकोटसहित जोड्दा चितवनमा १५ हजार पर्यटकलाई राख्न सक्ने क्षमता रहेको छ ।

भ्रमण वर्षलाई राष्ट्रिय र अन्तरराष्ट्रिय स्तरसम्म प्रचारप्रसार गर्ने गरी विभिन्न कार्यक्रम गरिँदै छ । प्रमुख दाहालका अनुसार ५० भन्दा बढी स्थानीय, राष्ट्रिय र अन्तरराष्ट्रिय स्तरका कार्यक्रम गरिँदै छन् । कसराबाट मेघौलीको गोलाघाटसम्म ‘इन्टरनेसनल ह्यारिटेज म्याराथुन’, इन्टरनेसनल जङ्गल सफारी मार्ट, अन्तरराष्ट्रिय साहित्य सम्मेलनलगायत कार्यक्रम गर्ने योजना छ ।

उद्योग वाणिज्य सङ्घ चितवनले विभिन्न गोष्ठी गर्दैछ । सङ्घीय सरकारको मन्त्रिपरिषद्को बैठक भरतपुरमा गर्न अनुरोध गरिएको प्रमुख दाहालले बताउनुभयो । ऐतिहासिक दरबार दियालो बङ्गला सर्वसाधारणका लागि खुल्ला गरिँदै छ । यसैगरी दुर्लभ पाटेबाघ पर्यटकले हेर्न मिल्ने गरी खुल्ला खोरमा राख्न लागिएको उहाँले जानकारी दिनुभयो । भ्रमण वर्षका अवसरमा विश्वका ५९ देशका भरतपुरवासी, समग्र नेपाली र सोही मुलुकका नागरिक घुम्न आउने गरी निम्तो दिइएको छ । चितवन राष्ट्रिय निकुञ्जको प्रवेशद्वार रहेको भरतपुर हुँदै ठूलो सङ्ख्यामा पर्यटक निकुञ्ज प्रवेश गर्ने गर्दछन् । राप्ती र नारायणी नदीको बीचमा रहेको भरतपुर महानगर पर्यापर्यटन, धार्मिक र संस्कृतिक हिसाबले महत्वपूर्ण छ । रासस