समाचार

हेटौंडा, असोज २७ । 

प्रेस चौतारी नेपाल बागमती प्रदेश कमिटीले नेपाल पत्रकार महासंघ बागमती प्रदेश कमिटीको कार्यालयमा तालावन्दी गरेको छ । पत्रकार महासंघ केन्द्रीय समिति अन्तर्गतको सदस्यता शुद्धीकरण समितिले प्रदेश समितिबाट प्राप्त सिफारिस भनी प्रकाशित गरेको नामावलीप्रति प्रेस चौतारी नेपाल बागमती प्रदेश कमिटीको गम्भीर ध्यानाकर्षण जनाउँदै तालावन्दी गरेको हो । प्रेस चौतारी बागमती प्रदेश कमिटीका कार्यबाहक अध्यक्ष राधेश्याम खतिवडाको नेतृत्वमा प्रेस चौतारीका केन्द्रीय सदस्य हरि हुमागाई, चौतारी बागमती प्रदेश कमिटीका महासचिब र सदस्यहरु, चौतारीका जिल्ला अध्यक्ष बालकृष्ण अधिकारी लगायतकाले महासंघको कार्यालयमा अनिश्चित कालका लागि तालावन्दी गरेका हुन् । महासंघमा नेतृत्वमा रहनेहरु र पदाधिकारीहरुले आफ्नो संगठन निकट निष्कृय पत्रकारहरुको सदस्यता नवीकरण गर्ने तर प्रेस चौतारीमा आस्था राख्ने क्रियाशिल पत्रकारहरुको सदस्यता नवीकरण नगर्ने गरी प्रदेशबाट सिफारिस भएको नामावली क्रियाशिल पत्रकारहरुलाई सदस्यताबाट वञ्चित गर्ने मनसाय रहेको प्रेसचौतारीले ठहर गरेको छ ।

नेपाल पत्रकार महासंघ बागमती प्रदेश समितिले सदस्यताको विषय टुंग्याउनु अघि संगठनहरुसँग बसेर गरेको सहमति लत्याएको छ । चौतारीसंग गरेको सहमतिको प्रयास गरिएको प्रपञ्च रचेर आफ्नो मनोगत निर्णय कार्यान्वयन गराउन सिफारिस गर्ने नेपाल पत्रकार महासंघ बागमती प्रदेश समितिको सिफारिसको घोर बिरोध रहेको कार्यबाहक अध्यक्ष खतिवडाले बताए ।

जिल्ला समितिबाट सर्वसम्मत सहमति भई सदस्यता नवीकरण गर्न सिफारीस गरिएका पत्रकारहरुको नामावली काटेर जिल्लाबाट सिफारिस नभएकाहरुको नाम प्रदेश समितिबाट थप्ने कार्य भएको छ । केन्द्रीय समितिबाट जारी भएको मापदण्डलाई धुलीसात बनाउँदै प्रदेश समितिले मनोगत रुपमा गरेको सिफारिस कार्यान्वयन नगर्न चौतारीले केन्द्रीय समितिको ध्यानाकर्षण गराएको छ ।

प्रेस चौतारी नेपालको सदस्य भएकै कारण क्रियाशिल पत्रकारलाई नयाँ सदस्यता नदिने र सदस्यता नवीकरण नगर्ने महासंघ प्रदेश समितिका नेतृत्वले राजनीतिक आस्थाका आधारमा खल्तीका व्यक्तिलाई नयाँ सदस्यता पनि दिने, निष्कृय पत्रकारहरुको नवीकरण पनि गर्नेगरी रचिएको षडयन्त्र प्रेस चौतारी नेपाल बागमती प्रदेश कमिटीलाई कुनै हालतमा स्वीकार्य नभएको तालावन्दी पछी जारी बिज्ञप्तीमा उल्लेख छ । महासंघबाट जारी भएको १५ बुँदै मापदण्ड पूर्ण पालना नभएसम्म ताला नखुल्ने प्रेसचौतारीले जनाएको छ ।

काठमाडौँ, असोज २७ ।
पछिल्लो तीन महिनामा मनाङ एयरका दुईवटा हेलिकप्टर दुर्घटना भएपछि नियामक नेपाल नागरिक उड्डयन प्राधिकरणले उक्त कम्पनीको उडान अनुमति  (एयर अपरेटर सर्टिफिकेट) निलम्बन गरेको छ । प्राधिकरणका सूचना अधिकारी ज्ञानेन्द्र भुलका अनुसार मनाङ एयरले उडान सुरक्षामा ध्यान नदिएकाले तीन महिनाका लागि मनाङ एयरको एओसी निलम्बन गरिएको हो । प्राधिकरणका अनुसार निलम्बनमा परेको मनाङ एयरले तत्काल हेलिकप्टर ल्याए पनि उडाउन अनुमति पाउने छैन । दुर्घटनाको विस्तृत अध्ययनका लागि प्राधिकरणको प्राविधिक टोली भोलि आइतबार हेलिकप्टर दुर्घटना भएको क्षेत्रमा जानेछ । सोलुखुम्बुको लुक्लाबाट लोबुचे उडेको मनाङ एयरको ‘एन–एनजे’कलसाइन हेलिकप्टर आज बिहान जिल्लाको खुम्बुपासाङल्हामु गाउँपालिका–४ लोबुचेमा दुर्घटना भएको थियो । दुर्घटनामा घाइते भएका पाइलट प्रकाशकुमार सेढाइँको उद्धार गरी अहिले काठमाडौँको ह्याम्स अस्पतालमा उपचार भइरहेको छ । प्राधिकरणको हवाई सुरक्षा प्रतिवेदन ‘एभिएसन सेफ्टी रिपोर्ट–२०२३’ अनुसार हालसम्म नेपालमा विभिन्न कम्पनीका ३९ वटा हेलिकप्टर दुर्घटना भएका छन् । ती दुर्घटनामा ९० जनाको मृत्यु भएको छ । पछिल्ला तीन महिनामा मनाङ एयरका दुईवटा हेलिकप्टर दुर्घटनाग्रस्त भएका छन् । दुवै दुर्घटना सोलुखुम्बुमा भएका हुन् । गत असार २६ गते मनाङ एयरको हेलिकप्टर दुर्घटना हुँदा चालक दलका एक सदस्यसहित छजनाको मृत्यु भएको थियो ।

२७ असोज,चितवन । पवित्रा ढकाल । तस्विर : कोमल चन्द्र भगत
गत निर्वाचनमा चितवन क्षेत्र नं. ३ बाट संघीय चुनाव लडेका डा. भोजराज अधिकारी चितवनको दक्षिणी माडी नगरपालिका–९ को हनुमानझुलामा शनिबार स्वास्थ्य शिविर गरेका छन्। डा. अधिकारीले बाँदरझुलास्थित आधारभूत स्वास्थ्य केन्द्रको स्थलगत अनुगमन समेत गरेका छन् । प्रदेश सांसद ठाकुरप्रसाद ढकाल सहित अनुगमनमा पुगेका डा. अधिकारीले आफूले निर्वाचनताका हनुमानझुलावासी माझ गरेको वाचा नबिर्सेको र सोहीअनुसार स्वास्थ्य शिविरसहित आएको बताए । आधारभूत स्वास्थ्य केन्द्रमा ल्याब नभएको हुँदा यहाँ ल्याब स्थापना गर्न र ल्याब सेवा तीन महिना भित्र उपलब्ध गराउने उनले प्रतिबद्धता जनाएका छन् ।

जनशक्ति उपलब्ध गराइदिन माडी नगरपालिका र प्रदेश सरकारको स्वास्थ्य मन्त्रालयलाई पहल गरिदिन आग्रह पनि गरे । यहाँका जनताले एक्सरे सेवा माग गरे पनि ल्याब नभइकन आभारभूत स्वास्थ्यसेवा पूरा नहुने भन्दै उनले ल्याब स्थापनाका लागि तीन महिना भित्र वाचा पूरा गर्ने प्रतिबद्धता गरेका छन् । तीन महिनाभित्र उक्त आधारभूत स्वास्थ्यकेन्द्रमा ल्याब सेवा सुरु गर्ने र यहाँ प्रसुति सेवालाई थप व्यवस्थित गराउने उनले बताए । कार्यक्रममा बोल्दै प्रदेश सांसद ठाकुरप्रसाद ढकालले निकुञ्ज ऐनको कारण यहाँ विकासमा बाधा उत्पन्न भएको भन्दै यसको परिमार्जनका लागि आफू र प्रधानमन्त्री प्रचण्ड तदारुकताका साथ लागिपरेको जानकारी गराए । उनले आफूले हनुमानझुलाका बासिन्दाका अप्ठेरालाई ध्यानमा राखेर एम्बुलेन्स सेवा सुरु गरिसकेको र नयाँ भवन आफू पहिला मेयर हुँदा नै निर्माण गरेको जानकारी दिए । यहाँ सेवासुविधा थप गरी र आधारभूत स्वास्थ्यकेन्द्रलाई छिट्टै सम्पन्न गर्ने प्रतिबद्धता व्यक्त गरे । त्यस्तै निकुञ्जको मध्यवर्ती क्षेत्र स्थापना अगाडि नै यहाँ बस्ती भएको हुनाले निकुञ्जले यो ठाउँलाई अतिक्रमित क्षेत्र भन्दा समस्या आएको बताए ।  स्वास्थ्य शिविरमा ५१४ जनाले निःशुल्क स्वास्थ्य सेवा लिएका थिए ।

सोही सन्दर्भमा अधिकारीले हनुमानझुला आधारभूत विद्यालयलाई खेलकूद सामग्री समेत हस्तान्तरण गरेका छन् । । शिविरमा मधुमेह, प्रेसर, पेट दुख्ने, हाडजोर्नी, ज्वरो लगायतका रोज जांच गरिएको थियो भने भिडियो एक्सरे, इसिजी, दिसा, पिसाव, रगत परिक्षण गरिएको थियो । शिविरमा निशुल्क औसधी वितरण गरिएको थियो । कार्यक्रम राष्ट्रिय प्रगतिशिल स्वास्थ्यकर्मी संगठन जिल्ला समिति चितवनको आयोजनामा भएको स्वास्थ्य शिविरको प्रगतिशिल जनस्वास्थ्यकर्मी महासंघ जिल्ला समन्वय समिति चितवनले समन्वय गरेको थियो ।