समाचार

काठमाडौं, असोज २२ । तस्वीर :कोमल चन्द्र भगत ।

२७ औं विश्व अण्डा दिवस यस वर्ष नेपाल लेयर्स कुखुरापालक संघ र नेपाल भेटेरीनरी एशोसियशनको संयुक्त आयोजनामा सप्ताह व्यापी रुपमा विभिन्न कार्यक्रमहरुको आयोजना गरी मनाइने भएको छ । नेपाल लेयर्स कुखुरापालक संघ र नेपाल भेटेरीनरी एशोसियशनले देशका सातै प्रदेशमा यहि असोज २२ देखि २५ गते सम्म विभिन्न कार्यक्रम गर्ने तयारी गरेको सोमबार नारायणगढमा आयोजित पत्रकार सम्मेलनमा जानकारी दिएको छ । कार्यक्रममा दिएको जानकारी अनुसार प्रत्येक प्रदेशका १० वटा सरकारी विद्यालयमा अण्डाको महत्व माथी चेतनामुलक कार्यक्रम संचालन गर्ने, अण्डा खुवाउने, विरामी, अशक्त, वृद्धाहरुलाई अण्डा वितरण गर्ने, रक्तदान कार्यक्रमको अयोजना गर्ने, अन्तरक्रिया कार्यक्रम संचालन गर्ने, पोल्ट्री क्षेत्रका नितिगत समस्याका बारेमा सरकारी र निजी क्षेत्रका व्यवसायिहरु विच अन्तरक्रिया गोष्ठीहरुको आयोजना गर्ने, पोल्ट्री व्यवसायका चुनौती र अवसरका बारेमा गोष्ठी गर्ने कार्यक्रम तय गरिएको छ । असोज २६ गते शुक्रवार पोखरामा औपचारिक कार्यक्रम गरि २७ औं अण्डा दिवस समापन गरिने जानकारी दिइएको छ । गण्डकी प्रदेशका मन्त्री पशु सेवा विभागका महानिर्देशक, उपमहानिर्देशक, क्षेत्रीय निर्देशकहरु, भेटेरीनरी अस्पताल तथा पशु सेवा विज्ञ केन्द्रहरु, भेटेरीनरी प्रयोगशालाहरु, भेटेरीनरी शिक्षालयहरु, पोल्ट्री क्षेत्रका संघ सस्थाका पदाधिकारीहरु, पोल्ट्री व्यवसायीहरु, संचारकर्मीहरुको सहभागितामा औपचारीक कार्यक्रम हुनेछ । समापन कार्यक्रममा पनि अण्डाको महत्व र खपतको अवस्था, अण्डामा पाइने प्रोटिन, मानव स्वास्थमा प्रोटिनको महत्व वारेमा विज्ञ चिकित्सकहरुले कार्यपत्र प्रस्तुत गर्ने छन् । समापन कार्यक्रममा अण्डाका विभिन्न परिकारहरुको प्रर्दशनी समेत गरिने कार्यक्रममा जानकारी दिइयो ।
मानव स्वास्थका लागि आवश्यक पर्ने, प्रशस्त मात्रमा प्रोटिन पाइने र कुनै पनि प्रकारको मिसावट गर्न नसकिने प्रोटिन र खनिज तत्वले भरीपूर्ण सबै भन्दा सस्तो मूल्यमा पाइने वस्तु नै अण्डा भएकोले अण्डाको नियमित उपभोगवाट स्वास्थका लागि अत्यावश्यक, पूर्ण पाचनशिल, सन्तुलित, उच्च गुणस्तरको प्रोटिन र एमिनो युक्त अण्डा सेवन गर्न विश्व स्वास्थ्य संगठनले प्रेरित गरेको छ । बालक देखि बृद्धबृद्धासम्मका लागि उत्तम प्रोटिनको स्रोत भएकोले
अण्डामा विद्यमान एन्टी अक्सिडेनटले बुढ्यौली र ह्दयघाट समेत रोक्न मद्धत गर्ने अध्ययनले देखाएको कार्यक्रममा जानकारी दिइयो । कार्यक्रममा नियमीत अण्डाको उपभोगबाट आखाको शक्ति बढ्ने र मोतीया विन्दुको रोकथाम हुन्छ । प्रशस्त मात्रामा पाइने क्याल्सियम फस्फोरसवाट हडडी र दांत मजबुत बनाउने, रक्त अल्पता वाट वचाउने । रोग प्रतिरोध क्षमता, जवानीपन र स्मरण शक्ति बढाउने र ।अधिक तौल (मोटोपना) घट्न गइ पातलो र फुर्तिलो बनाउन सहयोग गर्ने हुंदा अण्डा खाना कै रुपमा प्रयोग गर्न विज्ञहरुले सुझाएका छन् ।
पोल्ट्री क्षेत्रले देशको कुल ग्राहस्थ उत्पादनमा करिब ४ प्रतिशत योगदान दिनुका साथै ५ लाख व्यक्तिहरुलाइ प्रत्यक्ष रोजगारी दिदै देशको एक आत्मनिर्भर व्यवसायको रुपमा स्थापित भए पनि कोभिड अगाडी सम्म दैनिक ५० देखि ५५ लाख गोटा अण्डा उत्पादन हुने गरेकोमा अहिले घटेर ३० लाख गोटामा झर्दा समेत लागत मूल्य पाउन नसकिएको व्यवसायीहरुले बताएका छन् । कुनै पनि प्रकारको मिसावट हुन नसक्ने सबै भन्दा सस्तो मूल्यमा मानव शरिरका लागि आवश्यक पर्ने प्रोटिन पाइने अण्डाको नियमित रुपमा उपभोग गर्न उनीहरुले आम सर्वसाधारणलाई आह्वान गरेका छन् ।

काठमाडौं, असोज २२ ।

इजरायलको शेदोत नेगेभ र पामे तासाजमा रहेका विद्यार्थीलाई इजरायली सेनाले सुरक्षित स्थानमा सार्न थालेको छ । कृषि अध्ययनका लागि बस्ने क्रममा हमासको आक्रमणमा परेका उनीहरु बंकरमा लुक्दै आएका थिए । इजरायली सेना, स्थानीय संस्था र गैरआवासीय नेपाली संघको सहायतामा उनीहरुलाई उद्धार थालिएको हो । पर्वत पैयु ५ का नारायण भुसालले सामाजिक सञ्जालमा भिडियो पोष्ट गर्दै दिएको जानकारी अनुसार हायात रोडमा रहेका ११ मध्ये नौ जनाको उद्धार भइसकेको छ । बाँकी दुई पनि सुरक्षित स्थलमा लगिने क्रममा छन् । शेदोत नेगेभमा रहेका दाङ नारायणपुरका विपिन सुवेदीले पनि आफूहरु सुरक्षित स्थलतर्फ लगिँदै गरेको बताए । ‘हामी बाटोमा छौं, केही छिनमै सुरक्षित स्थलमा पुग्छौं,’ उनले भने, ‘इजरायली सेनाले हामीलाई समूह बनाएर लगिरहेको छ ।’ इजरायली सेनाले सुरक्षाको स्थितिलाई नियन्त्रणमा लिँदै गएको छ । नेपाली विद्यार्थीहरु नेपालका विभिन्न विश्वविद्यालयबाट कृषि फार्ममा प्रशिक्षार्थीको रुपमा काम गर्दै आएका थिए ।

सरकारले मङ्गलबार राष्ट्रिय शोकको घोषणा गरेको छ । सिंहदरबारमा सोमबार बसेको मन्त्रिपरिषद् बैठकले इजरायलमा मृत्यु भएका नेपालीको शोकमा मङ्गलबार राष्ट्रिय शोक घोषणा गरी देशभरका सरकारी कार्यालय र विदेशस्थित नेपाली नियोगहरुमा राष्ट्रिय झण्डा आधा झुकाउने निर्णय गरेको हो । बैठकले इजरायलको आक्रमणमा परी मृत्यु भएका व्यक्तिको परिवारलाई १०/१० लाख राहत दिने निर्णय पनि गरेको छ भने द्वन्द्वग्रस्त ठाउँमा रहेका नेपाल फर्किन चाहने नेपालीलाई यथाशीघ्र ल्याउनका लागि तयारी गर्ने निर्णय गरेको सरकारका प्रवक्ता रेखा शर्माले जानकारी दिनुभयो । बैठकले परराष्ट्र मन्त्रालयले इजराजयल सरकारसँग समन्वय गरी यस घटनामा निधन भएका नेपालीहरुको शव यथाशीघ्र स्वदेश ल्याउने , इजरायलस्थित नेपाली दूतावासले इजरायल सरकारसँगको समन्वय र सहयोगमा यस घटनामा परी बेपत्ता भएका नेपालीको खोजीमा तीब्रता दिने एवं घाइतेहरुको तत्काल उपचारका लागि आवश्यक समन्वय र सहजीकरण गर्ने निर्णय गरेको प्रवक्ता शर्माले बताउनुभयो । त्यस्तै अध्ययनलगायत अन्य प्रयोजनका लागि इजरायलमा रहेका नेपालीहरुलाई नेपाल आउन चाहेमा नेपाल सरकारले नेपाल एअरलाइन्स र हिमालय एअरलाइन्सको विमान चार्टर गरी यथाशीघ्र ल्याउन प्रबन्ध गर्ने निर्णय भएको उहाले बताउनुभयो । त्यस्तै बैठकपछि परराष्ट्रमन्त्री एनपी साउदले इजरायलमा नेपालीहरुलाई सुरक्षित स्थानमा ल्याउनका लागि पहलकमदी भइरहेको जानकारी दिनुभयो । इजरायलस्थित नेपाली दूतावासले इजरायलको जोखिमयुक्त क्षेत्रबाट नेपालीहरुको सुरक्षित उद्धार गर्न समन्वय र सहजीकरण गर्ने उहाले बताउनुभयो । मन्त्रिपरिषद्ले इजरायलमा रहेका नेपालीहरुको उद्धारको लागि आवश्यकताअनुसार इजरायल सरकार एवं छिमेकीलगायत अन्य मित्र राष्ट्रहरुसमेतको सहयोग लिने निर्णय गरेको छ भने यस घटनाका सम्बन्धमा मानवीय संवेदनशीलता, परिवारजनमा पर्ने मानसिक आघात तथा समाजमा पर्ने असरसमेतलाई ध्यानमा राखी असान्दर्भिक र असंवेदनशील सामग्रीहरु सञ्चारमाध्यम र सामाजिक सञ्जालमार्फत प्रवाह नगर्न र आ–आफ्नो क्षेत्रबाट जिम्मेवार भूमिका निर्वाह गर्न सबैमा आह्वान गरेको छ ।