समाचार

चितवन, माघ ७

चितवनका प्रमुख जिल्ला अधिकारी आशमान तामाङ गृह मन्त्रालयमा तानिएपछि सुरेन्द्र पौडेललाई चितवनको प्रमुख जिल्ला अधिकारीको जिम्मेवारी दिइएको छ । उपप्रधान तथा गृहमन्त्रीस्तरीय निर्णयानुसार उनीहरुको सरुवा भएको हो । त्यस्तै उनीहरु सहित सरकारले एकै पटक ४२ जना प्रमुख जिल्ला अधिकारी र ७ जना सहायक प्रमुख जिल्ला अधिकारीसहित ७० जना सहसचिव र उपसचिवको सरुवा गरेको हो । उपप्रधान तथा गृहमन्त्रीस्तरीय निर्णयानुसार सबै सहसचिव र उपसचिवहरूलाई काज सरुवा गरिएको छ । सरुवा हुनेमा सिडिओ, सहायक सिडिओका साथै जेलर, निर्देशकसम्म रहेका छन् ।

नवलपुर,माघ ६ ।

विद्युतीय धरापमा परेर चितवन राष्ट्रिय निकुञ्जमा गैडाको माउ र बच्चा मृत फेला परेका छन् भने तस्करहरूले गैडाको खागकाटी लगेका छन्न  । नवलपुरको सेहरीस्थित नारायणी नदी किनारमा दुईवटा गैडा मृत अवस्थामा भेटिएका हुन् । दुईवटा गैडा मध्ये माउ र बच्चा रहेको स्थानीयले जनाएका छन् । शुक्रबार बिहान मृत अवस्थामा भेटिएका दुई गैडामध्ये एउटाको खाग पनि निकालिसकेको पाइएको छ । स्थानीयका अनुसार चोरी शिकारीमा परेको हुन सक्ने आशंका छ । अहिले गैडा मृत भेटिएको स्थानमा नेपाली सेनाले सुरक्षा दिइरहेको छ भने अनुसन्धान थालिएको छ । खाग पनि निकालिसकेको हुँदा चोरी शिकारीमा परेको हुन सक्ने आकलन गरिएको छ । जंगल क्षेत्र नजिक रहेको हुँदा सेहरीमा पछिल्लो समय बाघको आक्रमण पनि बढेको स्थानीयले बताएका छन् । करिब १५ दिन भित्रमा बाघले २–३ वटा गाइ बस्तु पनि खाइसकेको छ ।

माघ ५, चितवन ।

राप्ती नगरपालिकामा स्वरोजगारमुलक फोटोग्राफी तथा भिडियोग्राफी तालिम विहीबार देखि सुरु भएको छ ।
राप्ती नगरपालिकाको सहयोग तथा ग्रीनलाईन मिडियाको आयोजनामा सन्चालन गरिएको सो तालिममा नगरपालिका भित्रका ३४ जना प्रशिक्षार्थीहरुको सहभागिता रहेको छ । उक्त तालिमको राप्ती नगरपालिकाका नगर प्रमुख शमशेर लामाले फोटो खिचेर औपचारिक उद्घाटन गर्नु भएको थियो ।

सो अबसरमा नगर प्रमुख लामाले युवाहरुमा सिप अभिबृद्धि गरी स्वावलम्बी र स्वरोजगार बनाउने उद्देश्यले कार्यक्रम आयोजना गरिएको बताउनु भयो । कार्यक्रममा बोल्दै वहाँले आउँदा दिनहरुमा यस्तै युवा लक्षित र समयको माग अनुसारको सिप अभिबृद्धि गर्ने तालिमहरु दिन आफुहरु सदैब तत्पर रहेको बताउनु भयो ।

कार्यक्रममा वडा नम्बर ५ का वडा अध्यक्ष सिताराम तामाङ्गले मान्छेलाई वाँच्न चाहिने दुइवटा आधारभूत कुराहरु शिक्षा र सीप भएको र युवाहरुलाई स्वरोजगार बनाउने उद्देश्यले सीपमूलक कार्यक्रमको आयोजना गरिएकोमा खुशी लागेको बताउनु भयो । पत्रकार ध्रुवराज खनालले सञ्चालन गर्नु भएको उक्त कार्यक्रममा संयोजक दिलीप डल्लाकोटीले तालिमको उद्देश्यका वारेमा प्रकाश पार्नु भएको थियो ।

७ दिन सम्म चल्ने उक्त तालिममा बेसिक फोटोग्राफी, भिडियोग्राफी, समाचार लेखन सम्बन्धी प्रशिक्षन दिइने आयोजक ग्रीन लाइन मिडियाका अध्यक्ष कोमल चन्द्र भगतले जानकारी दिनुभयो ।