समाचार

फागुन १०, चितवन । चितवनको कालिका नगरपालिकामा निःशुल्क आंखा शिविर सम्पन्न भएको छ । आइ फोर क्याम्प चितवन, सपोर्ट एण्ड केयर पुर्नस्थापना केन्द्र रत्ननगर चितवन, भरतपुर आंखा अस्पताल चितवन र नेपाल नेत्रज्योति संघको संयुक्त आयोजनामा निःशुल्क आंखा शिविर सम्पन्न भएको हो । चितवनका विभिन्न ६ ठाउंहरुमा आयोजना हुने ६ दिने निःशुल्क आंखा परिक्षण शिविर आज पहिलो दिन कालिका नगरपालिका वडा नं. ४ मा सम्पन्न भएको छ । शिविरमा ६ सय जनाले निःशुल्क आंखा जांचको सेवा लिएका छन् । आंखा जांच गराएका मध्य ३ सय ५६ जनालाई निशुल्क चश्मा वितरण गरिएको छ भने ४ सय जनालाई निशुल्क औषधी वितरण गरीएको छ । त्यस्तै ३८ जनालाई मोतियाविन्दुको शल्यक्रियाका लागि आजै भरतपुर आंखा अस्पताल लगि शल्यक्रियाको प्रकृया मिलाइएको सपोर्ट एन केयरका संयोजक प्रकाश साहले जानकारी दिनु भयो । शिविरमा सबै उमेर समुहका मानिसहरुको आंखा जांच गरिएको थियो ।

कालिका नगरपालिकाका नगर प्रमुख विनोद रेग्मीको प्रमुख आतिथ्यतामा भएको कार्यक्रममा कालिकाकी उप प्रमुख विमला लामा, कालिका ४ का निवर्तमान अध्यक्ष कृष्णलाल श्रेष्ठ, कालिका स्वास्थ्य शाखा प्रमुख दिपक भण्डारी, जर्मनी टिमका प्रतिनिधि बिग्रीट, काटीया, भरतपुर आंखा अस्पतालका बाह्यि कार्यक्रम संयोजक रमेश घिमिरे, भरतपुर आंखा अस्पतालका नेत्र अधिकृत विनोद पाण्डे, आइ क्याम्प फोर चितवनका संयोजक तथा सपोर्ट एन केयर पुर्नस्थापना केन्द्रका प्रतिनिधी प्रकाश साह, लियो जिल्ला परिषद ३२५ आर नेपालका अध्यक्ष लियो किरण लामिछाने विशिष्ट अतिथि रहनु भएको कार्यक्रममा रत्ननगर नगरपालिकाका स्वास्थ्य अधिकृत वासुदेव सापकोटाले स्वागत मन्तव्य राख्नु भएको थियो । जर्मनी टिमको लगानी, सपोर्ट एन केयरको व्यवस्थापन र आइ फोर क्याम्प चितवन, भरतपुर आंखा अस्पताल, नेत्रज्योती संघ रत्ननगर, रत्ननगर नगरपालिका, कालिका नगरपालिकाको संयुक्त आयोजनामा भएको शिविरमा जर्मनी टिमका प्रतिनिधीहरु अतिथि रहेका थिए । कार्यक्रम कालिका नगरपालिका वडा नं. ४ का वडा अध्यक्ष मकरमान श्रेष्ठको अध्यक्षतामा सम्पन्न भएको थियो ।

फागुन ९, काठमाण्डौं ।  काठमाडौँको नागार्जुन नगरपालिका–६ भैरबटोलमा एकै परिवारका तीन जनाको हत्या भएको छ । 

सोलखुम्बुको दूधकुण्ड घर भई नागार्जुन नगरपालिका–६ भैरबटोलमा बस्दै आएकी ३८ वर्षीया ईश्वरी श्रेष्ठ, निजकी आठ वर्षीया छोरी अनिशा श्रेष्ठ र साढे दुई वर्षकी नातिनी सिवानी श्रेष्ठको हत्या भएको जिल्ला प्रहरी परिसर काठमाडौँले जनाएको छ । हत्यामा निज ईश्वरीका श्रीमानको संलग्नता रहेको हुनसक्ने प्रहरीको प्रारम्भिक अनुमान छ । ईश्वरीका श्रीमान् राजु घिमिरे भनिने काजी विकको शव पनि घरभन्दा केही पर जङ्गलमा झुण्डिएको अवस्थामा फेला परेकाले उक्त हत्यामा निज काजी विककै हात रहेको अनुमान गरी अनुसन्धान थालेको प्रहरीले जनाएको छ । विहान साढे नौ बजेपछि कोठाभित्र शव देखेपछि स्थानीयले प्रहरीलाई खबर गरेका थिए ।

त्यसको केही समयपछि विक पनि घरभन्दा केही परको जङ्गलमा झुण्डिएको अवस्थामा स्थानीयले देखेका थिए । घटनाको थप अनुसन्धान भइरहेको र शव पोष्टमार्टमका लागि पठाइएको प्रहरीले जनाएको छ ।

फागुन ९, रत्ननगर । तस्विर : कोमल चन्द्र भगत ।  पछिल्लो समय आयुर्वेद उपचार पद्धतिप्रति बिरामीको आकर्षण बढेको छ । जिल्ला आयुर्वेद स्वास्थ्य केन्द्र रत्ननगरमा उपचार गराउन आउने बिरामीको संख्या निरन्तर बढ्दै गएको पाइएको छ । केन्द्रले बुधबार स्थानीय पत्रकारसँग गरेको अन्तर्क्रिया कार्यक्रममा दिइएको जानकारीअनुसार चालू आर्थिक वर्षको छ महिनामा २४ हजार तीन जना बिरामीले कार्यालयबाट विभिन्न सेवा लिएका छन् । बहिरङ्ग चिकित्सा सेवामार्फत सबैभन्दा बढी ७ हजार ७ सय ९१ जनाले सेवा लिएका छन् । यसैगरी, योग सेवा २ हजार ६ सय १०, पूर्वकम÷पञ्चकर्म सेवा ५ हजार ५ सय २७, ज्येष्ठ नागरिक सेवा १ हजार ९ सय ७५, स्तनपान आमा तथा शिशुसेवा १२०, नागरिक आरोग्य स्वास्थ्य सेवा २ हजार ७ सय ७९, प्रयोगशाला सेवा २ हजार ५ सय ४४, अकुपञ्चर सेवा ३३५, फिजियोथेरापी सेवा २८२ र अल्ट्रासाउन्ड सेवा ४० जनाले लिएको डा. कोपिला अधिकारीले जानकारी दिनुभयो ।

गत आर्थिक वर्षमा यी सबै सेवा लिनेको संख्या ४९ हजार ५ सय १३ थियो । केन्द्रका अतिरिक्त औषधालय, नागरिक आरोग्य सेवा केन्द्रहरु र जीवनशैली सेवामार्फत जिल्लाभरि सेवा दिँदै आएको छ । भरतपुरको शिवघाट, देवघाट, गुञ्जनगर, पटिहानी, मेघौली र डालेटारमा आयुर्वेद औषधालय रहेका छन् । यसका अतिरिक्त माडी र राप्तीको वीरेन्द्रनगरमा यी सेवा रहेका छन् । कालिका नगरपालिकाको सगुनटोल, खैरहनी नगरपालिकाको कुमरोज र इच्छाकामना गाउँपालिकाको चुम्लिङटारमा नागरिक आरोग्यसेवा केन्द्रहरु सञ्चालनमा छन् । केन्द्रले मुख्यमन्त्री जनता स्वास्थ्य, प्रदूषणबाट उत्पन्न स्वास्थ्य समस्या न्यूनीकरण, स्वास्थ्य जीवन प्रवद्र्धनलगायत कार्यक्रम गर्दै आएको छ । यसैगरी, योग तथा पूर्वकर्म अभिमुखीकरण, महिला स्वास्थ्य स्वयंसेविकालाई आयुर्वेदसम्बन्धी सचेतना, कर्मचारी पुनःताजगी योग अभ्यास कार्यक्रम सञ्चालन गर्दै आएको डा. अधिकारीले जानकारी दिनुभयो ।

केन्द्रले नमुना जडीबुटी उद्यान निर्माण, विद्युत् आयुर्वेद तथा योग शिक्षा, निःशुल्क आयुर्वेद स्वास्थ्य शिविर, नागरिक आरोग्यसेवा तथा अभियान, ज्येष्ठ नागरिक स्वास्थ्य प्रवद्र्धनजस्ता कार्यक्रम पनि गर्दै आएको छ । केन्द्र सञ्चालन तथा व्यवस्थापन समितिका अध्यक्ष राजेन्द्रकुमार श्रेष्ठले आयुर्वेद औषधि उपचारको व्यापक प्रचारप्रसार गर्नसकेमा यसले मानवस्वास्थ्य उपचारमा सहयोग पुग्ने बताए । केन्द्रको भौतिक पूर्वाधार र सेवा विस्तारसँगै बिरामीको आकर्षण बढेको उहांको भनाइ छ । केन्द्रलाई आगामी साउनदेखि २५ शैयाको अस्पतालको रुपमा विकास गरिँदै छ । हाल केन्द्रको अस्पताल भवन निर्माणाधीन छ । यससँगै विशेषज्ञ चिकित्सकसहितको दरबन्दी थप हुने र अन्तरङ्ग सेवा सुरू हुनेछ ।