समाचार

मंसीर १२, नवलपुर ।

। समाजसेवी एवम् राजनीतिक व्यक्तित्व स्वर्गीय तिलकप्रसाद सापकोटाको प्रथम वार्षिक पुण्य तिथि विविध कार्यक्रम गरी मनाइएको छ ।

सोमबारदेखि सुरु भएको वार्षिक पुण्य तिथिको कार्यक्रममा सोमबार नेपाली कांग्रेसका सभापति एवं पूर्व प्रधानमन्त्री शेरबहादुर देउवा, गण्डकी प्रदेशका मुख्यमन्त्री सुरेन्द्रराज पाण्डे, कांग्रेसका महामन्त्री गगनकुमार थापा, कांग्रेस गण्डकी प्रदेश सभापति शुक्रराज शर्मा, गण्डकी प्रदेशका गण्डकी प्रदेशका कृषि तथा भूमि व्यवस्था मन्त्री महेन्द्रध्वज जिसीलगायतका नेताहरुको उपस्थिति रहेको थियो । वार्षिक पुण्य तिथिको कार्यक्रममा नेपाल सन्त समाजका केन्द्रीय अध्यक्ष एवं हरिहर सन्न्यास आश्रम देवघाटधामका पीठाधीश एक हजार आठ स्वामी ज्ञानानन्द सरस्वती, मुक्तिनान पीठाधीश स्वामी कमलनयनाचार्यलगायतका सन्तहरुकोसमेत उपस्थिति रहेको थियो ।

राष्ट्रिय समाचार समिति (रासस)का वरिष्ठ सम्पादक कृष्णप्रसाद सापकोटाको पितासमेत रहनुभएका तिलकप्रसादको पुण्यतिथिका अवसरमा आज रक्तदान, स्वर्गीय सापकोटाको जीवनीमा आधारित श्रव्यदृश्य सामग्री प्रदर्शन, स्वर्गीय सापकोटामा समर्पित पत्रिकाको विशेषाङ्क लोकार्पण, कवि गोष्ठी, लक्ष्यदीप प्रज्ज्वलनसहितका कार्यक्रम गरिएका छन् । श्रद्धाञ्जलिसभा कार्यक्रममा साहित्यकार डा नवराज लम्साल, गोविन्दराज विनोदी, राससका प्रधान सम्पादक एकराज पाठक, गण्डकी प्रदेशका पूर्व सांसद विष्णु लामिछानेले विजय खबर विशेषाङ्क लोकार्पण गर्नुभएको थियो । विशेषाङ्कमा स्वर्गीय सापकोटाको जीवनीसहित उहाँले गर्नुभएका र उहाँका बारेमा लेखहरु समावेश गरिएको राससका प्रधान सम्पादक पाठकले जानकारी दिनुभयो ।

त्यसैगरी, स्वर्गीय सापकोटाको योगदानमा आधारित कवि गोष्ठीमा साहित्यकार डा नवराज लम्साल, हीरालाल कँडेल, लक्ष्मीकान्त शर्मा (लकाश)लगायतले कविता वाचन गर्नुभएको थियो । त्यसैगरी, स्वर्गीय सापकोटाको पुण्य तिथिका अवसरमा उहाँकै निवासमा नेपाली कांग्रेस गैँडाकोट–८ वडा समितिले खुल्ला रक्तदान कार्यक्रम गरेको छ । सो कार्यक्रममा ३५ जनाले रक्तदान गरेका स्वर्गीय सापकोटाका ज्येष्ठ सुपुत्र केशवप्रसाद सापकोटाले जानकारी दिनुभयो ।

लोकतन्त्रको स्थापना र शिष्ट राजनीतिक संस्कारको निर्माणका लागि १४ वर्षको उमेरदेखि ७९ वर्षको उमेरसम्म पनि सापकोटा निरन्तर संघर्षरत रहनुभएको थियो । सापकोटाले आफ्नो जीवनकालका महत्वपूर्ण समय समाजसेवा र राजनीतिको माध्यमबाट सामाजिक–आर्थिक रूपान्तरणको अभियानका लागि लगाउनुभयो । सापकोटा नेपाली काँग्रेस गैँडाकोटका संस्थापक अभिभावक हुनुहुन्छ ।

सापकोटा नेपाली कांग्रेसमा २०१५ सालदेखि सक्रिय रहनुभएको थियो । सापकोटाले जननेता वीपी कोइरालाबाटै कांग्रेसको सदस्यता लिनुभएको थियो । आफू राजनीतिक र सामाजिक रुपमा स्थापित रहेको नवलपुर–१ मा कांग्रेसका तर्फबाट आफूले पाएको संसदीय टिकट नेता शशांक कोइरालालाई दिएर पटक–पटक कोइरालालाई संसद् पठाउने त्यागी नेताका रुपमा सापकोटा चिनिनुहुन्छ । सापकोटाले आफ्नो जीवनकालमा भाषा, संस्कृति, धर्म, सामाजिक कर्म, विकास निर्माणका विभिन्न क्षेत्रमा योगदान पु¥याउनुभएको छ ।

जीवनको उत्तराद्र्धमा श्वासप्रश्वास सम्बन्धि समस्याबाट पीडित सापकोटाको ७९ वर्षको उमेरमा गत वर्षको कात्तिक २३ गते उपचारका क्रममा अस्पतालमा निधन भएको थियो ।

मंसीर १०, रत्ननगर । रत्ननगरको टिकौलीचौरमा पौष अन्तिम साता हुने रत्ननगर महोत्सवको सफल सम्पन्नताको लागि नगर स्तरीय राजनीतिक दलहरुसंग आइतबार अन्तरक्रिया गरिएको छ । महोत्सवलाई सार्थक र सफल बनाउन राजनीतिक दलले खेल्नु पर्ने भूमिका र स्थानीयबासीको मागको विषयमा छलफल गरिएको रत्ननगर उद्योग बाणिज्य संघका अध्यक्ष शंकर गिरीले जानकारी दिए । राजनीतिक दलहरुले महोत्सवमा स्थानीय व्यवसायी र स्थानीय उत्पादनलाई प्राथमिकता दिन आग्रह गरेका छन् । महोत्सवको स्थान परिर्वतनको विषय उठिरहेका बेला राजनीतिक दलहरु यस पटकको महोत्सव टिकौलीमै गर्न र त्यसपछिका महोत्सवमा स्थानको विकल्प खोज्न संघलाई आग्रह समेत गरेका छन् । कृषि क्षेत्रको विकासका लागि विज्ञहरु सहितको अन्र्तक्रिया, गाउँबाट आउनेलाई यातायातको व्यवस्था, संघले चित्रसारी मेलाको समेत अपनत्व दिनुपर्ने, अधिकारकर्मीहरुको मागलाई सम्बोधन, गुणस्तरहिन सामानको विक्री वितरणमा रोक लगाउन दलहरुले आग्रह गरेको संघका महासचिव उपेन्द्रशर्मा आचार्यले जानकारी दिए । कार्यक्रममा नेपाली काँग्रेस कार्यबहाक नगर सभापति अपिल अधिकारी, एमालेका नगर अध्यक्ष इश्वरी अर्याल, माओवादी केन्द्रका नगर अध्यक्ष श्याम बराल, राष्ट्रिय स्वतन्त्र पार्टीका नगर अध्यक्ष रामनाथ भट्टराई, राप्रपाका नगर अध्यक्ष गोविन्द अधिकारी, एकीकृत समाजबादीका नगर सचिव इश्वरराज अधिकारी लगायतको उपस्थिति रहेको थियो । संघका अध्यक्ष गिरीको अध्यक्षतामा भएको कार्यक्रममा बरिष्ठ उपाध्यक्ष निराजन खनाल सहित पूर्व अध्यक्षहरु तथा कार्यसमितिका पदाधिकारी र सदस्यहरुको सहभागिता रहेको थियो । रत्ननगर उद्योग बाणिज्य संघको आयोजनामा पौष २६ गते देखि माघ ८ गते सम्म सञ्चालन हुने सो महोत्सव यस पटक १२औं संस्करण हो । चितवनको आर्थिक विकास गर्ने उद्देश्यले सो महोत्सव हुँदै आएको छ । महोत्सवमा बृहत् व्यावसायिक कृषि प्रदर्शनी तथा प्रतियोगिता, ताजा तरकारी, थोपा सिँचाइ प्रविधि, केरा, च्याउ, दुग्धजन्य पदार्थ, पोल्ट्री, महसँगै यहाँ प्रवल सम्भावना भएका कृषि तथा पशुजन्य व्यवसायलाई विशेष जोड दिइनेछ । स्थानीयस्तरमा उत्पादित ताजा तरकारी, फलफूल, दुग्धजन्य पदार्थ, पोल्ट्रीलगायत कृषि व्यवसायसँग सम्बन्धित विभिन्न सेवा, प्रविधि एवं मल बीउबिजन महोत्सवमा प्रदर्शनको व्यवस्था गरिने छ ।

मंसिर ९, देवघाट ।

हजारौं भक्तजनको प्रतक्ष्य सहभागितामा देवघाटधाम गण्डकी परिक्रमा महोत्सव शनिबार सम्पन्न भएको छ । मध्य नेपालको तनहुँ, चितवन र नवलपुर जिल्लामा फैलिएको पवित्र तिर्थस्थल देवघाटधाम र गन्डकी नदीको संगमको पुर्ण पावन उर्जा प्राप्त गर्न र संसारकै दुर्लभ तिर्थस्थल देवघाटधामको धार्मिक महत्व एवं भौतिक विकासलाई प्रवद्र्धन गर्दै बैदिक सनातन धर्म र संस्कृतिको प्रचार प्रसार गर्ने उद्देश्यले आयोजित उक्त गण्डकी परिक्रमा कार्यक्रममा सयौँ धार्मिक संघ–संस्थाको प्रत्यक्ष सहभागिता रहेको थियो । नेपाल सन्त समाजको आह्वानमा देवघाट गाउँपालिका र देवघाट क्षेत्र विकास समितिको व्यवस्थापन र समन्वयमा सञ्चालन भएको महोत्सवले देवघाटमा नयाँ सम्भाव्यताको ढोका खोलेको पुष्टि भएको छ । विगतका वर्षमा भन्दा यसपटक बृहद् रुपमा सञ्चालन गरिएको परिक्रमा गलेश्वर आश्रम देवघाटका पीठाधीश श्री १००८ स्वामी आत्मानन्द गिरि, नेपाल सन्त समाजका अध्यक्ष श्री १००८ स्वामी ज्ञानानन्द सरस्वती र महेश संन्यास आश्रमका पीठाधीश श्री १००८ स्वामी रमणानन्द गिरि, चैतन्य कृष्ण आदिको विशेष उपस्थिति तथा प्रेरणा र अन्य सन्तहरूको सहभागितामा व्यवस्थित रूपले सञ्चालन भएको हो । तनहुँ, चितवन र नवलपुरमा पर्ने देवघाट क्षेत्रको २५ कि.मि. पैदल यात्रा मार्फत गरिएको परिक्रमामा हजारौँ तीर्थयात्रीहरूको उपस्थिति रहेको थियो । शनिबार विहान ७ बजे पवित्र कालीगण्डकी र त्रिशूली नदीको सङ्गममा शालग्राम शिला र गण्डकीको पूजा सङ्कल्प गरी देवघाट गाउँपालिका अध्यक्ष तिलबहादुर थापा र देवघाट क्षेत्र विकास समितिका कार्यकारी निर्देशक सदन बरालको स्वागत मन्तव्य तथा गलेश्वर आश्रमका पीठाधीश महामण्डलेश्वर स्वामी आत्मानन्द गिरिको आशीर्वचन सहित परिक्रमा कार्यक्रम सुरु भएको थियो । धार्मिक झाँकी, भजन–कीर्तन र पूजा–आजा सहित परिक्रमा निकै व्यवस्थित रूपमा सम्पन्न भएको थियो । विशेष गरी देवघाट क्षेत्रका गलेश्वर आश्रम (सिद्धेश्वर मन्दिर), चक्रवर्ती आश्रम (मणिमुकुन्देश्वर मन्दिर), महेश संन्यास आश्रम (विद्येश्वर मन्दिर), हरिहर आश्रम (हरिहर मन्दिर), श्रीराम मन्दिर, लक्ष्मीनारायण मन्दिर, गणेश मन्दिर, देवघाट सार्वजनिक पुस्तकालय, देवघाट सिकाइ केन्द्र लगायत अन्य मठ मन्दिरका पीठाधीश एवम् आचार्य र बटुकहरू तथा कल्पवासिहरूको परिक्रमामा मुख्य उपस्थिति रहेको थियो । यसै गरी चितवनतर्फ सीताराम संस्कृत मावि, रामजानकी बालिका आश्रम, रामजानकी गार्गी कन्या गुरुकुल, लक्ष्मीनारायण मन्दिर, यज्ञशाला मन्दिर, राम मन्दिर, राधादामोदर मन्दिर, योगी नरहरीनाथ गौ संरक्षण केन्द्र, लगायत विभिन्न संघसंस्थाका प्रमुख एवम् विद्यार्थीहरूको उपस्थिति रहेको थियो । भरतपुर आँपटारी क्षेत्रबाट स्कोन चितवन, ॐ शान्ति नारायणगढ, वागीश्वरी आध्यात्मिक परिषद् लगायतका संघ–संस्थाले स्वागतसहित सहभागिता जनाएका थिए । देवघाट र गण्डकीको महिमागान गर्दै अघि बढेको परिक्रमालाई धार्मिक सेवा समिति मौलाकालिकाको टोलीले स्वागत गरेको थियो । गैँडाकोट क्षेत्रबाट परिक्रमा महोत्सवको सहसंयोजन गरेको मौलाकालिका मन्दिर व्यवस्थापन समितिको आह्वानमा त्यस क्षेत्रका अधिकांश धार्मिक संघसंस्था, मठमन्दिर र आमासमूहहरूले तीर्थयात्रीहरूको भव्य स्वागत सत्कार गरेका थिए । देवघाट गाउँपालिकाका उपाध्यक्ष भुवनसिंह गुरुङ्गले गण्डकी परिक्रमाले अध्यन अबलोकन संगै देवघाट गाउँपालिकाको पर्यटकीय बिकासलाई पनि छिमेकी जिल्लाहरुसँग समन्वय गरि अगाडी बढाउने बताए । देवघाट गण्डकी परिक्रमाद्वारा देवघाट क्षेत्रको धार्मिक, सांस्कृतिक, पर्यटकीय तथा आर्थिक समग्र विकासमा टेवा पुग्ने गाउँपालिका उपाध्यक्ष गुरुङ्गले बताए । महेश सन्यास आश्रमका पीठाधीश स्वामी रमणानन्द गिरिको आशीर्वचनपछि परिक्रमा यात्रा पूर्ण भएको थियो ।