समाचार

साउन ६, भरतपुर/ चितवन उद्योग संघको आयोजनामा चितवन प्रदर्शनी केन्द्रमा “शनिबारे स्थानीय उत्पादन प्रबद्र्धन मेला” को एक कार्यक्रमका बीच शुभारम्भ गरिएको छ ।
चितवन उद्योग संघका अध्यक्ष त्रिलोचन कँडेलको अध्यक्षतामा सम्पन्न मेलाको भरतपुर महानगरपालिकाकी प्रमुख रेनु दाहालले उद्घाटन गर्नुभएको थियो । प्रमुख अतिथि दाहालले स्वदेशी, स्थानीय, रैथाने, मौलिक र पराम्परागत उत्पादन तथा खाद्यान्नका परिकारहरु, घरेलु हस्तकलाका सामानहरु, स्वदेशमा नै उत्पादित ताजा फलफुल तथा तरकारीहरु एकै स्थानमा पाईने मेलाले स्थानीय उपभोक्ताहरुको मन जित्ने बताउनुभयो । यस्ता खाले मेलाले वास्तविक किसानहरुको प्रतिनिधित्व गर्ने विश्वास व्यक्त गर्नुभयो । उहाँले मेलाबाट समग्र स्थानीय क्रेता तथा विक्रेताहरुको आवश्यकतालाई पूर्ति गर्न सक्ने विश्वास समेत व्यक्त गर्नुभयो ।
चितवन उद्योग संघका अध्यक्ष त्रिलोचन कँडेलको स्वागतसँगै मेलाको बारेमा जानकारी गराउनु भएको थियो । अध्यक्ष कँडेलले उत्पादनमा आत्मनिर्भर नभएसम्म विभिन्न विषम परिस्थितिको सामना गर्न चूनौतिपूर्ण हुने गरेको विगतको इतिहासलाई समेत मध्यनजर गर्दै स्वदेशी उत्पादनको प्रवद्र्धनात्मक कार्यलाई उच्च महत्व दिँदै प्रदर्शनी तथा प्रवद्र्धन मेला आयोजना गर्दैे आइरहेको सन्दर्भमा स्थानीय तथा रैथाने कृषिजन्य उत्पादन, खाद्यान्न तथा परिकारहरुलाई समेत उत्पादन र बजारीकरणका माध्यमबाट उद्यमशिलतामा जोड्ने र स्वरोजगार बनाउन सहयोग पु¥याउने उद्देश्य सहित Farm to Kitchen अवधारण अनुसार भरतपुर भ्रमण २०२४ लाई लक्षित गर्दै मेलाको आयोजना गरिएको बताउनुभयो ।
आगामि हप्ताहरुमा आयोजना गरिने मेलाहरुमा विभिन्न उत्पादनहरुलाई जोड्दै लैजाने अध्यक्ष कँडेलले बताउनुभयो ।
प्रत्येक शनिबार बिहान ६ः०० बजेदेखि ११ः०० बजेसम्म आयोजना गरिने “शनिबारे स्थानीय उत्पादन प्रबद्र्धन मेला” मा स्वदेशी, स्थानीय, रैथाने, मौलिक र पराम्परागत उत्पादन तथा खाद्यान्नका परिकारहरु, घरेलु हस्तकलाका सामानहरु, स्वदेशमा नै उत्पादित ताजा फलफुल तथा तरकारीहरु, चिउरी, तामा, कुसुम, न्यूरो, लरकैया, मह, गिठ्ठा, भ्याकुर, घरेलु अचार तथा भान्साका लागि चाहिने आवश्यक परिकारहरु, स्थानीय रैथाने उत्पादन र कोदो तथा फापरको रोटी, सेलरोटी, पोल्ट्रीजन्य, दुग्धजन्य उत्पादनहरु, गेडागुडीहरु, चिया, कफि तथा हर्वल सामाग्रीहरु र खानाका विभिन्न परिकारका ४० वटा स्टलहरु रहेका छन् ।
मेलाको माध्यमबाट पूर्ण उपभोग हुन नसकेका उत्पादनहरुको बजारीकरणमा सहयोग हुने र व्यवसायिक उत्पादनका लागि प्रोत्साहन मिलि नव उद्यमी सृजना गर्नमा समेत सहयोग पुग्ने र मेलाको माध्यमबाट सुस्ताएको वर्तमान आर्थिक गतिविधिलाई समेत चलायमान बनाउन र स्थानीय व्यवसायको प्रवद्र्धनका लागि समेत सहयोग पुग्ने अध्यक्ष कँडेलले बताउनुभयो ।
मेलामा चितवनका प्रमुख जिल्ला अधिकारी सुरेन्द्र पौडेल, बागमती प्रदेश उद्योग परिसंघका अध्यक्ष भेषराज दुवाडी, जिल्ला प्रहरी कार्याालय चितवनका प्रहरी उपरीक्षक रामेश्वर कार्की, शसस्त्र प्रहरी बल नेपाल नं. १७ गण चितवनका सशस्त्र प्रहरी उपरीक्षक शशी पाण्डे, नेपाल पत्रकार महासंघ जिल्ला शाखा चितवनका अध्यक्ष नारायण प्रसाद अधिकारी, उद्योग वाणिज्य संघ चितवनका अध्यक्ष चुननारायण श्रेष्ठ, संघका पूर्व अध्यक्षहरु, निवर्तमान अध्यक्ष, बरिष्ठ उपाध्यक्ष, पदाधिकारी एवम् कार्यसमिति सदस्यहरु, सुरक्षा निकायका प्रमुख एवम् प्रतिनिधिहरु, सरकारी तथा गैह्र सरकारी कार्यालयका प्रमुख एवम् प्रतिनिधिहरु, चितवन चेम्बर अफ कमर्शका अध्यक्ष एवम् प्रतिनिधिज्यूहरु, भरतपुर महानगरपालिका वडा नम्बर १० का वडा अध्यक्ष, संघका वस्तुगत समितिका अध्यक्ष एवम् प्रतिनिधिहरु, पालिका समितिका अध्यक्ष एवम् सदस्यहरु, स्थानीय टोल विकास संस्थाका अध्यक्षहरु, महिला तथा युवा उद्यमी मञ्चका अध्यक्ष एवम् सदस्यहरु लगायतको उपस्थिति रहेको थियो ।
चितवन उद्योग संघका कार्यकारी निर्देशक गणेश प्रसाद सिलवालले सञ्चालन गर्नुभएको कार्यक्रमलाई चितवन उद्योग संघका बरिष्ठ उपाध्यक्ष सूर्यप्रसाद न्यौपानेले धन्यवाद मन्तव्य सहित समापन गर्नुभएको थियो ।

साउन २, चितवन ।
चितवनमा चैते धान खेती गरेका छ हजार नौ सय ९३ कृषकले चैतेधान प्रोत्साहन अनुदान रकम प्राप्त गरेका छन् । सरकारले चैते धान लगाउने किसानलाई आकर्षित गर्न अनुदान रकम वितरण गरेको हो । बीस कट्ठासम्म धान लगाएका किसानले प्रतिकट्ठा रु एक सयका दरले र सोभन्दा बढी धान लगाएका किसानले रु ९५ का दरले अनुदान रकम प्राप्त गरेको कृषि ज्ञानकेन्द्रकी निमित्त प्रमुख कमला न्यौपानेले जानकारी दिनुभयो । उहाँका अनुसार यस कार्यक्रमका लागि जिल्लाका पाँच पालिकाका कृषकले आवेदन दिएका थिए ।
खैरहनी, राप्ती, रत्ननगर, माडी नगरपालिका र भरतपुर महानगरपालिकामा चैते धान खेती गरेका कृषकले अनुदानस्वरुप रकम पाऊँ भनी निवेदन दिएका थिए । उहाँका अनुसार ४ हजार २५ विगाह १५ कठ्ठामा चैतेधान खेती भएको निवेदन परेको थियो । निवेदनपश्चात् स्थलगत अनुगमन र प्रमाणीकरणपछि तीन हजार सात सय छ बिघा जमिनमा लगाइएको धान खेतीका लागि प्रोत्साहन रकम वितरण गरिएको हो ।
प्रोत्साहन कार्यक्रमका लागि सङ्घीय सरकारले रु ७५ लाख विनियोजन गरेको थियो । कार्यक्रमअनुसार प्रतिकट्ठा रु चार सय दिनुपर्नेमा कृषकको निवेदन धेरै परेसँगै सबैलाई मिलाएर प्रोत्साहन रकम दिने निर्णयअनुसार अनुदान रकम दिइएको हो । जिल्लामा सबैभन्दा धेरै खैरहनी नगरपालिकामा चैतेधान खेती गरिँदै आइएको छ ।रासस

साउन २, काठमाण्डौं । प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ’प्रचण्ड’ की पत्नी सीता दाहालको सम्झनामा श्रद्धाञ्जली सभा गरिएको छ ।

सीता दाहालको निधन भएको सातौं दिनमा मंगलबार प्रधानमन्त्री निवास बालुवाटारमा श्रद्धाञ्जली सभा आयोजना गरिएको हो । श्रद्धाञ्जली सभामा उपराष्ट्रपति रामसहायप्रसाद यादव, सभामुख देवराज घिमिरे, राष्ट्रियसभा अध्यक्ष गणेश प्रसाद तिमिल्सिना, प्रधानन्यायाधीश हरिकृष्ण कार्की, पूर्व प्रधानमन्त्री , बिभिन्न दलका नेता, शुभेच्छुक लगाएत सहभागी भएका थिए । श्रद्धाञ्जली सभामा प्रचण्डले सीता दाहालको निधनमा समवेदना प्रकट गर्ने सबैलाई धन्यवाद प्रकट गर्नुभयो । उहाले शोकको घडीमा पाएको साथले पीडाबाट निस्कन मद्दत गरेको र थप जिम्मेवार हुन प्रेरित महसुस गरिरहेको उल्लेख गर्नुभयो । प्रचण्डले सीता दाहाल बिरामी भएपछि राज्यबाट कुनै सुविधा नलिकैन हामीले उपलब्ध र लाभदायी हुन सक्ने सबै खालको पद्धतिबाट उपचारको प्रयास पनि गरेको बताउनुभयो ।
प्रचण्डले अन्तिम अवस्थामा आईसीयू वा भेन्टिलेटरमा पीडादायी मृत्युवरण देख्नुपर्छ कि भन्ने चिन्ता रहेको भन्दै बाँच्दासम्म अरूलाई पीडा दिन नजानेकी सीताले मृत्यु पनि निकै शान्त रोजेको बताउनुभयो । लामो समयदेखि अस्वस्थ सीता दाहालको असार २७ गते काठमाडौंको नर्भिक अस्पतालमा निधन भएको थियो ।