समाचार

चितवन, २५ असार । तस्वीर कोमल चन्द्र भगत ।

चितवनको भरतपुरमा रहेको एलाईभ हस्पिटल एण्ड ट्रमा सेन्टरले आफ्नो १२ औं वर्षकोत्सव मनाएको छ । आइतबार एक कार्यक्रमको आयोजना गरी अस्पतालले आफ्नो वार्षिकोत्सव मनाएको हो । बि.सं. २०६८ साल असार २४ गते यो अस्पतालले औपचारीक सेवा शुरु गरेका हो । अस्पतालमा विरामी उपचारमा भएको बाह्र वर्षको अनुभवलाई समेटेर “प्राक्टिस अफ अर्थोपेडिक्स ईन नेपाल” नामक पुस्तक विमोचन गरिएको छ । वरिष्ठ अर्थोपेडिक्स सर्जन प्रोफेसर डा. आनन्द रेग्मीले उक्त पुस्तकको विमोचन गर्नुभएको हो । यस पुस्तकमा १२ वर्षको अवधिमा अस्पतालले कति केस ग¥यो, कति इमर्जेन्सी आए, कति अप्रेशन (शल्यक्रिया) गरियो, अप्रेसनमा पनि कुनचाहि विधामा कति गरियो र के गरियो र के रिजल्ट आयो भन्ने कुराहरलाई राखेर पुस्तक प्रकाशन गरिएको छ । यो पुस्तकमा अस्पतालको तथ्यांक (डाटा) विश्लेषण गरिएको छ । यस अस्पतालले सामान्य देखि नजुटेको (नजोडिएको), इन्फेक्सन भएको, बिग्रेको, स्टिल भाँचिएको मात्रै होइन, विदेशमा गरिएका असफल उपचारलाई पनि पुनः उपचार गरी निको बनाएको अस्पतालका अध्यक्ष डा. प्रमोद लामिछानेले बताउनु भयो । विदेशमा उपचार गराएर नजुटेको, इन्फेक्सन भएको बिरामी समेत यहाँ आएर उपचार गराएर राम्रो भएर जानुभएको छ उहांले भन्नुभयो । हाडजोर्नी तथा नसा रोग विशेषज्ञ डा. लामिछानेको नेतृत्वमा सञ्चालित अस्पतालमा १२ वर्षको अवधिमा ७० हजार बिरामीलाई सेवा दिईएको छ । १२ वर्षको अवधिमा मुख्य रुपमा हाडजोर्नी तथा नसा रोगको उपचार हुने अस्पतालमा चोटपटक लगायतका ७० हजार शल्यक्रिया भैसकेका छन् । अस्पतालले ११ वर्ष ६ महिनाको अवधिमा १४ हजार ठूल्ठूला हाडजोर्नी सम्बन्धी शल्यक्रिया गरेका छ । ती मध्ये अधिकांश चोटपटकका छन् । यस अस्पतालमा टाउकोदेखि खुट्टासम्म भएका चोटपटकका उपचार हुन्छन् । मुख्य गरेर हाडजोर्नी तथा नसा रोग सम्बन्धी चोटपटकको सम्पूर्ण उपचार हुन्छ । सम्पूर्ण हाड जोर्नी भाँचिएको, नजोडिएको, इन्फेक्सन भएको उपचार हुन्छ । केही मात्रामा चोटपटकसँग सम्बन्धित न्यूरो सम्बन्धी उपचार पनि हुने गरेको डा. लामिछानेले बताउनु भयो । अनुहारसम्बन्धी चोटपटक, अनुहार बाङ्गोटिङ्गो भएको, चोटपटकले बिग्रिएको अनुहारको यहाँ उपचार हुने उहांको भनाइ छ । वरिष्ठ अर्थोपेडिक्स सर्जन प्रोफेसर डा. आनन्द रेग्मीको प्रमुख आतिथ्यतामा भएको कार्यक्रममा निजी अस्पताल एशोसियसनका अध्यक्ष नारायण कुंवरले मन्तव्य राख्नुभएको थियो । कार्यक्रममा अस्पतालमा लामो समयदेखि कार्यरत कर्मचारी, नर्स, डाक्टर ५ जनालाई सम्मान गरिएको थियो । त्यस्तै निजी अस्पताल एशोसियसनले अस्पतालको उन्नति प्रगतिको कामना गर्दै अस्पतालका अध्यक्ष डा.प्रमोद लामिछाने र उहांकी धर्मपत्नी सरिना चुडालाई मायाको चिनो प्रदान गरिएको थियो । कार्यक्रममा अस्पतालकी पुर्व अध्यक्ष स्व. विष्णुमाया खरेलप्रति श्रद्धाञ्जली अर्पण गरिएको थियो ।

चितवन, असार १६ ।

चितवनको रत्ननगर नगरपालिकामा वृत्ति मार्ग निर्देशन तथा रोजगार मेला सुरु भएको छ । रत्ननगर–१ स्थित होटल स्टार चितवनमा शुक्रबार देखि सुरु भएको मेलाको रत्ननगर नगरपालिका र भरतपुर महानगरपालिकाले संयुक्तरुपमा आयोजना गरेका हुन् । मेलाको उद्घाटनका क्रममा रत्ननगर नगरपालिकाका प्रमुख प्रह्लाद सापकोटाले नगरवासी युवालाई स्वरोजगार बनाउन र रोजगारीको अवसर सिर्जना गर्न रत्ननगर नगरपालिका लागिपरेको बताउनुभयो । उहाँले आफ्नो क्षमता पहिचान गरी उद्यमी बन्न चाहने युवालाई आवश्यक तालिमको व्यवस्था गर्ने र रोजगारदातासँग समन्वय गरी रोजगारीको अवसर दिलाउन मेला आयोजना गरिएको सापकोटाको भनाइ छ । सीप र क्षमता भएका व्यक्ति कोही पनि बेरोजगार बन्नु नपर्ने उल्लेख गर्दै उहाँले भन्नुभयो, “स्वदेशमै उद्यमी बन्न होस् वा वैदेशिक रोजगारीमै जानका लागि पनि आवश्यक पर्ने तालिम लिनुपर्छ । हामीले इन्स्योर परियोजनाअन्र्तगत हेल्भेटास नेपालको प्राविधिक सहयोगमा तालिम दिन प्रतिबद्ध छौँ ।” कार्यक्रममा नगर उपप्रमुख यादवप्रसाद पाठकले शैक्षिक योग्यता, दक्षता र क्षमता हुँदाहुँदै पनि रोजगारीको अवसरबाट वञ्चित भएकाले मेलाबाट लाभ उठाउन सक्ने र सीप सिक्न चाहनेका लागि विभिन्न तालिममा सहभागी गराइने बताउनुभयो । रत्ननगर नगरपालिकाका प्रमुख प्रशासकीय अधिकृत छविलाल सुवेदीले रोजगारीको खोजीमा रहेका र रोजगारी दिनेबीच प्रत्यक्ष भेट गराएर रोजगारीको अवसर सिर्जना गर्न मेला कोसेढुङ्गा सावित हुने बताउनुभयो । उहाँले मेला अवलोकन गरी लाभ लिन नगरवासीसँग आह्वानसमेत गर्नुभएको छ । कार्यक्रममा उद्योग वाणिज्य सङ्घ चितवनका वरिष्ठ उपाध्यक्ष सुमनकुमार श्रेष्ठले विभिन्न उद्योगमा अहिले जनशक्तिको अभाव भइरहेको जनाउँदै आवश्यक सीप सिकेर दक्ष बन्न सकेको अवस्थामा एक हजार बढी युवालाई रोजगार प्रदान गर्न सकिने बताउनुभयो । मेलामा रोजगारदाता कम्पनी तथा सीप सिकाउने कम्पनीका गरी गरी ३४ प्रदर्शनी कक्ष छन् । रासस

भरतपुर, १५ असार ।
पत्रकार विवेक पोख्रेल युवा आधुनिक सामूहिक खेती फर्मको प्रथम कृषि सम्मान पुरस्कार– २०८० बाट सम्मानित भएका छन्। नयाँ पत्रिका राष्ट्रिय दैनिकमा पाँच वर्षदेखि कार्यरत पोख्रेललाई किसानमा समर्पित पत्रकारिता सेवामा महत्त्वपूर्ण योगदान पु¥याएबापत २०औँ राष्ट्रिय धान दिवस एवं रोपाइँ महोत्सवको अवसरमा सम्मान गरिएको हो। भरतपुर– २० मा नेपाल समाजवादी महासंघ, युवा आधुनिक सामूहिक किसान फर्म र साकम्भरी ताजा तरकारी कृषि सहकारी संस्थाले संयुक्त रूपमा आयोजित महोत्सवमा पूर्वप्रधानमन्त्री डा. बाबुराम भट्टराई र युवा आधुनिक सामूहिक खेती फर्मका अध्यक्ष अधिवक्ता लेखनाथ भुसालले खादा ओडाएर प्रमाणपत्र र नगद १० हजारसहित पोख्रेललाई सम्मान गरेका हुन्।
भरतपुर– २५ रहेको युवा आधुनिक सामूहिक खेतीले यसै वर्षदेखि कृषि सम्मान पुरस्कारको सुरुवात गरेको छ। ०७७ सालमा स्थापना भएको सो फर्ममा २५ युवाले सय बिघाभन्दा बढी जग्गामा खेती गर्दै आएको संस्थाका सचिव सुमन सुवेदीले जानकारी दिए। उनले कृषि सम्मान पुरस्कारलाई आगामी वर्षहरूमा पनि निरन्तरता दिँदै जाने बताए। कृषिलगायतका विषयमा चितवनबाट पत्रकारिता गर्दै आएका पोख्रेलले कृषि सेरोफेरो र डेरी चौतारी रेडियो कार्यक्रसमेत उत्पादन गर्दै आएका छन्। जुन किसानको विचमा लोप्रिय मानिन्छ । पोख्रेल पश्चिम चितवन पत्रकार मञ्चका सह सचिव समेत हुन् ।