समाचार

भदौ ९, चितवन । भरतपुर वडा नम्बर ९ मा रहेको केन्द्रीय बस टर्मिनल भरतपुरलाई नमुना बस पार्कको रुपमा विकास गरिने बताउनुभएको छ । भरतपुर ९ मा रहेको मिलन सचेतना महिला समूहको नवनिर्मित भवनको उद्घाटन समारोहलाई सम्बोधन गर्दै प्रमुख दाहालले अहिले धमाधम स्तरोन्नतिको कार्य भईरहेको जानकारी दिनुभयो । बस पार्क हरियाली बनाउन वृक्षरोपण, सरसफाई, मर्मत सम्भारलगायतका कार्य भईरहेको प्रमुख दाहालले बताउनुभयो । सघन सहरी विकास मन्त्रालयबाट रु १० करोड र भरतपुर महानगरपालिकाले छुट्टै लगानी गरी बस पार्कलाई नमुना बनाउनेतर्फ केन्द्रित रहेको उल्लेख गर्नुभयो । बस पार्कको रंग रोगन, कालो पत्र, हरियाली गराउने कामसँगै सरसफाईको कामलाई एक साथ अगाडि बढाईएको जानकारी दिनुभयो । नमुना बस पार्क निर्माणका लागि नियमित अनुगमन र सरसफाई गर्नुपर्ने उहाँको भनाई छ । जिम्मेवारी पूर्ण ढङ्गबाट दैनिक बास पार्कको नियमन गरे गर्व गर्न लायक बस पार्कको रुपमा परिचित गराउन सकिने धारणा पनि राख्नुभयो । महानगरको हरेक विकास निर्माणमा सक्रिय टोल विका संस्था र महिला समूहलाई जोडिएर काम गर्न आह्वान पनि गर्नुभयो । विभिन्न सामाजिक कार्यमा अग्रसर मिलन सचेतना महिला समूहले शनिबार एक कार्यक्रमका बीच भवन निर्माण गर्ने दातालाई सम्मान गरेको छ । करिब १९५ जना सेयर सदस्य रहेको संस्थाको भवन निर्माण गर्न भरतपुर महानगरपालिका, वडा नं ९ तथा स्थानीय दानवीरहरुको सहयोग भएको अध्यक्ष लक्ष्मी सापकोटा कँडेलले जानकारी दिनुभयो । संस्थाले ३० कठ्ठामा फुल खेती गरेको छ भने ८ कठ्ठामा बेसार खेती गरेको जनाएको छ ।

भदौ, ८, चितवन । भरतपुर अस्पतालले अस्पतालभित्र चोरीका घटना हुन नदिनको लागि ‘लक डोर’को व्यवस्था गरेको छ । अस्पतालमा बिरामी कुरूवा र आफन्त जस्तो बनेर आएपछि पैसा, मोवाइललगायतका सामान चोरी गर्नेहरूलाई नियन्त्रण गर्नको लागि बिरामी कुरूवाको सामान राख्नको लागि वार्डमा लक डोरको व्यवस्था गरिएको अस्पतालका मेडिकल सुपरिटेन्डेन्ट प्राडा कृष्णप्रसाद पौडेलले जानकारी दिए ।
‘अस्पतालमा जो पनि आउने हुँदा सुरक्षा गार्डबाट चोरी गर्ने व्यक्तिलाई प्रवेश निषेध गर्न नसकेपछि विकल्पमा बिरामी कुरूवालाई लक डोरको व्यवस्था गरिएको हो,’ शुक्रबार अस्पतालको सार्वजनिक सुनुवाइका क्रममा प्राडा पौडेलले भने, ‘त्यति गर्दा बिरामी कुरूवालाई अस्पतालले उपलब्ध गराएको कार्ड देखाएपछि मात्रै लक खुल्छ ।’ यसले बिरामी कुरूवाको सामान सुरक्षित हुने उनले बताए ।

विगत लामो समयदेखि शुल्क लिएर सवारीसाधन पार्किङको व्यवस्था गरेको भरतपुर अस्पतालले आउँदो आइतबारदेखि निःशुल्क पार्किङको व्यवस्था गर्न लागेको मेडिकल सुपरिटेन्डेन्ट प्राडा पौडेलले जानकारी दिए । अस्पताल आउने सेवाग्राहीबाट पैसा कमाउने भन्दा पनि सुरक्षित सेवा दिनका लागि स–शुल्क पार्किङको व्यवस्था मिलाउँदै आएकामा आइतबारदेखि त्यसलाई निःशुल्क बनाउन लागेको उनले बताए ।
‘वडा नं।१० लगायतका सरोकारवाला निकायबाट धेरै नै गुनासो र दबाब आएपछि त्यसलाई हामीले निःशुल्क बनाउन खोजेका छौँ,’ प्राडा पौडेलले भने, ‘खासमा अस्पतालको सुरक्षा गार्डले भनेको नमान्ने र निजी क्षेत्रलाई ठेक्का दिँदा सबै मान्ने हाम्रो सामाजिक परम्परा भएकोले शुल्कसहितको पार्किङ गरिएको थियो ।’
अस्पतालको पुरानो गेटअगाडि भरतपुर महानगरपालिका वडा नं. १० ले सार्वजनिक शौचालय निर्माण गरिदिएपछि सेवाग्राहीका लागि धेरै सहज भएको उनले बताए । अस्पतालको पछाडिपट्टि कपडा धुने, सुकाउने र नुहाउने ठाउँको समेत व्यवस्था मिलाएपछि अस्पताल आउने बिरामीका आफन्तहरूलाई थप सहज भएको उनले बताए । त्यसबाहेक आवश्यक संरचना निर्माण र सेवासुविधालाई थप गर्दै लगेको उनको भनाइ छ ।

भदौ, ८, चितवन । भरतपुर महानगरपालिका प्रमुख रेनु दाहालले बृहत सरसफाई अभियान एक वर्षसम्म निरन्तर चल्ने बताउनु भएको छ । अभियान भरतपुर १२ स्थित पूर्व पश्चिम राजमार्गको गोन्द्राङबाट सुरु भएको हो ।
शुक्रबार भरतपुर महानगरपालिकाले आयोजना गरेको बृहत सरसफाई अभियानको उद्घाटन गर्दै प्रमुख दाहालले वडास्तरदेखि नगरस्तरसम्म सरसफाई समिति निर्माण गरी अभियान सञ्चालन हुने उल्लेख गर्नुभयो । यसको तयारी पनि पुरा भएको छ–उहाँले भन्नुभयो ।
भरतपुर महानरपालिकाको कार्यपालिका बैठकले हरेक महिनाको दुई वटा शुक्रबार सरसफाई गर्ने निर्णय पास भएको छ ।
भरतपुरमा विकास प्रयाप्त भएकै छ, अब हरियाली प्रर्वद्धनमा हाम्रो जोड रहन्छ¬–प्रमुख दाहालले भन्नुभयो ।
भरतपुरलाई स्वच्छ हराभरा बनाउने विगतको निरन्तरता रहेको प्रमुख दाहालको भनाई छ ।
भरतपुर महानगरपालिकाले भ्रमण वर्ष २०२४ लाई लक्ष्ति गरी सरसफाईलाई प्राथामिकतामा राखेर काम गरी रहेको छ । महानगरपालिकाले महिनाको पहिलो र अन्तिम शुक्रबार अनिवार्य रुपमा सरसफाई अभियान चलाउने गरी अगाडि बढेको महानगरका प्रमुख प्रशासकीय अधिकृत नरेन्द्र कुमार रानाले बताउनुभयो ।
सभ्य र सुन्दर भरतपुर निर्माण गर्न वृक्षरोपण कार्यक्रमलाई विषेश जोड दिई सडको दाँया बायाँ वृक्षरोपण गर्ने कार्य अगाडि बढिरहेको बताउनुभयो ।
भरतपुरलाई हरित सहर बनाउने कार्यमा सबै जनाले हातेमालो गर्न आवश्यक रहेको बताउनुभयो । सरसफाई कार्यक्रममा प्रमुख जिल्ला अधिकारी भूपेन्द्र थापा, जिल्ला प्रहरी कार्यालयका एसपी रामेश्वर कार्की, विभिन्न संघ संस्था प्रतिनिधिको उपस्थिति रहेको छ ।