समाचार

चितवन, वैशाख ३१ ।

भरतपुर । छात्रासँग मेयर कार्यक्रम अन्तरगत भरतपुरका १ सय २६ छात्राहरुलाई साईकल वितरण गरिएको छ । छात्राहरुलाई शिक्षाको पहुँच पुराउने उद्धेश्यले ०७६ सालदेखि यो कार्यक्रम लागु गरिएको थियो । आईतबार एक कार्यक्रका बीच भरतपुर महानगरपालिका प्रमुख रेनु दाहालले छात्राहरुलाई साईकल वितरण गर्नुभयो । महानगरपालिकाले ६ वडाका १३ विद्यालयमा अध्ययन गर्ने विपन्न छात्राहरुलाई साईकल वितरण गरिएको महानगरपालिकाको सामाजिक विकास महाशाखाले जनाएको छ ।
महानगरपालिकाले यस अघि २२ वटा वडाका विपन्न छात्रालाई साईकल वितरण गरिसकेको छ भने वडा नं २९ को विद्यालयलाई स्कुल बस प्रदान गरेको छ ।
कार्यक्रमलाई सम्बोधन गर्दै भरतपुर महानगरपालिका प्रमुख रेनु दाहालले महानगरपालिका प्रमुखमा महिला निर्वाचित भएसँगै महिलामैत्री महानगर बनाउन भरतपुर अस्पतालमा महिलालाई निःशुल्क ओपिडि टिकट, छोरी जीवन बीमा, छात्रासँग मेयरजस्ता धेरै कार्यक्रम सञ्चालनमा ल्याईएको बताउनुभयो ।
प्रमुख दाहालले छोरीहरुले घरमा गर्नुपर्ने कामहरु धेरै हुने र विद्यालय जान ढिलो हुने भएकाले साईकल वितरण गरिएको उल्लेख गर्नुभयो । महानगरपालिकाले अति विपन्न परिवारका छात्राहरुलाई विद्यालय शिक्षामा पहुँच पु¥याउने उदेश्यले कक्षा ६ देखि १२ कक्षाका किशोरीहरुलाई साईकल वितरण गर्दै आएको छ ।
महानगरपालिका प्रमुख दाहालले भरतपुर पूर्वाधारको क्षेत्रमा मात्र नभई शिक्षा क्षेत्रमा पनि उल्लेख्य प्रगति गर्न सफल भएको बताउनुभयो । यो ६ वर्षको अवधीमा ८ हजार विद्यार्थीहरु सामुदायिक विद्यालयहरुमा वृद्धि गर्न सफल भएको जानकारी दिनुभयो ।
नारायणी मावि जस्तै भरतपुरका अन्य विद्यालयमा पनि आकर्षण बढाउन विभिन्न छात्रावृतिका कार्यक्रम, न्यानो कपडाको कार्यक्रम, दिवा खाजा, विद्यालयलाई बसलगायतका कार्यक्रमहरु सञ्चालनमा रहेको बताउनुभयो ।
प्रमुख दाहालले साईकल प्राप्त गर्ने विद्यार्थीलाई दुरुपयोग नगर्न र उज्जवल भविष्यको कामना पनि गर्नुभयो ।

चितवन, वैशाख ३१ ।

चितवन राष्ट्रिय निकुञ्जले संरक्षण गरेर राखेको दुई गैँडाका बच्चालाई प्रकृतिमा छाडिएको छ । राष्ट्रिय प्रकृति संरक्षण कोष सौराहामा संरक्षण गरिएका ती गैँडालाई निकुञ्जको लामिताल क्षेत्रमा छोडिएको हो ।
निकुञ्जका पशु चिकित्सक डा. विजय श्रेष्ठका अनुसार डार्ट नगरिकनै ट्रकमा राखेर ती दुई गैँडालाई तामिताल पुर्‍याएर छाडिएको छ । निकुञ्जमा आमाबाट छुटेको अवस्थामा भेटिएका पुष्पा र अञ्जली नामका ती दुई बच्चालाई निकुञ्जकै नवलपरासी क्षेत्रबाट उद्धार गरी ल्याइएको थियो ।
श्रेष्ठका अनुसार पुष्पालाई सन् २०२० को जनवरीमा नवलपरासीको तमासपुर र अञ्जलीलाई २०२१ को अप्रिलमा नवलपरासीकै कुजौलीबाट उद्धार गरिएको थियो । एक दुई महिनाको उमेरमा आमाबाट छुटेका उनीहरुलाई हुर्काएपछि प्राकृतिमा छाडिएको उहाँले बताउनुभयो ।
पुष्पा र अञ्जली अहिले घाँस खोजेर खानसक्ने भएका छन् । उद्धार गरी हुर्काइएका कतिपय जङ्गली जनावर मित्रराष्ट्रलाई दिने, कतिपयलाई चिडियाघरमा त कतिपयलाई प्राकृतिमा छोडिंदै आएको छ ।

चितवन, वैशाख ३० ।

लोकतन्त्र संवाद तथा नागरिक शिक्षा विषयक अन्तरक्रिया शनिबार भरतपुरमा सम्मपन्न भएको छ । अन्तरक्रियामा जर्मनी संस्था फ्रेडरिक– एवर्ड– स्टिफटुङ (एफइएस) नेपालकी आवासीय प्रतिनिधि नाटालिया फिग्गीले राज्यको लोकतन्त्र बलियो भयो भने सामाजिक न्यायको अनुभूतिगर्न सजिलो हुने बताएकी छन् । फिग्गीले समानता र स्वतन्त्रता ले लोकतन्त्र र सामाजिक न्यायलाई अनुभूति गर्न सजिलो हुने बताएकी हुन् ।

एफईएसले नागरिक शिक्षा सम्बन्धी कार्यक्रमहरु विभिन्न क्षेत्रमा गर्दै आएको फिग्गीले जानकारी दिइन् । ‘एफईएसले सामाजिक र राजनीतिक क्षेत्रमा विभिन्न नागरिक शिक्षा कार्यक्रम गर्दै आएको छ ।
एफइएस संस्था नागरिक शिक्षा, अनुसन्धान र अन्तराष्ट्रिय सहयोगको माध्यमबाट सामाजिक लोकतन्त्रको भावना झल्काउने जर्मनीको सबैभन्दा पुरानो राजनीतिक प्रतिष्ठान रहेको फिग्गीले बताइन् ।

कार्यक्रममा संविधानविद् तथा प्रशासनविज्ञ, काशीराज दाहाल, अधिवक्ता रोशन पोखरेल र नेपाल टेलिभिजनकी नायब महाप्रबन्धक तथा लैंगिक विश्लेषक आरती चटौतले तीन वटा कार्यपत्र प्रस्तुत गरेका थिए । कार्यक्रममा वरिष्ठ संविधानविद् तथा प्रशासनविज्ञ दाहालले नेपालमा २०७२ को संविधान बनाउदा चार वटा उद्देश्य राखिएको बताए । उनले मुलुकमा दिगो शान्ति, मानविय तथा भौतिक विकास, भष्टचार नियन्त्रण र समृद्धिको उद्देश्य राखिएको बताए । उनले संविधानमा लेखिएका कुराले मात्र संविधान गतिशिल नहुने बताए । नेपाल टेलिभिजनकी नायब महाप्रबन्धक तथा लैगिक विश्लेषक आरती चटौतले महिला सशक्तिकरणको आयममा चितवन अरु जिल्ला भन्दाअघि रहेको बताइन् । अरु जिल्ला भन्दा चितवनमा साक्षरता प्रतिशत धेरै भएको उनको भनाइ छ ।

विश्व श्रम संगठनले अनुसन्धान गरेको तथ्याङ्कअनुसार विश्वको सम्पूर्ण कामको ७० प्रतिशत महिलाले र ३० प्रतिशत पुरुषले काम गर्ने उनले जानकारी दिइन् । उनले भनिन्, ‘संगठनले गरेको अनुसन्धान अनुसार सबैभन्दा बढी विश्वमा एसियाका महिलाहरुले बढी काम गर्ने तथ्याङ्कले देखाएको थियो । त्यस अनुसन्धानपछि अर्को अनुसन्धान गर्दा दक्षिण एसियाका महिलाले पुरुषले भन्दा बढी महिलाले बढी काम गर्दथे । त्यसपश्चात अर्को अनुसन्धान गर्दा विश्वमा सबैभन्दा धेरै काम गर्ने नेपालको महिलाहरु रहेको तथ्याङकले देखाएको छ ।’

त्यसैगरी अन्तरक्रिया कार्यक्रममा अधिवक्ता रोशन पोखरेलले हिजोको प्राचिन, अहिलेको आधुनिक र भविष्यको प्रजातन्त्रको बारेमा आफ्नो कार्यपत्र प्रस्तुत गरेका थिए । उनले अहिले विकास भएको सञ्चार प्रविधि गलत ढंगले प्रयोग गरे लोकतन्त्रलाई ध्वस्त गर्न सक्ने विचार राखे । सोसल मिडियाका माध्यमहरुमा अफवाह र असत्यवादको प्रसार गरेर जनताको धारणा परिवर्तन गर्न र जनताको हितमा नभएका नेताहरु निर्वाचित हुने खतरा रहेको बताए । डिजिटल युगमा लोकतन्त्रको रक्षा गर्न यी खतराहरुको बारेमा जागरुक रहन र उनीहरुलाई न्यूनीकरण गर्न सावधानी बनाउन अत्यन्त आवश्यक रहेको बताए ।