समाचार

चितवन, वैशाख २६ ।

सरकारले सहकारी क्षेत्रमा देखिएको समस्याको सुधार गर्नका लागि कार्यदल गठन गरेको छ । 

सिंहदरबारमा मंगलबार बसेको मन्त्रिपरिषद् बैठकले सहकारी क्षेत्र सुधार कार्यदल २०८० गठन गरेको सरकारका प्रवक्ता रेखा शर्माले जानकारी दिनुभयो । बैठकले बिदेशबाट आउदा आफ्नो साथमा दुईवटा मोबाइल ल्याउन पाउने व्यवस्थाका लागि झिटीगुण्टा सम्बन्धी सूचना नियमावली संशोधन गर्ने निर्णय गरेको छ भने नेपाल कृषि वन सेवा समिकरणको सचिव पदमा रेवतीरमण पौडेललाई बढुवा गर्ने निर्णय गरेको प्रवक्ता शर्माले जानकारी दिनुभयो । बैठकले नेपाल व्यापार एकीकृत रणनीति २०८० स्वीकृत गरेको छ । त्यस्तै बैठकले ढल्केवर–वाणगंगा १३२ केभि प्रशारण लाईन निर्माणका लागि जग्गा प्राप्ति गर्ने र प्रारम्भीक कारवाही चलाउने अधिकारी तोक्ने, कोहलपुर बितरण केन्द्रका लागि जग्गा प्राप्ती गर्ने र प्रारम्भीक कारवाही चलाउने अधिकारी तोक्ने निर्णय गरेको प्रवक्ता शर्माले बताउनुभयो ।

त्यस्तै बैठकले केहि सहसचिवको सरुवा गर्ने निर्णय पनि गरेको छ भने इसिमोड बोर्ड अफ गनरनेन्स मिटिङमा सहभागी हुन योजना आयोगका उपाध्यक्षलाई स्वीकृति दिने निर्णय गरेको प्रवक्ता शर्माले बताउनुभयो ।

चितवन, वैशाख २६ ।

श्रमजीवि पत्रकारहरुको संगठन प्रेस चौतारी चितवनको भवन निर्माणका लागि नेकपा (एमाले) चितवनले आर्थिक सहयोग गरेको छ । एमाले जिल्ला पार्टी कार्यालयमा जिल्ला अध्यक्ष रामप्रसाद न्यौपानले चौतारी चितवनका अध्यक्ष सुवास पण्डितलाई आज १ लाख १ हजार १ सय २१ रुपैयाँको चेक हस्तान्तरण गरेका हुन् ।

भरतपुर महानगरपालिका वडा नं. ११ बसेनीचोक नजिकै प्रेस चौतारीको देशकै पहिलो भवन निर्माण थालिएको छ । चेक हस्तान्तरण कार्यक्रममा बोल्दै एमाले अध्यक्ष न्यौपानेले चितवन चौतारीले आफ्नो भवन बनाउन सुरू गरेकोमा खुशी व्यक्त गरे। अध्यक्ष न्यौपानेले पार्टीका तर्फबाट आगामी दिनमा थप सहयोग गर्ने प्रतिबद्धता समेत व्यक्त गर्नुभयो । उनले पार्टी निकटका शुभेच्छुक, समर्थक र विभिन्न पेशागत संघ संगठनहरुलाई पनि चौतारीको भवन बनाउन सहयोग गर्न अनुरोध गरे ।

सो कार्यक्रममा एमाले पोलिट्ब्यूरो सदस्य देवी ज्ञवाली, संविधानसभा सदस्य कृष्णभक्त पोखरेल, एमाले नेता यमबहादुर परियार, जिल्ला सचिव शैलेस खनाल, कार्यालय सचिव श्याम विष्ट, चौतारीका संस्थापक अध्यक्ष रामबावु सुवेदी, पूर्व केन्द्रीय सदस्य तिलक रिमाल, पत्रकार महासंघका सहसचिव आनन्द पोखरेल लगायतको सहभागीता रहेको थियो ।

समाजसेवी केशव कार्कीले उपलब्ध गराएको झण्डैं १० धुर जग्गामा चौतारी चितवनले तीन तले सुविधासम्पन्न भवन बनाउने कामको थालनी गरेको छ । भवन निर्माण समितिका संयोजक समेत रहेका चौतारी चितवनका अध्यक्ष सुवास पण्डितले थोपाथोपा मिलेर सागर बन्छ भने जस्तै सबैको सानोसानो सहयोगले चौतारीको देशकै पहिलो भवन चितवनमा बनाउने अठोटका साथ अगाडि बढेको बताए । उनले भवन निर्माणमा सबैबाट सक्दो सहयोगको अपेक्षा राखेको बताए ।
भवनको हालै शिलन्यास गरेर निर्माण प्रक्रिया शुरु भईसकेको छ । आर्थिक सहयोगका लागि चौतारीले भवन निर्माणको छुट्टै खाता सञ्चालन गरेको छ ।

चितवन, वैशाख २६ ।

चितवनको प्रतिष्ठित पोल्ट्री व्यवसायी शंकर कँडेलको आत्महत्या दुरुत्साहनका आरोपितलाई तत्काल पक्राउ गरी कारबाही गर्न नेपाल घर बहाल उपभोक्ता मञ्च चितवनले माग गरेको छ । मञ्चले आज चितवनका प्रमुख जिल्ला अधिकारी सुरेन्द्र पौडेललाई ज्ञापनपत्र बुझाउँदै सो माग गरेको हो । ज्ञापनपत्रमा कँडेललाई आत्महत्याको निर्मम निर्णय लिन बाध्य पार्ने परिवारबाट आत्महत्या दुरुत्साहनको किटानी जाहेरीमा उल्लेख गरिएका व्यक्तिहरुलाई पक्राउ गरी कडा भन्दा कडा कानुनी कारबाही गर्न माग गरिएको छ । संघ यस घटनाबाट मर्माहत भएको भन्दै दिवंगत आत्माको चिरशान्तिको कामना गर्दै ज्ञापनपत्रमा परिवारजनमा हार्दिक समवेदना पनि प्रकट गरिएको छ ।

त्यसैगरी संघले देश आर्थिक मन्दीले आक्रान्त बनेको भन्दै उद्योगी व्यवसायीले आत्महत्याको बाटो रोज्न बाध्य भइरहेको अवस्थामा यस्ता घटना दोहोरिन नदिन विभिन्न सरोकारवाला निकायहरुको ज्ञापनपत्रमार्फत् ध्यानाकर्षण गराएको छ ।

त्यस्तै संघले व्यवसायीहरुको घरभाडा दरलाई अधिकतम् घटाई व्यवसायी टिक्ने र घर तथा सटर खाली नहुने बातावरण पनि सिर्जना गर्न ज्ञापनपत्रमा संघले माग गरेको छ । व्यवसाय सामान्य अवस्थामा नआउदासम्म व्यवसायीबाट लिने व्यवसाय कर, घरधनीबाट लिने घरबहाल करमा अधिकतम छुटको माग पनि संघले गरेको छ । संघले ज्ञापनपत्रको बोधार्थ जिल्ला समन्वय समिति चितवन, भरतपुर महानगरपालिका र सबै स्थानीय तहहरुलाई बुझाएको छ ।