समाचार

साउन ६, मकवानपुर
नारायणगढ रोटरी क्लब र स्पाउज क्लब अफ आरसी नारायणगढले आज एक कार्यक्रम बिच मनहरी, मकवानपुरमा स्थापित आमा घरको लागि आवश्यक खाद्यान्नहरू लगायत नगद सहयोग प्रदान गरेको क्लबका अध्यक्ष रोटरियन तारानाथ पाठकले जानकारी गराएको छ । उक्त सहयोगहरू आमा घरका अध्यक्ष रामचन्द्र उप्रेतीलाई हस्तान्तरण गरिएको हो । ब्रह्मकुमारी रेवती दिदीको प्रमुख आतिथ्यमा सम्पन्न भएको उक्त कार्यक्रममा आमा घरका संस्थापक ब्रह्मकुमार विजयराज सिग्देलले उपस्थित सम्पूर्णलाई स्वागत गर्दै हाल संस्थामा ३० जना आमाहरूले आश्रय लिइरहेको बताए । पूर्व अध्यक्ष तथा कार्यक्रमका संयोजक सहनलाल प्रधानले विगत २ वर्षदेखि आमा घरलाई सहयोग प्रदान गर्दै आएको र निरन्तर रूपमा हरेक रोटरी वर्षको प्रारम्भमा आमा घरलाई सहयोग प्रदान गरेपश्चात् क्लबद्वारा अन्य सामाजिक कार्यको सुभारम्भ गरिने बताए । आफ्नो मन्तव्यको क्रममा आमा घरका अध्यक्ष रामचन्द्र उप्रेती र पूर्व गाउँपालिका अध्यक्ष एकराज उप्रेतीले नारायणगढ रोटरी तथा स्पाउज क्लब अफ नारायणगढ रोटरीले आमा घरलाई पुर्‍याउँदै आइरहेको सहयोगको लागि धन्यवाद व्यक्त गरे । त्यसै गरी कार्यक्रमका प्रमुख अतिथि ब्रह्मकुमारी रेवती दिदीले मन्तव्यको क्रममा २ मिनेटको मेडिटेशन गराउनुकासाथै आशीर्वचनहरू प्रदान गरेकी थिइन् ।
क्लबका सचिव सेवन पन्तले सञ्चालन गरेको उक्त कार्यक्रममा स्पाउज क्लबका सदस्य कल्पना थपलिया पाठकले सुन्दर कविता वाचन गरेका थिए भने अर्का सदस्य अनुराधा पन्तले आफ्नो स्नातकोत्तर अध्ययनको सिलसिलामा ‘आमा घर’ शीर्षकमा लेखिएको थेसिस र सो क्रममा आमा घरमा आश्रित आमाहरूसँग गरिएको अन्तर्वाताको सम्बन्धमा आफ्नोआफ्नो अनुभव सुनाएकी थिइन् । सोही कार्यक्रममा आमा घरको लागि ६४ थान फूलको विभिन्न जातका बिरुवाहरूसमेत वृक्षरोपण गरिएको क्लबका सचिव सेवन पन्तले बताए । करिब ६० हजार रुपैयाँ बराबरको खाद्यान्न क्लबको तर्फबाट अध्यक्ष तारानाथ पाठक र स्पाउज क्लब अफ नारायणगढकी अध्यक्ष इन्दु श्रेष्ठले स्पाउज क्लबको तर्फबाट नगद १० हजार रुपैयाँ सहयोग प्रदान गरिएको सचिव पन्तले जानकारी गराए । साथै स्पाउज क्लबका सदस्य शान्ति श्रेष्ठले आमा घरको आजीवन सदस्यता लिएको उनले बताए । कार्यक्रममा क्लबका पूर्व अध्यक्षहरू रोहितकुमार श्रेष्ठ, विज्ञानलाल श्रेष्ठ, कृष्णप्रसाद श्रेष्ठ, रमेश पौडेल, नगेन्द्रबहादुर श्रेष्ठ, निवर्तमान अध्यक्ष भोलानाथ लामिछाने, मनोनित अध्यक्ष रामप्रसाद गजुरेल, सर्भिस प्रोजेक्ट डाइरेक्टर देवमाया श्रेष्ठ, मेम्बरसिप डाइरेक्टर अजिता पिया र सदस्य राजेन्द्र पौडेललगायत स्पाउज क्लबका सदस्यहरू शान्ति श्रेष्ठ, राजकुमारी श्रेष्ठ, वर्षा प्रधान र एनेट स्वस्तिका पौडेलको उपस्थिती रहेको थियो ।

चितवन, साउन ४ –
४६ औं पुष्पलाल स्मृति दिवसका सन्दर्भमा चितवनमा ‘क. पुष्पलाल र आजको सान्दर्भिकता’ विषयक विचार गोष्ठी हुने भएको छ । नेकपा एमाले चितवनका कार्यवाहक अध्यक्ष श्याम कुमार विष्टका अनुसार नेकपा (एमाले) जिल्ला कमिटी चितवको आयोजनामा जिल्ला समन्वय समिति चितवनको सभाहलमा कार्यक्रम हुन लागेको हो । साथै सोही दिन माडी नगरपालिका ६ स्थित पुष्प मदन स्मृति बाटिकामा पनि विचार गोष्ठी र बाटिका सरसफाइ कार्यक्रम हुने छ । कार्यक्रममा उपस्थितिका लागि सम्पूर्ण नेता कार्यकर्ता, जनवर्गीय संगठन, समर्थक, भचिन्तकहरुमा नेकपा एमाले जिल्ला कमिटी चितवनले आह्वान गरेको छ । नेपाल कम्युनिष्ट पार्टीका संस्थापक महासचिव पुष्पलाल श्रेष्ठको स्मृति दिवसमा नेपालका विभिन्न कम्युनिष्ट पार्टीहरुले विविध कार्यक्रम गरेर मनाउने गर्दछन् । श्रेष्ठको नेतृत्वमा २००६ बैशाख १० गते भारतको कलकत्ताको श्यामबजारस्थित एक बंगालीको घरबाट नेकपाको स्थापना भएको थियो । नेकपा स्थापना गर्दा संस्थापक सदस्यमा मोतीदेवी श्रेष्ठ, निरञ्जन गोविन्द वैद्य, नरबहादुर कर्माचार्य र नारायणविलास जोशी थिए । महासचिव पुष्पलाल आफै थिए । वि.सं. १९८१ असार १५ गते जन्मिएका पुष्पलालको २०३५ कार्तिक १५ मा ५४ वर्षको उमेरमा निधन भएको थियो । उनको भारतको गोविन्द पल्लव अस्पतालमा उपचारका क्रममा निधन भएको थियो । उनको शवलाई तत्कालीन सरकारले नेपाल ल्याउन नदिएपछि उतै दाहसंस्कार गरिएको थियो ।

साउन ४ बारा । त्रिशूली नदीमा बेपत्ता भएको एन्जल बसकी यात्रु सृष्टि यादवको कुशको शव बनाएर दाहसंस्कार गरिएको छ । घटनाको ८ औँ दिनसम्म पनि सृष्टि फेला नपरेपछि परिवारले शुक्रबार कुशको शव बनाएर दाहसंस्कार गरेका हुन् । कलैया उपमहानगरपालिका– १४ जितपुटोलकी सृष्टिका अभिभावकले कुशको शव बनाएर पसाहा खोलामा दाहसंस्कार गरेका छन् । शव फेला नपरेपछि धार्मिक विधिअनुसार अन्तिम संस्कार गरिएको उनका बुबा जगदीश यादवले बताए । सृष्टि पर्साको सखुवाप्रसौनी गाउँपालिकामा रेडियोग्राफरको रूपमा कार्यरत थिइन् । उनी विदेश जानको लागि परीक्षा दिन काठमाडौँ जाँदै गर्दा सो घटनामा परेकी हुन् । उनी चढेको बागमती प्रदेश ०३–००६ख १५१६ नम्बरको एन्जल डिलक्स र काठमाडौँबाट गौरतर्फ आउँदै गरेको बागमती प्रदेश ०३–००१ख २४९५ नम्बरको गणपति डिलक्स बस असार २८ गते नारायणगढ–मुग्लिन सडक खण्डअन्तर्गत सिमतालको पहिरोमा परी त्रिशूली नदीमा खसेका थिए । उक्त घटनामा बाराका ४ जना यात्रु परेका थिए । सृष्टिसँगै प्रसौनी गाउँपालिका–२ का ताराचन्द कुर्मी, उनकी पत्नी कुसुवदेवी र बारा बिश्रामपुर ३ का प्रमानन्द पण्डित बेपत्ता छन् । शव फेला पर्ने स्थिति नदेखेपछि कुर्मीको परिवारले पनि यसअघि नै कुशको शव बनाएर अन्तिम संस्कार गरिसकेका छन् ।