समाचार

फागुन २१, भरतपुर ।

चितवनमा राष्ट्रिय परिचयपत्र वितरण कार्य शुभारम्भ भएको छ । आईतबार जिल्ला प्रशासन कार्यालय चितवनमा एक कार्यक्रमका बीच भरतपुर महानगरपालिका प्रमुख रेनु दाहालले सेवाग्राहीलाई हस्तान्तरण गरी शुभारम्भ गर्नुभयो ।
शुभारम्भ कार्यक्रमलाई सम्बोधन गर्दै भरतपुर महानगरपालिका प्रमुख दाहालले अबको युग प्रविधिमैत्री भएकाले सबैले परिचयपत्र प्राप्त गर्नुपर्ने औल्याउनुभयो । मेयर दाहालले परिचयपत्र वितरण तथा तथ्याङक संकलनको कामलाई थप प्रभाकारी बनाउन प्रमुख जिल्ला अधिकारीको ध्यानाकर्षण गराउनुभयो । भरतपुर महानगरबासीको सहजताका लागि महानगरपालिका परिसरका छुटै ईकाई बनाएर परिचपत्रको कामलाई बढाउन तयार रहेको उल्लेख गर्नुभयो । राष्ट्रिय परिचय पत्र नागरिकहरुको वैयक्तिक तथा जैविक विवरण समावेश गरी बायोमेटिक सुविधायुक्त प्रमाणपत्र हो । नेपाल सरकारले नागरिकका तथ्याडकहरुलाई डिजिटल प्रविधिमा राख्न यो कामको थालनी गरेको थियो ।
राष्ट्रिय परिचयपत्र तथा पञ्जीकरण विभागका महानिर्देशक रुद्रप्रसाद पण्डितले अहिले दैनिक १५ हजार राष्टिय परिचयपत्र छपाईको काम भइरहेको बताउनुभयो । महानिर्देशक पण्डितले अबको एक वर्षभित्र अभियान नै चलाएर दुई करोड नेपालीको तथ्याङक संकलन गर्ने र दुई वर्षभित्र सबैलाई परिचयपत्र उपलब्ध गराउने लक्ष्य लिएको बताउनुभयो । छपाई भएका परिचय–पत्रको वितरण कार्य चितवनबाटै सुरु गरिएको उहाँको भनाई थियो ।
प्रमुख जिल्ला अधिकारी सुरेन्द्र पौडेलले चितवनमा १५ हजार राष्ट्रिय परिचयपत्र छपाई भएर आएको जानकारी दिनुभयो ।
राष्ट्रिय परिचय–पत्रलाई स्थानीय तहअनुसार सेवा केन्द्र स्थापन गरी वितरण गर्ने कार्यलाई थप प्रभावकारी बनाईने बताउनुभयो ।
प्रमुख जिल्ला अधिकारी पौडेलले यसको थालनी भरतपुर महानगरपालिकाबाट सुरु गरी क्रमश सबै पालिकामा विस्तार गर्ने योजना लिएको उल्लेख गर्नुभयो ।
अब केही समयपछि कुनै पनि काम गर्दा राष्ट्रिय परिचय–पत्र अनिवार्य चाहिने नियम आउने भएकाले छुटेका र यो सेवाबाट बाहिरा भएका नागरिकले सम्बन्धित ईकाईमा सम्पर्क राख्न आग्रह गर्नुभयो ।

१८ फागुन, चितवन । चितवनको भरतपुर महानगरपालिका वडा नं। १० कालिका चोकमा एक युवती मृत फेला परेकी छिन् ।

जिल्ला प्रहरी कार्यालय चितवनले दिएको जानकारी अनुसार भारतका आसाम घर भई भरतपुर बस्दै आएकी १९ वर्षीया सुनिता देवी मृत अवस्थामा भेटिएकी हुन् । उनी बस्दै आएको घरमा झुण्डिएको र उनका साथीहरुले पासो काटेको अवस्थामा मृत भेटिएको जिल्ला प्रहरी कार्यालय चितवनका प्रहरी प्रवक्ता डीएसपी विजयराज पण्डितले जानकारी दिए ।

तीन जना युवतीले बस्नका लागि एक घरको फ्ल्याट भाडामा लिएका थिए । सो फ्ल्याटमा २ जना युवती र २ युवक बुधबार राति सँगसँगै बसेको र उनीहरुका बीचमा झैझगडा हुँदा एक युवती झुण्डिएको प्रहरीले जनाएको छ । घटनामा सँगै रहेका तीन जनालाई प्रहरीले पक्राउ गरेर आवश्यक अनुसन्धान गरिरहेको छ । प्रहरीका अनुसार झुण्डिएर मर्छु भनेर धम्काउने र स्टण्ट देखाउन खोज्दा घटना घटेको हो कि भन्ने आशंका गरिएको छ । मृतकको शव पोष्टमार्टमका लागि भरतपुर अस्पतालमा राखिएको छ । मृतकका परिवारलाई बोलाउने काम भएको प्रवक्ता पण्डितले जानकारी दिए ।

फागुन १७, चितवन – नारायणी नदीकिनारलाई आकर्षक पर्यटकीय गन्तव्यको रुपमा विकास गरिने भएको छ । नदी किनार स्थित करिब १५ विगहा जमिनमा पर्यटक आकर्षण गर्ने किसिमले संरचनाहरु निर्माण गर्न थालिएको छ । बुधबार बिहान नदी किनारमा सहरी विकास मन्त्रालय अन्तर्गतआरती स्थल तथा ऊर्जा, जलस्रोत तथा सिँचाई मन्त्रालय अन्तर्गत नारायणी नदी किनारा संरक्षणको संयुक्त रुपमा भरतपुर महानगरका प्रमुख रेनु दाहाल र उपप्रमुख चित्रसेन अधिकारीले संयुक्तरुपमा शिलन्यास गरे । नगरप्रमुख दाहालले नारायणी नदी किनारलाई उत्कृष्ट पर्यटकीय स्थल बनाई विश्वभरबाट पर्यटक आकर्षित गरी पर्यटकीय गतिविधि गर्न सकिने गरी विकार गरिने बताइन् । ‘विश्वभरबाट पर्यटक आउने गरी आकर्षणको केन्द्र बनाइने छ’, उनले भनिन्, ‘नदी कटानको समस्याबाट पनि मुक्ति पाइने छ भने घुमफिरको गन्तव्य पनि हुनुको साथै महानगरको राजस्वमा पनि उल्लेख्य वृद्धि हुनेछ । पर्यटक लोभ्याउने किसिमका संरचनाहरु बन्ने र नदी किनारलाई धार्मिक क्षेत्र, प्रर्दशनी क्षेत्र र खेल क्षेत्रका रुपमा विकास गरिने लक्ष्य छ रहेको दाहालको भनाइ छ ।
मेयर दाहालका अनुसार यहाँ २८ मिटर लम्बाई र ५ मिटर चौडाइका दुईवटा आर्कषक आरती प्लेटफर्म निर्माण हुनेछन्’, ‘४५ वटा आकर्षक बत्तीहरु जडान गरिनेछ ।’ नदीकिनारको ५ सय वर्गमिटर क्षेत्रमा मोज्याइक टायल विच्छाइनेछ । फागुन १० मा सम्झौता भएको यो योजना २०७१ भदौ ९ मा सम्पन्न हुनेछ । महालक्ष्मी–ओम सत्य साई जेभी भरतपुरले निर्माणको जिम्मेवारी लिएको छ । भरतपुर महानगरको गुरुयोजनाअनुसार नदी किनारको सौन्दर्यकरणको काम सुरु भएको छ । नारायणीको पुलदेखि नारायणी लिफ्टसम्मको २.५ किमि क्षेत्रमा पर्यटन पूर्वाधारहरु बन्नेछन् । निर्माण सम्पन्न भइसकेपछि नदीकिनारमा चहलपहल थप बढ्नेछ, पर्यटकहरु रमाउने क्षेत्रका रुपमा चिनिनेछ । सघन शहरी विकास तथा भवन निर्माण आयोजना चितवनका प्रमुख प्रकाश अर्यालले आकर्षक आरती स्थल निर्माण १८ महिनामा पूरा हुने जानकारी दिए ।

२०७६ को बैशाखदेखि नारायणी नदीकिनारमा साँझ आरती गरिँदै आइएको छ । गण्डकी–नारायणी संरक्षण महाआरती परिषद्का अध्यक्ष प्रेमनिधि भारद्वाजले नदीकिनार धार्मिक गन्तव्य बन्न लागेकोमा खुशी व्यक्त गरे । मनको शान्तिका लागि समेत नदीकिनार आउनेहरुको संख्या बढ्ने अपेक्षा गरिएको छ । नारायणीको किनारमै किनारा संरक्षणका लागि ६ सय ४० मिटर दुरीमा संरचनाहरु बन्ने भएका छन् । १५ करोड ९२ लाख लागतमा डाइनामिक कन्स्ट्रक्सन प्रालिले १८ महिनामा निर्माण सम्पन्न गर्ने गरी पुस ५ गते सम्झौता गरेको छ । नारायणी नदी व्यवस्थापन आयोजनका सूचना अधिकारी सिनियर डिभिजनल इञ्जिनियर शंकर बुढाथोकीका अनुसार ३ सय मिटरको काम सुरु भैसकेको छ । बाँकी काम छिट्टै सुरु हुन्छ । करिब एक सय वटा ४ पांग्रे सवारी राख्न मिल्ने गरी पार्कीङ स्थल पनि बनाइने योजना रहेको छ । नारायणी नदीकिनारमा पूर्वाधार विकासका लागि भरतपुर महानगर, सिँचाई मन्त्रालय, शहरी विकास मन्त्रालय, पर्यटन मन्त्रालयले बजेट विनियोजन गरेका छन् । नारायणी नदी व्यवस्थापनका लागि २ अर्ब ४३ करोड ४० लाख बराबरको पाँचवटा प्याकेजमा काम हुनेगरी सम्झौता भएका छन् । नारायणी पुलको माथिल्लो भागदेखि गोलाघाटसम्म नदी तटबन्धनको कामसमेत हुँदैछ ।