समाचार

चितवन, जेठ १७ । तस्विर: अंकित भगत ।

चितवन एक्स्पो सेन्टर भरतपुरमा भोलि शुक्रबार देखि अन्तर्राष्ट्रिय पोल्ट्री प्रदर्शनी सुरु हुँदै छ । नेपाल पोल्ट्री महासंघ र इण्डीया पोल्ट्री इक्युपमेन्ट एशोसियसनको संयुक्त आयोजनामा हुन लागेको प्रदर्शनी जेठ २० गतेसम्म सञ्चालन हुने छ । प्रदर्शनीमा १५० भन्दा बढी स्वदेशी तथा विदेशी प्रदर्शकहरुका नवीनतम प्रविधिहरुको प्रदर्शनी गरिने आयोजकले बिहीवार पत्रकार सम्मेलनको आयोजना गरी जानकारी दिएको हो ।

प्रदर्शनीको सम्पूर्ण तयारी पूरा भएको आयोजकले जानकारी दिएको छ । प्रदर्शनीमा नेपाली पोल्ट्री क्षेत्रका उद्योगपति, स्थापित व्यवसायी, क्षेत्रगत पेशाकर्मी एवम् समग्र किसानवर्गको प्रत्यक्ष संलग्नता रहने नेपाल पोल्ट्री महासंघका अध्यक्ष गुणचन्द्र विष्टले बताए । प्रदर्शनीसँगै पोल्ट्री व्यवसायका नवीनतम प्रयोग सम्बन्धी गोष्ठी, बैठक र अन्तरक्रियासहित तीन दिने पोल्ट्री पाठशाला सेमिनार समेत हुने उनले जानकारी दिए । प्रदर्शनीमा नेपाल, भारत, जर्मनी, बेल्जियम, नेदरल्याण्ड, चीन, अमेरिका, टर्की, मलेसिया, सिंगापुर, ताइवान, इटली, इजरायल, बंगलादेश लगायत विभिन्न देशका पोल्ट्रीसँग सम्बन्धीत कम्पनीहरुको स्टल रहनेछ ।

‘नेपाली पोल्ट्री क्षेत्रलाई उच्च व्यवसायीक परिचय दिई अन्तर्राष्ट्रिय स्तरमा चिनाउने र अन्य विकसित देशहरुमा भइरहेको पोल्ट्रीजन्य उत्पादनका प्रविधिहरु नेपालमा भित्राउने महत्वपूर्ण वातावरण बनाउन नेपाल पोल्ट्री महासंघले नेपालकै सबैभन्दा ठूलो अन्तर्राष्ट्रिय प्रदर्शनीको आयोजना गर्न लागिएको विष्टले बताए । प्रदर्शनीबाट नेपाली पोल्ट्री कृषकले कम लागतमा पोल्ट्रीजन्य वस्तुको उत्पादन गरी उपभोक्ताले सस्तो, सुलभ तथा गुणस्तरीय पोल्ट्रीजन्य उत्पादन खरिद गर्ने वातावरण बनाउन सहयोग पुग्ने उनले विश्वास व्यक्त गरे ।

चितवन, जेठ १७ । तस्विर :  अंकित भगत । 

एनसेल आजियाटा लिमिटेडले चितवनको नारायणगढमा आफ्नो नयाँ एनसेल सेन्टरको स्थापना गरेको छ । ग्राहकहरुलाई एकै स्थानबाट विभिन्न सेवा प्रदान गर्दै विश्वस्तरीय सेवा सुविधाको अनुभव प्रदान गर्ने उद्देश्यका साथ नारायणगढको लायन्स चोकमा आफ्नो नयाँ सेन्टर सञ्चालनमा ल्याएको हो ।

एनसेलका चिफ अफ स्टाफ, अपरेशन स्टेफन रोड्रिगेजले एक कार्यक्रम माझ आज बिहिबार सो नयाँ एनसेल सेन्टरको उद्घाटन गर्नुभएको थियो । यो सेन्टरबाट ग्राहकहरुले सबै किसिमका ग्राहक सेवाहरु प्राप्त गर्न सक्छन् । आफ्नो ब्राण्ड बाचा ‘आज, भोलि, सधैं सँगै’ तथा थीम ‘हामी तपाईंकै लागि’ अनुरुप स्थापना गरिएको यस नयाँ एनसेल सेन्टरबाट ग्राहकले एनसेलका सेवा तथा सुविधाहरुका बारेमा सोधपुछ गर्न, सिम खरिद गर्न, इन्टरनेट सेटिङ्गको जानकारी लगायत विभिन्न कर्पोरेट सेवाहरु समेत लिन सक्छन् । यसैगरी ग्राहकहरुले यस सेन्टरबाट आफ्नो सिम फोरजीमा अपग्रेड गर्ने, सिम तथा मोबाइल नम्बर परिवर्तन, सिम ईसिममा अपग्रेड गर्न, सीयुजी नम्बरहरुको आवश्यक फेरबदल गर्ने, बिज प्लान, अन्तर्राष्ट्रिय रोमिङ्ग सुचारु गर्ने, बिल तिर्ने, ब्यालेन्स रिचार्ज र ट्रान्सफर गर्ने लगायतका ग्राहक सेवाहरु प्राप्त गर्न सक्छन् । सेन्टर उद्घाटन कार्यक्रमलाई संबोधन गर्दै चीफ अफ स्टाफ, अपरेशन स्टेफन रोड्रिगेजले भने, उक्त अवसरमा कम्पनीको ‘सधैं अन’ योजनाका बारेमा बोल्दै उनले यो यस्तो प्रकारको नेपालमा नै पहिलो योजना भएको र यसले मोबाइल डेटामा प्याक सकिए पश्चात मेन ब्यालेन्स काटिने समस्या हटाएर सेवामा पहुँच अझ सहज र सुलभ बनाएको बताए । आइतबार देखि शुक्रबार हप्ताको ६ दिन यस सेन्टरले ग्राहकहरुलाई सेवा प्रदान गर्नेछ । यस अघि एनसेलले पुल्चोक, नारायणघाटमा रहेको आफ्नो पुरानो एनसेल सेन्टरबाट ग्राहक सेवा प्रदान गर्दैै आएको थियो । आफ्नो ग्राहक सेवालाई अझ सहज बनाई उत्कृष्ट ग्राहक अनुभव प्रदान गर्न एनसेलले देशका विभिन्न भागमा ३० वटा भन्दा बढि एनसेल सेन्टरहरु संचालन गर्दै आएको छ ।

जेठ १२, रत्ननगर ।

सौराहा र यस आसपासका विपन्न समुदायका महिलाहरुलाई तीन महिने सीपमुलक तालिम दिइएको छ । बाघमारा मध्यवर्ती समुदायिक वनले १० जना महिलालाई सिलाईकटाई र ३५ जना महिलालाई व्यूटिसियन तालिम दिएको हो । उपभोक्ताहरुलाई वनप्रतिको निर्भरता हटाउदै संरक्षणमा क्रियाशिल बनाउने उद्देश्यले सीपमुलक तालिम दिएको वनका अध्यक्ष जीतु तामाङले जानकारी दिए । वनको कार्यालयमै आयोजना गरिएको दुई छुट्टाछुट्टै तालिम शनिबार सकिएका छन् । समापन कार्यक्रमका प्रमुख अतिथि वडा नं ६ का वडाध्यक्ष किरण महतो, निकुञ्जका सहायक संरक्षण अधिकृत शान्तबहादुर मगर र वडा नं ७ कि वडा सदस्य माइली सुनारले तालिम लिएकाहरुलाई प्रमाणपत्र हस्तान्तरण गरेका थिए । तालिममा सहभागी सिला चौधरी, लक्ष्मी गोदार र अन्जली खनालले सिकेको सीपलाई आर्थिक उपार्जनको आधार बनाउने बताए । वडाध्यक्ष महतोले वनले प्रदान गरेको तालिम लिएकाहरुलाई थप तालिमको आवश्यकता परे वडा कार्यालयले सहयोग गर्ने प्रतिबद्धता जनाए । सिलाइकटाईको प्रशिक्षकमा विरेन्द्र चौधरी र व्यूटिसियनको प्रशिक्षकमा मीना उप्रेती, अनुराधा महतो रहेका थिए । समापन कार्यक्रम तालिम संयोजक सरस्वती चालिसेले सञ्चालन गरेकी थिइन् । पर्यापर्यटनबाट राम्रो आम्दानी गर्दै आएको सो सामुदायिक वनले वन व्यवस्थापन, बासस्थान र घासेमैदान व्यवस्थापन, मानव वन्यजन्तुको द्वन्द्व न्यूनीकरण, गरिबी निवारण, वालीनाली राहत वितरणको कामलाई प्राथमिकतामा राखेर काम गरिरहेको अध्यक्ष तामाङले बताए। मानव वन्यजन्तुको द्वन्द्व न्यूनीकरणको लागि बस्ती र वनको सिमानामा कंक्रिट बाल निर्माण, बालीनाली राहत, पशुचौपायाको बिमा, सुत्केरी भत्ता, मृत्यू हुँदा काजक्रिया खर्च, उपचार खर्च, शिक्षामा बार्षिक १० लाख लगानी र गरिबी निवारणका लागि सीपमुलक तालिम दिँदै आएको छ । सो सामुदायिक वन गैंडा, बाघ, भालु, चितुवा, मृगप्रजाती, घडियाल र मगर गोहीको मुख्य बासस्थान हो । सौराहामा आउने अधिकांस पर्यटक सो वनमा हात्ती सफारी र डुंगा सयर गरेर रमाउने गरेका छन् ।