समाचार

माघ २६, चितवन । पवित्रा ढकाल । आभास टेलिभिजन एचडीकी समाचार संयोजक एव चितवन खबर डट कम की सम्पादक सविना लामिछाने प्रेस चौतारी चितवन शैक्षिक प्रतिभा पुरस्कार २०८० बाट पुरस्कृत भएकी छन् । प्रेस चौतारी नेपाल चितवनको ८ औं जिल्ला अधिवेशनको अवसरमा पत्रकार लामिछाने पुरस्कृत भएकी हुन् ।

लामिछानेलाई पत्रकारीता तथा आम सञ्चार विषय अध्ययन गरी स्नातक तह तर्फ चितवन जिल्लामा नै प्रथम हुन सफल भएको भन्दै प्रेस चौतारी चितवनको आठौं जिल्ला अधिवेशनमा दश हजार नगद सहित पुरस्कृत गरिएको हो । कार्यक्रमका प्रमुख अतिथि प्रेस चौतारी नेपालका केन्द्रिय अध्यक्ष गणेश बस्नेत, प्रेस चौतारी चितवन शैक्षिक प्रतिभा पुरस्कार दाता दिपेन्द्र अधिकारी, जिल्ला समन्वय समितिका अध्यक्ष नारायण अधिकारी र प्रेस चौतारी चितवनका अध्यक्ष सुवास पण्डितले पुरस्कार प्रदान गर्नु भएको थियो । त्यस्तै कार्यक्रममा स्वर्गीय द्वारिका नेपाल स्मृति पुरस्कारबाट सन्तकुमार चौधरी, डा. तिलचन्द्र शारदा पुरस्कारबाट सालिकराम नेपाल, जोखम पत्रकारीता पुरस्कारबाट बद्रि अर्याल, निरुता बिक लगायतका पत्रकारहरु पुरस्कृत भएका छन् ।

चितवन, माघ २२ । भरतपुरका सामुदायिक र संस्थागत विद्यालयमा अध्यययन गर्ने किशोरीलाई एचपिभी खोप लगाउन सुरु गरिएको छ । पाठेघरको मुखको क्यान्सर विरुद्धको खोप एचपिभी हो ।
विश्व क्यान्सर दिवसको अवसरमा मंगलबार भरतपुर महानगरपालिका प्रमुख रेनु दाहालले श्री मावि गौरीगञ्जबाट अभियानको उद्घाटन गर्नुभयो । कार्यक्रमलाई सम्बोधन गर्दै प्रमुख दाहालले यो अभियानमा कक्षा ६ देखि १० मा पढ्ने सम्पूर्ण छात्राहरुलाई अनिवार्य सहभागी हुन आग्रह गर्नुभयो ।
भरतपुर महानगरले मेयर स्वास्थ्य कार्यक्रम अन्तर्गत जेष्ठ नागरिकको घरमै पुगेर स्वास्थ्य जाँच गर्ने कार्य गरिसेको र अब भने विभिन्न उमेर समूहको लागि यस्तै अभियान ल्याउने बताउनुभयो ।
अभियान फागुन २ गतेसम्म अर्थात् १० दिनसम्म चल्नेछ । विद्यालय जाने ६ कक्षादेखि १० कक्षासम्मका छात्राहरु र विद्यालय नजाने १० वर्षदेखि १४ वर्षसम्मका छात्राहरुलाई खोप लगाउन लागिएको स्वास्थ्य शाखा प्रमुख दिपक सुवेदीले जानकारी दिनुभयो ।
भरतपुर महानगरका स्वास्थ्य अधिकृत केशव भट्टका अनुसार विद्यालयका अध्ययरत १६ हजार १ सय ६९ र विद्यालय बाहिरा रहेका ४ सय २३ गरी १६ हजार ५ सय ९२ जनालाई खोप लगाइने छ । खोप सेवाका लागि १ सय ९३ खोप केन्द्रहरु, २ सय १ जना स्वास्थ्यकर्मी र ४ सय २ जना स्वास्थ्यकर्मी खटिने छन् ।
आगामी वर्षदेखि कक्षा ६ मा अध्ययन गर्ने छात्रालाई फागुन महिनामा नियमित खोप दिने तालिका रहेको अधिकृत भट्टले जानकारी दिनुभयो ।

चितवन, माघ २० ।

चितवन राष्ट्रिय निकुञ्जले सिमसार दिवसको अवसरमा विविध कार्यक्रम गरेको छ । ‘भविष्यका लागि सिमसार संरक्षण’ भन्ने मुल नाराका साथ निकुञ्जले रामसार सूचीमा सुूचिकृत बीस हजारी तालमा अन्तरक्रिया तथा फोहोर संकलन गरी दिवस मनाएको हो । मध्यवर्ती क्षेत्र, सामुदायिक वन, भरतपुर महानगरपालिका, रत्ननगर नगरपालिका, वडा कार्यालय, डब्लु डब्लु एफ नेपाल, एनटीएनसी लगायत संघसंस्थाको सहभागितामा कार्यक्रम गरिएको हो । यस्तै वरण्डाभार जैविक मार्ग अन्तरगत पूर्वपश्चिम महेन्द्र राजमार्गमा प्लाष्टिकजन्य फोहोर संकलन तथा चेतना अभिवृद्धि कार्यक्रम गरिएको छ । सिमसार र मानवबीच अन्तर सम्बन्ध, सिमसार संरक्षणका चुनौति, सिमसार पूर्नस्थापनामा भएका प्रयासहरु बारे आम नागरिकलाई यसको महत्व बुझाई यसको संरक्षणमा सबै तहतप्काको सहभागिता बढाउने कार्यक्रमको उदेश्य रहेको छ । कार्यक्रममा रत्ननगर नगरपालिका प्रमुख प्रलाद सापकोटा, चितवन राष्ट्रिय निकुञ्जका प्रमुख संरक्षण अधिकृत डा.गणेश पन्त, भरतपुर महानगरपालिकाका वातावरण शाखा प्रमुख, वडा अध्यक्षहरु, संरक्षण साझेदार संस्थाका प्रतिनिधिहरु लगायतको सहभागिता रहेको थियो ।