भदौ १, सौराहा । पवित्रा ढकाल / कोमल चन्द्र भगत । वि.सं. २०६१ मा चितवन झर्नु भएका डा. दम्पतीले फउण्डेसन स्थापना गर्नु भएको छ । लामो समय देखि स्वास्थ्य सेवा अन्तर्गत दन्त चिकित्सा क्षेत्रमा काम गर्दै आउनु भएका उहांहरुले आफ्रनै कमाईबाट सामाजिक सेवा गर्ने उद्देश्यले फाउण्डेसन स्थापना गर्नु भएको हो । दन्तरोग विशेषज्ञद्वय डा. अजय न्यौपाने र डा. सरु थापाले ‘डा. अजय एण्ड डा. सरु फाउन्डेसन’ स्थापना गरेको एक कार्यक्रमको आयोजना गरी औपचारीक रुपमा घोषणा गर्नु भयो ।
कार्यक्रममा फाउण्डेसनका संस्थापक डा. अजय न्यौपानेले स्वास्थ्य, शिक्षा, विपद् व्यवस्थापन, कला संस्कृति, खेलकुद लगायत क्षेत्रमा काम गर्ने बताउनुभयो । हप्ताको सातै दिन दम्पतीले नै काम गरेर त्यहाँबाट भएको आफ्नै आम्दानीले फाउन्डेसनमार्फत सामाजिक काम गर्ने उहांहरुको उद्देश्य रहेको डा. न्यौपानेले बताउनुभयो । वार्षिक १० लाख रुपैयाँ कोषमा राख्दै जाने उहांको भनाइ छ । चालु पुँजीका रुपमा यस आर्थिक वर्षमा १० लाख रुपैयाँ छुट्याएको उहांले बताउनु भयो । आउँदो वर्षबाट कोषको व्याजमा अरु रकम थप गरी त्यही पैसाबाट फाउन्डेसनले काम गर्ने उहां बताउनु भयो । दस वर्षमा अक्षयकोष एक करोड रुपैंया पु¥याउने उहांको लक्ष्य रहेको छ । व्याजले अपुग हुँदा आफूहरुले रकम राखेर सामाजिक काम गर्ने चिकित्सक दम्पतीको योजना रहेको उहांले बताउनुभयो । चिकित्सक दम्पत्तीले हालसम्म शिविर मार्फत ३५ हजार जनालाई निःशुल्क सेवा प्रदान गरिसकेको बताउनु भयो ।फाउन्डेसनले २० जना विद्यार्थीलाई जनही १० हजार रुपैंयाका दरले छात्रवृत्ति दिने, पाँच शिक्षकलाई रु १०/१० हजारका दरले प्रोत्साहन पुरस्कार दिने योजना अघि सारेको छ । स्वास्थ्य क्षेत्रमा विपन्नलाई आँखाको उपचार गर्न सहयोग गर्ने, स्वास्थ्य पहुँच मार्फत गाउँगाउँमा पुगेर शिविरमार्फत सेवा दिने, आकस्मिक स्वास्थ्य सहयोग गर्ने लगायतका काम फाउण्डेसनले गर्नेछ । त्यस्तै विपन्न २० परिवारलाई स्वास्थ्य बिमा गरिदिने योजना पनि रहेको छ । सुरुका वर्षमा गाउँपालिकामा यी कार्यक्रम सञ्चालन गर्ने योजना फाउन्डेसनको छ । फाउन्डेसनमा आफ्नो कमाइ मात्रै प्रयोग गरिने भन्दै उहांहरुले अन्य दाताको सहयोग नलिने बताउनु भयो ।
यद्यपि स्थानीय सरकार, रोटरी र अन्य सामाजिक संघ संस्थासँग सहकार्य गरेर काम गरिने फाउन्डेसनले जनाएको छ । अरु संग मागेर गरिने सहयोग समाज सेवा भित्र नपर्ने भन्दै डा. दम्पतीले आफ्रनै कमाईले समाज सेवा यात्रा शुरु गर्नु भएको छ । डा. अजय न्यौपाने भरतपुर अस्पतालका दन्तरोग विभाग प्रमुख हुनुहुन्छ भने डा. सरु थापा साइराम डेन्टल केयरकी अध्यक्ष हुनुहुन्छ ।
