समाचार

२० चैत, चितवन । 
भरतपुर महानगरपालिकाले जिल्ला ट्रफिक कार्यालय चितवनलाई ट्रफिक सामाग्री हस्तान्तरण गरिएको छ । सोमबार एक कार्यक्रमका बीच भरतपुर महानगरपालिका प्रमुख रेनु दाहाल र प्रमुख प्रशासकीय अधिकृत नरेन्द्र कुमारा रानाले संयुक्त रुपमा जिल्ला ट्रफिक प्रमुख राजकुमार तमाङलाई हस्तान्तरण गर्नुभयो ।
हस्तारण कार्यक्रममा भरतपुर महानगरपालिका प्रमुख रेनु दाहालले ट्रफिक सामाग्रीको उचित प्रयोग गरी महानगरको ट्रफिक व्यवस्थापनलाई थप चुस्तदुरुस्त पार्न अनुरोध गर्नुभयो ।
प्रमुख दाहालले आगामी वर्षहरुमा महानगरबाट यस्ता सहयोग भई राख्ने पनि बताउनुभयो ।
भरतपुरको ट्रफिक व्यवस्थापनको लागि ब्रेथलाईजर २ थान, बडी ओर्न क्यामेरा १ थान, ट्रफिक कोन २५ सेट, ह्वाईल लक सानो २४ पिस र ठूलो ८ पिस हस्तान्तरण गरिएको महानगरका आन्तरिक व्यवस्थापन शाखा प्रमुख झलककुमार श्रेष्ठले जानकारी दिनुभयो ।
महानगरपालिकाले ट्रफिक प्रहरीलाई रु ३ लाख बराबरको ईन्धन, रु २ लाख ८६ हजारको ट्रफिक बाईक यसअघि नै हस्तान्तरण गरिसकेको छ ।

२० चैत, चितवन । सरकारले गौतमबुद्ध अन्तर्राष्ट्रिय क्रिकेट रंगशालाको स्वामित्व लिएर निर्माण सम्पन्न गर्ने भएको छ । सोमबार बसेको मन्त्रिपरिषद्‍को बैठकले यस्तो निर्णय गरेको एक मन्त्रीले जानकारी दिए । धुर्मुस सुन्तली फाउन्डेसनले चितवनमा निर्माण गर्ने भनेको उक्त रंगशाला रकम अभावका कारण केही वर्षदेखि अलपत्र परेको छ । कलाकारद्वय सीताराम कट्टेल र कुन्जना घिमिरेले रंगशाला निर्माणको क्रममा लागेको १८ करोड ऋण तिर्न नसकेको भन्दै भरतपुर महानगरपालिकालाई जिम्मा लगाउँदै निर्माण रोकेका थिए । केही साताअघि फाउन्डेसनका संस्थापक कट्टेलले रंगशालाको स्वामित्व लिनका लागि सरकारलाई आह्वान गरेका थिए । सोमबारको मन्त्रिपरिषद्‍को निर्णयसँगै अब चितवनको क्रिकेट रंगशाला निर्माणको काम अगाडि बढ्ने भएको छ ।

२० चैत, काठमाडौं। सञ्चार तथा सूचना प्रविधि मन्त्री रेखा शर्माले राज्यको हरेक निकायमा महिलाको प्रतिनिधित्वका लागि संविधानको सफल कार्यान्वयन गर्नुपर्ने बताउनुभएको छ । 

सोमबार ललितपुरमा सञ्चारिका समूहको २६ औं वार्षिक साधारणसभा उद्घाटन गर्दै मन्त्री शर्माले कानुनमा बाध्यकारी व्यवस्था नभएसम्म महिलाले अवसर पाउने अवस्था नभएको उल्लेख गर्दै यसका लागि संविधानको सफल कार्यान्वयन गर्नुपर्ने बताउनुभएको हो । उहाले राष्ट्रपति र उपराष्ट्रपति निर्वाचनको उदाहरण दिदै कानूनमा रहेका केहि छिद्रका कारण महिलाको अधिकार खोसिने समस्या उत्पन्न भएको जिकिर गर्नुभयो । मन्त्री शर्माले सञ्चारमाध्यममा महिलाहरुले भोग्नुपरेका समस्याहरुलाई समाधानका लागि आफु प्रतिवद्ध रहेको बताउनुभयो । कार्यक्रममा अग्रज सञ्चारकर्मी लगाएत बिभिन्न सञ्चारकर्मीहरुलाई पुरस्कार प्रदान गरिएको थियो ।